Read Kalanga Bahebheru 6 Bible Online

Bahebheru 6 - Kalanga bible

Bahebheru 6

¹Ndizo ngwenu ngatisiyeni zwidiyo zwe kutanga ngekwa Kirisiti tidwilile nge zwe buhwola. Tisiteye kakale thiwa ye zwidiyo ngekwe kushanduka mu mishingo isina bhatsho ne kugalamoyo mu Ndzimu,

²zwidiyo zwe kudubikiwa[3] nenge zwe kubiga maboko ne zwe kumuka kwe bafi nenge zwe kusumikilisiwa kusingapele.

³Towothama woku ha Ndzimu uduma.

⁴Ngobe akutotubuka kushandula kakale ibabo bakabe bawana tjedza bakalabila tjipo tje kudzimu, bakabe ne gobe le Meya yakayengemala,

⁵kakale bakalabila zipa kwe dama le Ndzimu ne masimba e misi inozha,

⁶ha befupatila kushanduka kwabo, banobambula Nkololo we Ndzimu kakale, benlengudza.

⁷Ngobe nnda unong'wa vula inona kukudza mitjelo una bhatsho muna ibabo baunolimigwa, unokombolegwa nge Ndzimu.

⁸Koga ha umela mihwa ne zwishosho auna nshingo, umu mbatsha dze kulongwa bhiso, bhelelo lawo hwupisiwa.

⁹Nenguba tilebeleka sa ikoku nge kwenyu badiwa, togalabgwe kuti mowowana makombolelo anozhisa jidzo.

¹⁰Ngobe Ndzimu ate kuli kuti auzolulwama kwawungashayila hanya nshingo wenyu ne ludo gwamakalakidza nge kwawo mu bhatsha bayengemali sekwa mutja thama nangwenu.

¹¹Toyemula kuti mmwe ne mmwe wenyu alakidze kumusa meya mu kuhwisisa malebeswa e kugalabgwe kuswikila ku bupelo.

¹²Kuti ndizo musibe simbe, koga mube bayedzi baibabo bakati nge kugalamoyo nenge moyonlefu bakaamutjila kugadziwabgwe.

¹³Ngobe Ndzimu wakati uthama tjidumano na Abhurahama, ukatuna nge zina lawo sekwakabe kusina mmwe nkulu pawuli wawakabe ugatuna naye.

¹⁴Wakatuna uti, “Nge malebeswa ndowokukombolela kakale athama kuti uwande.”

¹⁵Abhurahama kati alindila nge moyonlefu, kaamutjila tjaakabe agadziwabgwe.

¹⁶Bathu banotuna nge mmwe nkulu pabali, ngono mu kusawililana kwabo kose, kutuna ndiko kunoligila ndebo.

¹⁷Ndzimu wakati ushaka kulakidza bagalithaka mbumbiko isingashanduke ye kugadzabgwe kwawo kwawakabapa nge zila inogadzamoyo, ukatuna,

¹⁸kuyita kuti nge zwithu zwibili zwisingashanduke zwausingake ukabona Ndzimu nlandu muzwili, iswi takatizha tishaka dizhilo tikulumbidzike kwazo kubhatisa kugalabgwe kwakabigiwa mbeli kwedu.

¹⁹Tina kugalabgwe ikoku se midzi ye butjilo gwedu, kugalabgwe kunginila tjemukati mu ng'umbana itja mukati shule kwe tjisitilo,

²⁰ndiko Jesu kwaakangina ali ntangidzi alimilile iswi, kabe Ntungamili we bapirisiti nge kusingapele kuyendidzana nge ndongoloso ya Melikizedeki.