Read Kalanga Jakubo 3 Bible Online

Jakubo 3 - Kalanga bible

Jakubo 3

¹Zwikamu zwangu, musitongobe badiyi muli banjinji, ngobe moziba kuti iswi badiyi towosumikilisiwa kwakasima kupinda bamwe.

²Nge kuti tose toti tikapambuka kanjinji, ha kuli kuti kuna usingatongopambuka muna tjaanoleba, nthu wakajalo wakalulwama kwakapelela, ngobe unotubula kulaula mbili uwe wose.

³Ha tilonga dzitomu mu milomo ye mbizi kuti dzitihwe, tobetiti tilaule mibili yadzo.

⁴Bonani zwikepe naizobo, nenguba zwili zwikulu kungapani, zwitutudziwa nge phepo dzina masimba makulu kwazo zolaugwa nge n'goti ntukununu kuti zwiyende kumwe ne kumwe kunoshakiwa nge n'yendisi wazo.

⁵Sa ikoko lulimi gutukununu mu mbili, koga gozwikudza nge zwithu zwikulu kulu. Bonani, shango isi shoma inopisiwa nge moto ntukununu.

⁶Ngono lulimi gonga moto. I ndungululo izhele bubi mu mibili yedu ngobe gobipisa mbili wose gulonga moto mu butjilo gwedu gose. Gobhatidziwa nge moto usingadzimike.

⁷Nge kuti phuka imwe ne imwe ne nyuni ne zwitjili zose zwinosoba na pasi ne zwitjili zwimu gungwa, zokatisiwa kakale zwagala zwikatisiwa nge bathu.

⁸Koga akuna nthu ungakatisa lulimi. Agutolaulika guzhele bubi kakale guzhele bushungu gunobulaya.

⁹Tokudza She Tate nge lulimi, tikabuya tilonga bhiso mu bathu ndigo zwago, ibo bakathamiwa mu tjifano tje Ndzimu.

¹⁰Mu nlomo uli nng'ompela kodwa dothodzo ne bhiso. Zwikamu, akuzofanila kuti kube saikoko.

¹¹Apa makatongo bona tshime lidwilila vula inobaba ne inozipa lubaka gung'ompela kene?

¹²Mpaya aungazwale matoba ne nzhambi aungazwale phaya. Ndizo nditi akuna tshime lingadwilila vula inobaba ne inozipa lubaka gung'ompela.

¹³Ndiani wakatjenjela unohwisisa pakati kwenyu kene? Ngaalakidze mishingo iye nge butjilo gugwe gwakalulwama nge kuzwiyisa pasi kunozwagwa nge butjenjedu.

¹⁴Koga ha muna fupa ne njemulo mu mimoyo yenyu dze kuzwishathisa musizwikudze munyepela malebeswa.

¹⁵Butjenjedu gwakajalo agutodwa pezhugwi, nge gwe shango, ategwe Tjimeya ngegwa Satani.

¹⁶Nge kuti pana fupa ne njemulo dzakabipa, pakashangashangana kakale kuna mishingo yose mibi.

¹⁷Koga butjenjedu gunodwa pezhugwi gwakatjena, goda mbakiso, bunyolo kakale gohwisisa, guna mahwilo zogwadza ne mishingo mibuyanana nge buzhalo, aguna shalaulo kene butjengedzi.

¹⁸Ngono ntjelo we ndulamo unodzwagwa nge mbakiso nge banothama mbakiso.