Read Kalanga Bahebheru 2 Bible Online

Bahebheru 2 - Kalanga bible

Bahebheru 2

¹Ndizo takafanila kube ne njele hwulu kwazo muna tjatakahwa, kuti tisitongodwa tibhuda mu zila.

²Ha kuli kuti dama lakalebgwa nge batumwa be kudzimu lakabe lili malebeswa, ngono mmwe ne mmwe usakalilondolodza kene kulihwa kaamutjila shamu yakafanila,

³apa towodzeta tjini ha tisina hanya ngekwe jidzo ileli gulu zwingapa? Lakalebgwa ndi She kutanga, likakowobedzegwa mu zebe dzedu ndi ibabo bakanhwa,

⁴ha Ndzimu naiwo upa butendeki nge zwilakidzo ne matjenamiso ne masazibgwe akasiyana siyana nenge zwipo zwe Meya yakayengemala, zwakakobiwa kuyendidzana nge kuda kwawo.

⁵Ndzimu auzopa batumwa be kudzimu ndaulo mu shango inozha, yatinolebeleka nge kwayo.

⁶Kwakalebgwa pamwe pathu kuyi, “Nthu ini kene tjamungashwa mukumbula, nkololo we nthu ini kene tjamungatjengeta?

⁷Makanthama ali ntukunu pa batumwa be kudzimu kwe tjibakana, makammbadza gudzo ne tjilumbi,

⁸mukabiga tjimwe ne tjimwe tjamakabumba pasi kukwe.” Mukubiga tjimwe ne tjimwe pasi kwe nthu, Ndzimu auzosiya tjimwe kuzhe kwe ndaulo iye. Sekwa kuli iko ngwenu atitobona nthu ebusa zwithu zose.

⁹Koga tobona Jesu, wakabe athamiwa ntukunu pa batumwa be kudzimu kwe tjibakana atjimbadziwa, gudzo ne tjilumbi, ngobe wakadziyidziwa mu lufu, kuti ndizo nge ngoni dze Ndzimu alabilile mmwe ne mmwe lufu.

¹⁰Ngobe kwakabe kwakalingisana kuti Ndzimu iwo wakathama zwithu zose, kakale iwo unozwitjengeta, mukuzhisa kwawo bana banjinji ku gudzo, uthame ntangisi we jidzo lakapelela ngo kudziyila.

¹¹Ngobe iye unoyengemadza ne banoyengemadziwa banodwa pang'ompela. Ngekwa ikoku, Jesu aatobhakhwa nge shoni kubadana banung'una babe,

¹²eti, “Ndowoleba zina lenyu ku banung'una bangu, pakati kwe gubungano ndowomukudza.”

¹³Kakale, “Ndowobiga mu Ndzimu.” Kakale, “Ndipano ne bana bandakapiwa nge Ndzimu.”

¹⁴Se bana bakashanganyila mbumbiko ye mbili ne malopa, Jesu nge kukwe wakazwishanganyila nabo. Eyitila kuti nge lufu gugwe akolomole una simba le kubulaya, iye Satani,

¹⁵ngono asunungule ibabo bakatjila butjilo gwabo gose betjila mu bulanda gwe kutja lufu.

¹⁶Ngoti malebeswa hwuti, aatobhatsha batumwa be kudzimu, koga iye unobhatsha ludzi gwa Abhurahama.

¹⁷Ndizo wakabe efanila kuti ange banung'una babe nge mbumbiko yose kuti ndizo abe Ntungamili we bapirisiti una ngoni unogalikabgwe mu kushingila Ndzimu, kuzwipa ali tjibhayilo tjinodusa matjinyo e bathu.

¹⁸Ngoti iye nge kukwe wakadziyila kakale kalikwa, ngwenu unotubula kubhatsha banolikwa.