Read Kalanga Jakubo 5 Bible Online

Jakubo 5 - Kalanga bible

Jakubo 5

¹Hwililani imwi bafumi, lilani mukuwe ngekwe buyendasi gwamuswikila.

²Fumwa yenyu yakabola ne zwiambalo zwenyu zwakajiwa nge ntjenje.

³Golide ne siliva dzenyu dzakajiwa nge bulala. Bulala igogu gowobe butendeki gwekuti mu nlandu. Gowomuja se moto. Makazwikubunganyila fumwa mu mazhuba e bupelo.

⁴Bonani ndipo dze bashingi bakavuna mu minda yenyu, dzamusakalipa! Banolila. Tjililo tjabo tjakangina mu zebe dza She we masimba wose.

⁵Makatjilila mu ipepkhwe mu shango muzwishathisa. Muzwikodza muzwilulwamisila zhuba le kubulawa.

⁶Makabona nlandu mukabuya mukabulaya bathu bakalulwama basinga lambane namwi.

⁷Ibeni ne moyonlefu zwikamu, kuswikila kubuya kwa She. Bonani, nlimi unomilila mitjelo mibuya ye shango, nge moyonlefu kudzina iwana vula ye kutanga ne ye bupelo.

⁸Namwibo, musinyalemoyo, simani, nge kuti kuzha kwa She kwabe pejo.

⁹Musing'ong'olelane zwikamu kuti ndizo musisumikilisiwe. Bonani, Nsumikilisi wabe pejo.

¹⁰Zwikamu tolani tjilakidzilo mukudziyila nekube ne moyonlefu kwe balebesambeli bakalebeleka mu zina la She.

¹¹Toti bakakombolegwa, ngobe bakasimisila. Makahwa ngekwe moyonlefu wa Jobe, ngono makabona kuti bhelelo She wakanthamilani. She una mahwilo zogwadza ne ngoni.

¹²Tjikulu ndi etji zwikamu, musitongo tuna ne kudzimu kene ne shango kene neni. Koga “Ee” wenyu ngaabe “Ee” na “Aa” wenyu ngaabe “Aa,” kuti ndizo musiwang'we nlandu.

¹³Apa kuna mmwe wenyu unodziyila kene? Ngaatembezele. Apa kuna wakashatha kene? Ngaambe njimbo dzinokudza Ndzimu.

¹⁴Apa kuna mmwe wenyu unogwala kene? Ngaadane bakulu be gubungano bantembezelele babuye banzhodze mafuta nge zina la She.

¹⁵Ntembezelo unotembezegwa nge kugalamoyo unowopodza n'gwele. She unowompa mamuko. Ngono ha ana jinyo She unowonzwiibhatigwa.

¹⁶Ndizo muzwilebe matjinyo enyu mmwe ku mmwe, mutembezelelane kuti mupodziwe. Ntembezelo we nlulwami una masimba kakale unoshinga.

¹⁷Elija wakabe ali nthu unonga iswi. Wakatembezela akalonga meya mu nyama kuti vula isine mu shango, ngono dumbu vula ikasine makole matatu ana gaswa.

¹⁸Kati shule kwa ikoko katembezela kakale kuti vula ine, ngono zhuzhugwi kukazhuka vula ikana shango ikabe ne zwizwalo.

¹⁹Zwikamu zwangu, ha mmwe wenyu angalashikigwa nge malebeswa, ngono mmwe una ngoni kambuzila ku malebeswa,

²⁰iye wambuza ngaazibe kuti, nthu wadusa ntjinyi mu zila iye isakalulwama, unotjidza meya iye mu lufu. Kakale matjinyo awe wose nge bunji gwawo anowozwiibhatigwa nge Ndzimu.