Read Kalanga Bahebheru 5 Bible Online

Bahebheru 5 - Kalanga bible

Bahebheru 5

¹Ntungamili we bapirisiti mmwe ne mmwe unoshalugwa mu bathu unopiwa nshingo we kuzwadzanya bathu ne Ndzimu, eyisa zwipo ne zwibhayilo zwe zwibi.

²Unotubula kubhata zubuyanana ibabo banotjinya ngosheta zibo, se naiye ekuligwa ngokong'wa.

³Ndizo wali akafanila kudusa tjibhayilo tje zwibi zwizwe ne zwe bathubo.

⁴Akuna unozwipa mamo ekube Ntungamili we bapirisiti, koga wakafanila kudang'wa nge Ndzimu sekwa kwakadang'wa Aroni.

⁵Ndizo sayikoko Kirisiti aazozwipa mamo ekube Ntungamili we bapirisiti, koga wakapiwa nge Ndzimu iwo wakati kunli, “U Nkololo wangu, nasi ndabe Tate babo.”

⁶Sekwa wakaleba pamwe pathu uti, “Unowobe mpirisiti nge kusingapele, mu ndongoloso ya Melikizedeki.”

⁷Mu butjilo gugwe muno mu shango, Jesu wakabe etembezela nge tjililo ekumbila nge mishodzi, ku Ndzimu iwo wakabe ungantjidza mu lufu. Ngono Ndzimu ukan'hwa ngoteta kukwe.

⁸Nenguba akabe ali Nkololo, wakazwidiya kuhwa nge kudziyila kwaakadziyila ndiko.

⁹Wakati ahwa nge buzhalo, kabe nsenya we kutjidziwa kusingapele kwabo bose banonhwa.

¹⁰Ndzimu ukan'dana Ntungamili we bapirisiti kuyendidzana ne ndongoloso ya Melikizedeki.

¹¹Nge kwaikoku kunjinji kwatingaleba, koga kwakasima kutjenesa, ngobe makazwina zebe.

¹²Ngoti nenguba mu tjibaka tjino makafanila kube badiyi, mutjashaka mmwe kumudiya kakale zwidiyo zwe kutanga zwe dama le Ndzimu. Moshaka nkaka pana kuti mushake zojiwa zwakabhata.

¹³Ngobe iye unotjila nge nkaka utji mwana, aana luzibo gwe dama le ndulamo.

¹⁴Zojiwa zwakabhata nge zwe bakulukulu, nge zwe bana njalakang'wa dzakawolobeleka ngoshingisiwa kuthubukanya tjakalulwama ne tjisakalulwama.