Read Kalanga Bahebheru 7 Bible Online

Bahebheru 7 - Kalanga bible

Bahebheru 7

¹Melikizedeki iwoyu wakabe ali mambo we Salema, kakale ali mpirisiti we Ndzimu Upezhugwi zhugwi wakashanganidza Abhurahama edwa kubulaya bomambo mu ngwa ngono kankombolela,

²ipapo Abhurahama kan'dusila tjebugumi muna kose kwaakabe anako. Tje kutanga shandulidzo ye zina la Melikizedeki lodwa kuti, “Mambo we ndulamo;” kakale wakabe ali mambo we Salema, kudwiwa kuti, “Mambo we kunyalala.”

³Melikizedeki aana tate kene mme kene ludzi, aana panotangisa butjilo gugwe kene pagunopelela, unonga Nkololo we Ndzimu, bupirisiti gugwe godwilila nge kusingapele.

⁴Bonani ngono kuti nkulu kungapani! Na Abhurahama batategulu bedu wakan'dusila tjebugumi muna kose kwabakabe batapa mu ngwa.

⁵Bana ba Levi bakapiwa bupirisiti bana ndayilo mu nlayo* inoti batole tjebugumi mu bathu, betjitola mu bana batate babo, nenguba bali bakololo ba Abhurahama naibobo.

⁶Koga nlume iwoyu usi we ludzi gwabo, wakapiwa tjebugumi ndi Abhurahama, ngono Abhurahama iye wakaamutjila kugadzabgwe kwe Ndzimu, kakombolegwa ndi Melikizedeki.

⁷Akuna ungalandula kuti nthu ntukunu unokombolegwa nge nkulu.

⁸Mu ndongoloso iyeyi tjebugumi tjoamutjigwa nge bathu banofa, koga mu ndongoloso iyeyije tjakaamutjigwa nge unotendekwa nge kukwe kuti unotjila.

⁹Nthu ungana kati Levi nge kukwe iye unoamutjila tjebugumi, wakadusa tjebugumi muna Abhurahama;

¹⁰ngobe Levi wakabe atji mu malopa a batategulu babe Abhurahama, ha Melikizedeki enshangamidza.

¹¹Ha kululwama kwakapelela kwawanika nge bupirisiti gwa Levi, se bathu bakaamutjila nlayo balipasi gwago, kwakabe kowobe kutjashakigwani kuti kube ne mmwe mpirisiti kuyendidzana nge ndongoloso ya Melikizedeki kuzhe kwe wakatumigwa nge ndongoloso ya Aroni?

¹²Ngobe ha kuna kushanduka mu bupirisiti ne mu nlayo kube ne kushandukabo.

¹³Iye unolebegwa zwithu izwezwi, nge we ludzi gupoga, kusina unodwa mu guli wakatongo shinga pa tjibeso tje zwibhayilo.

¹⁴Ku patjena kuti She wedu wakazwagwa ali we ludzi gwa Juda, ngono ngekwe ludzi igogo, Mushe aazoleba tjimwe ngekwe bapirisiti.

¹⁵Ikoku kobe patjena kwazo ha mpirisiti upoga ezha, enga Melikizedeki.

¹⁶Aazothamwa mpirisiti kuyendidzana nge milayo ye lutshinga, koga wakathamwa nge simba le butjilo gusingalobe.

¹⁷Ngobe kotendekwa nge kukwe kuyi, “Iwe u mpirisiti nge kusingapele, kuyendidzana nge ndongoloso ya Melikizedeki.”

¹⁸Ngono nlayo we kutanga wakabigigwa ntome, ngobe wakabe usakasima kakale usina nshingo.

¹⁹Ngobe nlayo awuna tjimwe tjawakathama tjikapelela. Koga ngwenu kugalabgwe kunoyita kwakazhisiwa, iko kunoti sedzedza pejo ne Ndzimu.

²⁰Kwakathamiwa nge kutuna kwe Ndzimu. Ibabo bakabe bakathamiwa bapirisiti kutanga bakabigwa kuzhe kwe kutuna ikoku.

²¹Koga Jesu wakabigwa mpirisiti shule kwe kutuna kwe Ndzimu pawakan'dwa ukati, “She wakatuna ngono aangashanduse nkumbulo uwe.” Kati, “U mpirisiti nge kusingapele.”

²²Ngekwa ikoku Jesu kabe itjo tjatingawana mu tjidumano tjinoyita.

²³Bapirisiti be kutanga bakabe bali banjinji, ngoti lufu gwakabe gubadzibisa kudwilidza nshingo ngobe bakabe befa.

²⁴Jesu nge kusingapele una bupirisiti gusingapele.

²⁵Ndizo unotubula kutjidza mu misi yose, ibabo banozha ku Ndzimu ndiye, se etjila misi yose ku Ndzimu.

²⁶Ngobe kwakalingisana kuti tibe ne mpirisiti nkulu wakajali wakayengemala, usina nlandu, mbuyanana, wakathubukana ne batjinyi wakamilidzigwa pezhugwi kwe kudzimu.

²⁷Akutosheteka kuti ayise zwibhayilo se bapirisiti bakulu ibabaje, akutosheteka kuti azwiyisile tjibhayilo tje zwibi zwizwe kutanga ekoyisila bathu shule; wakathama ikoku kang'ompela ethamila misi yose paakazwipa kube tjibhayilo.

²⁸Nge malebeswa nlayo unobiga bathu basakasima kube bapirisiti bakulu, koga dama le kutuna ileli lakazha shule kwe nlayo lobiga Nkololo, iye wakathamiwa mpezha nge kusingapele.