Read Kalanga 1 Pita 1 Bible Online

1 Pita 1 - Kalanga bible

1 Pita 1

¹Ndimi Pita, ntumwa wa Jesu Kirisiti. Ku bashalugwa be Ndzimu banonga bataya bakaandama ntuthu wose we Ponto ne mu Galatiya ne mu Kapadokiya ne mu Ezhiya ne mu Bhitiniya,

²bakashalugwa ngozibila mbeli kwe Ndzimu Tate, bakayengemadziwa nge Meya yakayengemala, kuhwa Jesu Kirisiti kuti munyasiwe nge malopa awe: Ngoni ne kunyalala ngakuwande pakati kwenyu.

³Ngakukudziwe Ndzimu kakale bali Tate ba She wedu Jesu Kirisiti! Nge ngoni dzabo hwulu, takazwagwa butshwa mu kugalabgwe kunotjila, nge kumusiwa kwa Jesu Kirisiti mu bafi,

⁴ngekugala thaka tjisingalobe, tjisina shambgwa, kakale tjisingafubale, tjamakabigigwa kudzimu,

⁵imwi bavikiligwa nge masimba e Ndzimu, nge bugalimoyo kuyitila jidzo lakalindila zumbunugwa mu nsi we bupelo.

⁶Shathani muna ikoku, nenguba mu nsi uno mungadziyila kushomanana nge ndiko dzakasiyana siyana,

⁷kuti ndizo malebeswa e bugalimoyo gwenyu guna themba inopinda ye golide inoti nenguba iloba, koga inolikiwa nge moto, sa ikokobo bugalimoyo gwenyu gungabe mbhayilo mu kukudza ne kumilidzila pezhugwi ne kutetiwa mu kuzumbunugwa kwa Jesu Kirisiti.

⁸Nenguba musakambona, muna ludo munli, nenguba musingambone sangwenu mogalamoyo munli, mushatha kunotjenamisa, kukulu kwazo.

⁹Moshatha ngobe muamutjila mbuzilo ye bugalimoyo gwenyu, ilo jidzo lenyu.

¹⁰Balebesambeli bakaleba ngekwe ngoni dzakabe dzowobe dzenyu, bakashakisisa kakale bakabhuzwisisa ngekwe jidzo ileli.

¹¹Bakabhuzwisisa kuti kowobe kwakatini kene nsi upi unotjenesiwa nge meya ya Kirisiti imubali, ha ilebesambeli ngekwe kudziyidziwa kwa Kirisiti nenge kukudziwa kunowotobela.

¹²Bakazumbunuligwa kuti bakabe basingazwithamile, koga bakabe bethamila imwi, mu zwithu izwezwi zwamunobudziwa misi ino ndi ibabo bakasumikila ndebo mbuya kumuli nge Meya yakayengemala yakatumwa idwa kudzimu, ili izo zwithu batumwa be kudzimu zwabagala beshaka kubona.

¹³Ndizo, lulwamisani njalakang'wa dzenyu kushinga, muzwibhate. Kugalabgwe kwenyu ngakube mu ngoni dzinozha kumuli mu kuzumbunugwa kwa Jesu Kirisiti.

¹⁴Se bana banohwa, musitjayendidzane ne njemulo dzinodwa mu kushaya luzibo kwenyu kwa ntolo.

¹⁵Koga, sa iye wakamudana ali n'yengemali, ibeni bayengemali namwibo, mu tjimwe ne tjimwe tjamunothama;

¹⁶sekwa kwakakwagwa, kuyi “Yengemalani, nge kuti imi ndakayengemala.”

¹⁷Ha mudana muti Tate bedu, ibo banosumikilisa mmwe ne mmwe nge mishingo iye kuzhe kwe shalaulo, mutjilile mu kutja Ndzimu mu misi yose ye butaya gwenyu mu shango.

¹⁸Moziba kuti makadzutunugwa mu mipanga isina nshingo yamakadiyiwa ndi botate benyu. Amuzodzutunugwa nge zwithu zwinoloba se siliva ne golide,

¹⁹koga makadzutunugwa nge malopa anodika kwazo a Kirisiti, sa iyawaje e pkhwizana isina bulema kene tjifo.

²⁰Wakagala abigigwa nshingo iwoyu shango isathu ikabambiwa, koga kazumbunugwa mu bupelo gwe misi nge kwenyu.

²¹Makagalamoyo mu Ndzimu ndiye, iwo wakammusa mu bafi ukampa gudzo, ndizo bugalimoyo ne kugalabgwe kwenyu zwimu Ndzimu.

²²Sekwa makatjenapadza meya dzenyu nge kuhwa malebeswa, kuti ndizo mube nge ludo gwakalulwama mu zwikamu, danani nge malebeswa nge moyo yenyu yose.

²³Makazwagwa butshwa, kusi nge mbewu ye nyama inobola, koga nge mbewu isingabole, ilo dama linotjila kakale ligelile tjose le Ndzimu.

²⁴Ngoti kwakakwagwa kuyi, “Bathu bose banonga bushwa, nenge bubuya gwabo gonga luba le shango. Bushwa goswabiswa nge zhuba, ngono luba likawa,

²⁵koga dama la She ligele nge kusingapele tjose.” Dama ilelo i ndebo mbuya yamakasumikiligwa.