Read Kalanga Bahebheru 4 Bible Online

Bahebheru 4 - Kalanga bible

Bahebheru 4

¹Ndizo ngakuti kugadziwabgwe mukungina mu kunyaluluka kutjiyapo, tiyeleni njele, kuti kusibe ne mmwe wenyu unowowang'wa akong'wa kunoswika mu kunyaluluka ikoko.

²Ngobe ndebo mbuya yakazhabo ku tili koga se ku bali, koga dama labakahwa alizobabhatsha nge tjimwe, ngobe lakasheta kugalamoyo mu bahwi balo.

³Ndizo iswi takagalamoyo tongina mu kunyaluluka ikoko sekwa wakati, “Sekwa ndakatuna mu kugwadzamoyo, ‘Abatowongina mu kunyaluluka kwangu,’ ” nenguba mishingo yawo yakafidziwa pa kubumbiwa kwe shango.

⁴Ngobe una pawakaleba ngekwe zhuba le kutendeka uti, “Ndzimu wakanyaluluka mu zhuba le butendeka mu mishingo yawo yose.”

⁵Kakale ipapa ukati, “Abatowongina mu kunyaluluka kwangu.”

⁶Ndizo kutjina bakasalila kungina mu kunyaluluka ikoku zwako ne bakahwa ndebo mbuya kutanga abazotubula kungina, kuli nge kusahwa,

⁷ndizo Ndzimu unobiga limwe zhuba, linoyi “Nasi.” Wakalileba shule kwe makole manjinji etuma Dafite sekwa kalebgwa kuyi, “Nasi, ha muhwa hwi lawo, musikukutadze mimoyo yenyu.”

⁸Ngobe Joshuwa ha akabe abapa kunyaluluka, Ndzimu unobe usakati shule ukaleba ngekwe limwe zhuba.

⁹Ndizo wali kunyaluluka nge Sabata kutjakasalila bathu be Ndzimu;

¹⁰ngobe iye unowongina mu kunyaluluka kwe Ndzimu, unowobe enyaluluka mu mishingo iye, se Ndzimu wakanyalulukabo muna yawo.

¹¹Ngatigwiseni tjose kuti tingine mu kunyaluluka ikoko, kuti kusibe ne mmwe wedu unowokonedziwa nge zila yakajalo ye kusahwa.

¹²Ngobe dama le Ndzimu lotjila, kakale loshinga, lopitsha kupinda bukanu guna ntha dzinotema mbili, lobhaya likathubukanya meya ne butjilo, mongo ne malunganilo. Losumikilisa njemulo ne mikumbulo ye moyo we nthu.

¹³Akuna tjakasumbikala ku Ndzimu, tjimwe ne tjimwe mu lubumbo gose tjakaambuka, tjipatjena mu mesho awo, iwo watakafanila kuzwileba mbeli kwawo.

¹⁴Ndizo setina mpirisiti nkulu kwazo wakapinda epalama zhuzhugwi, iye Jesu Nkololo we Ndzimu, ngati bhatilileni mu kugalamoyo kwatinoleba titi tinako.

¹⁵Ngobe atina mpirisiti nkulu usingatubule kuhwisisa kusasima kwedu, koga tina wakalikiwabo saswi, koga kabe usina tjibi.

¹⁶Ngatisedzeleni ngono ku tjigalo tje bushe gwe ngoni, nge kugalamoyo kuti tiamutjile mahwilozogwadza ne ngoni mu tjibaka tjatinowobe tishaka bhatsho.