Read Kalanga Bahebheru 3 Bible Online

Bahebheru 3 - Kalanga bible

Bahebheru 3

¹Ndizo wali zwikamu zwangu zwakayengemala, imwi makadang'wabo nge Ndzimu, kumbulani Jesu, iye ntumwa kakale ali Ntungamili we bapirisiti we kugalamoyo kwedu.

²Wakabe egagwabgwe nge wakambiga mu mamo iyawa, koga sa Mushe akabe eshinga nshingo uwe mu ng'umba ye Ndzimu nge kugalikabgwe.

³Ngobe Jesu wakawanika efanigwa nge gudzo gulu kupinda Mushe koga se mbumbi we ng'umba ana gudzo kupinda ng'umba yaakabumba. Ndizo Jesu wakawanika akalizana kulumbidziwa kupinda Mushe.

⁴Ngobe ng'umba imwe ne imwe ina wakaibumba, koga mbumbi we zwithu zose Ndzimu.

⁵Mushe wakabe egalikabgwe mu ng'umba ye Ndzimu ali nlanda, kutendeka ngekwe zwithu zwakabe zwitjowolebgwa shule.

⁶Koga Kirisiti se ali Nkololo wakabe egalikabgwe mu ng'umba yose. Iswi ti ng'umba iye ha tibhata tisimisa kukulumbidzika kwedu ne kuzwiloba ifuba mu kugalabgwe kwedu.

⁷Ndizo wali, se Meya yakayengemala iti, “Nasi ha muhwa hwi lawo,

⁸musikukutadze mimoyo yenyu, se pa bupanduki, mu zhuba le kulikiwa mu tjilambanyika,

⁹pakati bobatategulu benyu bakandilika, ngono bakabona mishingo yangu makole ali makumi manna.

¹⁰Ngekwa ikoko ndakagwadzilamoyo tjizekugwana itjetjo ngono ati, ‘Banogala bepambuka mu mimoyo yabo. Abathu bakaziba zila yangu.’

¹¹Sekwandakatuna mu kugwadzamoyo kwangu nditi, ‘Abatowongina mu kunyaluluka kwangu!’ ”

¹²Yelani njele zwikamu kuti kusidwe kukabe kuna mbipo mu mmwe wenyu, asingagale moyo, emutungamilila mu zila inomudusa mu Ndzimu unotjila.

¹³Koga kulumbidzanani mazhuba wose akutjayi “Nasi” kuyita kuti kusibe ne wenyu unokukutadziwa nge butjengedzi gwe jinyo.

¹⁴Ngobe tina gobe muna Kirisiti ha tibhata tisimisa kunoti kubupelo mu bugalimoyo gwedu gwatakabe nago kutanga.

¹⁵Sekwa kwakalebgwa kuyi, “Nasi ha muhwa hwi lawo, musikukutadze mimoyo yenyu se pa bupanduki.”

¹⁶Apa ndiboani bakahwa ngono bakaupandukila kene? Apa ate ibabo bose bakadwa mu Egipiti bakatungamigwa ndi Mushe kene?

¹⁷Apa ndiboani Ndzimu bawakagwadzilamoyo makole ali makumi manna kene? Ate ibabo bakatjinya bakaloba mu tjilambanyika kene?

¹⁸Ndzimu wakatunila boani kuti abatowongina mu kunyaluluka kwawo, ha isi ibabo basakauhwa kene?

¹⁹Ndizo tobona kuti abazotubula ngina mu kunyaluluka, ngobe bakabe basagalamoyo.