Read Kalanga Jakubo 1 Bible Online

Jakubo 1 - Kalanga bible

Jakubo 1

¹Ndimi Jakubo nlanda we Ndzimu ne wa She Jesu Kirisiti. Ku njudzi dzili gumi lina mbili dze Iziraela[1] dzakaandama mu shango, ndodumilisa!

²Zwikamu zwangu, shathani ha muzwiwana muli mu ndiko dzakasiyana.

³Ngobe moziba kuti kulikiwa kwe bugalimoyo gwenyu kozhisa kudzikitadza.

⁴Muletje kudzikitadza ikoku kuwidze nshingo nge buzhalo.

⁵Ha mmwe wenyu eshaka butjenjedu gwe kudzimu, ngaakumbile ku Ndzimu, ngobe unopa mmwe ne mmwe nge sununguko usingakayikanye.

⁶Koga ha ekumbila agalebgwe kuti unowopiwa, asidudumwe, ngobe ha edudumwa, unonga duthu le vula ye gungwa linotutudzigwa kumwe ne kumwe nge phepo.

⁷Nthu wakajalo, una mikumbulo mibili, unoyenda edudumwa mu mishingo iye, asialakane kuti ungaamutjila tjimwe muna She.

⁹Ikamu tjisina tjatjo ngatjishathile kuti Ndzimu watjikudza.

¹⁰Ikamu tjakafuma naitjo ngatjisihwe zogwadza ha Ndzimu atjiyisa pasi. Ngoti unoloba se luba le bushwa,

¹¹ngobe zhuba lobhuda nge kupisa kwalo kukulu, ngono likapisa bushwa, luba likawa, bubuya gwalo gukapela. Butjilo gwe nfumi gowolobabo nge zila yakajalobo, atjakanginikana nge fumwa iye.

¹²Wakakombolegwa nthu unodzikitadza mu ndiko, nge kuti ha alikiwa kakunda, mbhayilo uwe unowobe butjilo gusingapele, Ndzimu gwawakagadzabgwe banouda.

¹³Kushete unoti ha elikwa kati, “Ndolikwa nge Ndzimu.” Ngobe Ndzimu aungalikwe nge bubi naiwo awuna nthu waunolika.

¹⁴Koga nthu mmwe ne mmwe unolikiwa ha eteyiwa kakale ewongiwa nge njemulo dzidze dzakabipa.

¹⁵Njemulo dzoti dzatjiwanda dzikazwala tjibi, tjibi tjoti tjakula tjikazwala lufu.

¹⁶Musitongotjebegwa zwikamu zwangu zwinodika.

¹⁷Tjipo tjimwe ne tjimwe tjibuyanana, tjakanaka, tjodwa pezhugwi, kuna ibo Tate be tjedza tje nyenyedzi ne mwedzi ibo basingashanduke se mitutshi.

¹⁸Nge kuda kwawo wakatibumba nge dama le malebeswa, kuti ndizo tibe iswi mitjelo yekutanga mu zwibumbiwa zwawo zose.

¹⁹Bhatani matama iyawa zwikamu zwinodika. Muzwidiye kuhwilila musingatjimbidzile kulebeleka kene kugwadzamoyo.

²⁰Ngobe kugwadzamoyo kwe nthu akutoshinga ndulamo ye Ndzimu.

²¹Ndizo thubukanani ne shambgwa yose ne bubi gose gunowanda, ngono muzwiyise pasi muamutjile dama linodzwagwa nge Ndzimu, linotubula kumutjidza.

²²Koga shingani tjinolebgwa nge dama, musingazwitjengedze nge kuhwilila koga.

²³Ngobe ha kuna unohwilila dama, koga asingashinge tjalinoleba, unonga nthu unolinga tjiso tjitje mu iponi,

²⁴nge kuti unozwibona, ngono kayendazwe kati tjinyolotjo kakangang'wa kuti wazwibona akatini.

²⁵Koga iye una njele nge nlayo iwo wakapelela unosunungula bathu, ngono eutobelela, asinga kangang'we tjaahwa koga etjilondolodza, unowokombolegwa muna tjaanothama.

²⁶Ha kuna mmwe pakati kwenyu ezwidwa eti nnamati we Ndzimu, ngono eti elebeleka kasishale matama, unozwitjengedza mu moyo, kunamata kukwe akuna nshingo.

²⁷Kunamata kwakalulwama kusina shambgwa mu mesho e Ndzimu, kakale bali Tate, ndi woku: kubhatsha siyang'wa ne tjilikadzi mu kuhwa zogwadza kwabo nenge kugala kuzhe kwe shambgwa ye shango.