Read Kalanga Jakubo 4 Bible Online

Jakubo 4 - Kalanga bible

Jakubo 4

¹Ini tjinobanga ngwa ne kukwebakwebana pakati kwenyu? Azwitodwa mu njemulo dzenyu dzinogwisana mukati kwenyu kene?

²Moyemula koga mukasizwiwane, ndizo mukabulaya. Muna tjiba mu zwithu zwinjinji, ngono tjiba dzenyu adzitopunduka, ndizo mukwebakwebana mudza mugwa. Amutowana zwithu zwamunoshaka nge kuti amutozwikumbila.

³Ngono ha mukumbila amutowana nge kuti amutokumbila nge zila yakalulwama. Mokumbilila kushathisa njemulo dzenyu.

⁴Bathu basingagagwebgwe ndimwi! Apa amutoziba kuti ha muli bazwalani be shango mu zwita zwe Ndzimu kene?

⁵Kene mozwidwa muti ndebo iyeyi imu hwalo dze Ndzimu, inoti “Ndzimu una njemulo dzinopisika ngekwe meya yawakalonga mutili,” ate malebeswa?

⁶Koga ngoni dzatinohwigwa nge Ndzimu inji, ndizo hwalo dze Ndzimu dziti, “Ndzimu unonyanyayidza bathu banozwikudza, koga unohwila ngoni banozwiyisa pasi.”

⁷Muzwipe mu Ndzimu mugwisane na Satani, ndizo Satani unowomutizha.

⁸Muzwisedzedze ku Ndzimu ndizo na iwobo unowozwisedzedza kumuli. Ngulani maboko enyu, batjinyi ndimwi! Mutjenese mimoyo yenyu, bathu ndimwi be mimiyo ikabili!

⁹Ibeni ne buyendasi muhwe zogwadza mulile ne tjiseko tjenyu tjishanduke tjibe tjililo. Kushatha kwenyu ngakushanduke kube kufubala ne kuhwa zogwadza.

¹⁰Muzwiyise pasi mbeli kwa She ndizo unowomukudza.

¹¹Musilebane bubi zwikamu. Iye unoleba bubi ngekwe tjimwe ikamu, kene etjibona nlandu, unobe eleba bubi ngekwe nlayo, koga ha ubona nlayo nlandu auteuli nlondolodzi we nlayo koga unsumikilisi wawo.

¹²Kuna nng'ompela unopa nlayo kakale unosumikilisa, iye unotubula kutjidza ne kukolomola. Koga iwe, uani unobona mmwe nthu nlandu kene?

¹³Hwililani imwi munoti, “Nasi kene mangwana towoyenda kwakati, tikanolaluka tishaba tikubunganya mari manjinji,”

¹⁴koga musingazibe kuti kowobe kuli tjani mangwana. Butjilo gwenyu ini kene? Monga fulele inobe yapo ikadwa ipela tjinyolotjo.

¹⁵Makafanila kuti muti, “Ha She eda, towotjila tikashinga sa woku na woku.”

¹⁶Ngono ngwenu mozwikudza muzwiloba ifuba. Koga kuzwiloba ifuba ikoko kubiibi.

¹⁷Iye unoziba tjakalulwama tjaakafanila thama koga kasitjithame, unothama jinyo.