Read Kalanga 1 Pita 3 Bible Online

1 Pita 3 - Kalanga bible

1 Pita 3

¹Sa ikoko namwibo bakadzi, muzwiyise pasi kwe balume benyu, kuti ndizo bamwe, nenguba basingagalemoyo mu dama, bangawongiwa nge mazwiibhato e bakadzi babo kuzhe kwe dama,

²ha bebona bubuyanana ne kuteta mu mazwiibhato enyu.

³Kuzwinakisa kwenyu ngakusibe kuzwinakisa kwa kuzhe, kunolukiwa mavudzi kuzwinakisiwa nge golide nenge kuambala zwiambalo zwakanaka,

⁴koga kunaka kwenyu ngakube kwe tjamukati ne kusingalobe kwe bubuya gwakalulwama gwe kudzikama kwe meya, iyo inodika kwazo mu mesho e Ndzimu.

⁵Ntolo, bakadzi bakayengemala, bakabe begalabgwe mu Ndzimu bakabe bezwinakisa nge kuzwiyisa pasi kwe balume babo,

⁶sa Sara akabe ehwa Abhurahama, en'dana eti She. Ngono ngwenu mu bana babe ha mushinga ndulamo, kusina tjamunoletja tjikamutjisa.

⁷Sa ikoko namwibo balume, galani ne bakadzi benyu nge kuhwisisa muziba kuti nkadzi iye wakabumbiwa asina matatabuko. Mubatete ngobe mu bagali thaka mose be butjilo gunozha nge ngoni. Kuti ndizo mitembezelo yenyu kushaye tjayidzibilidza.

⁸Tjebupelo, mose bhatanani mu meya ne mu kuhwilana zogwadza ne kudana se zwikamu, mube ne moyo wakanaka ne njalakang'wa dzina kuzwiyisa pasi.

⁹Musibgwilizile bubi nge bubi, kene kutuka nge kutuka. Koga bumo gwa ikoko kombolelani, nge kuti nditjo tjamakadanigwa, kuti ndizo muwane makombolelo.

¹⁰Ngoti, “Iye unoda butjilo ne kubona mazhuba akalulwama, ngaaduse lulimi gugwe mu bubi, ne nlomo uwe usilebe butjebeli.

¹¹Ngaashanduke mu bubi, ashinge ndulamo, ngaashake mbakiso aitizhilile.

¹²Ngoti mesho a She amu balulwami, kakale banohwa mitembezelo yabo koga She banofupatila ibabo banoshinga mbipo.”

¹³Ndiani ungakuhwisa zogwadza, ha mutukutilila tjakalulwama kene?

¹⁴Koga nenguba mungadziyidzigwa ndulamo, maka kombolegwa. Musitje nge kwabo, kene mukadziyidzika,

¹⁵koga mu mimoyo yenyu, yengemadzani Kirisiti sa She. Mugale makazwilulwamisila kudabila mmwe ne mmwe unowobe emubhuzwa ngekwe kugalabgwe ku mu muli, mukuthame nge bunyolo nenge kuteta.

¹⁶Mube babuyanana mu hana dzenyu, kuti ndizo ibabo banomutukila mazwiibhato enyu mabuyanana muna Kirisiti, babhakhwe nge shoni.

¹⁷Koyita kudziyidzigwa ndulamo, ha kuli kuda kwe Ndzimu, pana kudziyidzigwa mishingo mibi,

¹⁸ngobe Kirisiti wakafila zwibi zwedu tose kang'ompela, nlulwami efila basakalulwama, kuti atiyise ku Ndzimu, kabulawa mu tjinyama, koga kamusiwa mu Meya,

¹⁹yakayenda ikanosumikilila meya imu busungwa,

²⁰iyo yakati ntolo ikasihwe, Ndzimu pawakabe wakalinda nge moyonlefu mu nsi wa Nuwa, mu kubakiwa kwe ikepe; kwakati bathu bashomanana, bali zhanakadzi bakatjidziwa nge vula.

²¹Etji tjakabe tjili ifano tje kudubikiwa tjinomutjidza ngwenu, kusi nge kudusa shambgwa imu mbili, koga kuli kumbila hana mbuyanana ku Ndzimu jidzo nge kumuka kwa Jesu Kirisiti

²²iye wakayenda kudzimu, kakale watjibe ku luboko gwe luji gwe Ndzimu ne batumwa be kudzimu ne batungamili ne bana masimba, bose banhwa.