Read Kalanga Bahebheru 8 Bible Online

Bahebheru 8 - Kalanga bible

Bahebheru 8

¹Tjikulu muna tjatinoleba hwuti, tina Ntungamili we bapirisiti wakajalo, iye ugele ku luji gwe tjigalo tje Ndzimu kudzimu,

²unoshinga mu Bugalo gwakayengemala, Nshasha[4] we malebeswa usakabakwa nge nthu koga wakabakwa ndi She.

³Ngobe Ntungamili we bapirisiti mmwe ne mmwe unobigigwa kupa zwipo ne zwibhayilo, ndizo mpirisiti iwoyu naiyebo wafanila kuti abe ne tjaanopa.

⁴Ngobe ha abe ali mu shango, unobe asi mpirisiti, se kuna bapirisiti banopa zwipo kuyendidzana ne nlayo kale.

⁵Banoshinga mu ifano ne ntutshi we bugalo gwakayengemala, ngoti Mushe wakati abe pejo ngobaka nshasha kalayiwa nge Ndzimu uti, “Ubone kuti unothama tjimwe ne tjimwe kuyendidzana ne tjawakalakidziwa pezhugwi kwe dombo.”

⁶Koga sekwa kuli iko ngwenu, Jesu wakapiwa nshingo nkulu unopinda wantolo se tjidumano tjaamilile tjiyita, setjithamigwa mu kugadzabgwe kunoyita.

⁷Ngobe ha tjidumano tje kutanga tjakabe tjisina nlandu, tjidumano tje bubili tjobe tjisakabepo.

⁸Koga Ndzimu wakabona bathu bawo nlandu, ndizo uti, “Mazhuba anowozha, kojalo She, andinowothama Tjidumano tjitshwa ne bathu be Iziraela, kose ne bathu be Juda.

⁹Atjitowonga tjidumano tjandakathama na bobatategulu babo, mu zhuba landakababhata nge luboko, ndibatungamila kudwa mu Egipiti. Ngobe abazodwilila mu tjidumano tjangu, ndizo asibe ne hanya nabo, kojalo She.

¹⁰Etji nditjo tjidumano tjandinowothama ne Baiziraela, shule kwe mazhuba iyawo, kojalo She. Ndowolonga milayo yangu mu mikumbulo yabo kakale aikwala mu mimoyo yabo. Ngobe ndowobe Ndzimu wabo, ibo banowobe bathu bangu.

¹¹Akuna wabo unowodiya wa kanyi kukwe kene kuli kudwa ikamu tjitje eti, ‘Ziba She.’ Ngobe bose banowondiziba, kudwa mu ntjetjana kunoti hwola tjose.

¹²Ndowobe nge ngoni mu matjinyo abo ngono anditjowokumbula zwibi zwabo.”

¹³Mu kulebeleka ngekwe “Tjidumano tjitshwa,” wakathama tjidumano tje kutanga kuti tjisitjabe ne nshingo. Ngono tjithu tjisitjina nshingo kakale tjikwegula tjakalingisana ngoloba.