Read Kalanga 2 Pita 1 Bible Online

2 Pita 1 - Kalanga bible

2 Pita 1

¹Ndimi Simoni Pita, nlanda kakale ndili ntumwa* wa Jesu Kirisiti. Kuna ibabo bakaamutjila bugalimoyo gunolizana ne gwedu, mu ndulamo ye Ndzimu wedu ne Ntjidzi wedu Jesu Kirisiti:

²Dzene tshene ngoni ne kunyalala kungamuwandila mu luzibo gwenyu ngekwe Ndzimu ne ngekwa Jesu She wedu.

³Simba le buyengemali gugwe lakatipa zwithu zose zwatinosheta mu butjilo ne bundzimu, nge luzibo gwedu ngekwa iye wakatidana nge gudzo lile nenge kululwama kukwe.

⁴Nge zwithu izwezwi wakatipa kugalabgwe kukwe kukulu, kuti nge zwithu izwezwi, mutizhe mbhatsha dze bubi gumu shango gwe nyota ye kutjinya, ngono mube ne gobe mu zwithu zwakayengemala.

⁵Ngekwa iko ikoku, gwisani nge matatabuko wose kupapha bugalimoyo gwenyu nge kuthama zwakalulwama, muna zwakalulwama paphani luzibo.

⁶Mu luzibo paphani kuzwidziba, mukuzwidziba paphani kusimisila, mukusimisila paphani bundzimu,

⁷mu bundzimu paphani kuhwanana ne zwikamu, mu hwanano ye zwikamu paphani nge ludo.

⁸Ngobe zwithu izwezwi ha zwili zwenyu kakale zwakawanda, zowomuthama kuti musibe simbe mu luzibo ngekwa She wedu Jesu Kirisiti.

⁹Iye unosheta zwithu izwezwi unobonela pejo, i bhofu, kakale wakakangang'wa kuti wakasukwa mu zwibi zwizwe zwa ntolo.

¹⁰Ndizoke zwikamu, mutukutilile kusimisa kudang'wa kwenyu ne kushalugwa, ngobe ha muthama sa ikoku, amutowokong'wa ngodwilila.

¹¹Ngono mowoamutjigwa kwakanaka mu kungina mu bushe gusingapele gwa She wedu, kakale Ntjidzi wedu Jesu Kirisiti.

¹²Ndizo ndakazwimisila kumukumbuludza misi yose ngekwe zwithu zwakajali, nenguba muzwiziba kakale mushinga nge buzhalo malebeswa amunawo.

¹³Ndoduma nditi kwakalulwama kuti ha nditjatjila ndimuzunguze, ndimualakanise,

¹⁴se ndiziba kuti tjibaka tje kolomogwa kwe nshasha wangu tjabe pejo, sekwa She wedu Jesu Kirisiti akandilakidza.

¹⁵Koga ndowothama kose kwandingatubula kuti nditi ndanyalala, mualakane ngekwe zwithu izwezwi.

¹⁶Atizotobelela ngano dzakathamiwa nge butjenjedu gwe bathu, ha timuzibisa ngekwe masimba ne kuzha kwa She wedu Jesu Kirisiti, koga iswi nge kwedu takabona nge mesho edu bukulu gwe bushe gugwe.

¹⁷Ngobe wakati eamutjila kutetiwa ne gudzo kudwa ku Ndzimu Tate. Hwi le Ndzimu Masimbawose lakazha kunli liti, “Oyu ndiye Nkololo wangu unodika, ndoshatha kwazo nge kukwe!”

¹⁸Iswi nge kwedu takahwa hwi ileli lidwa kudzimu, ngobe takabe ti naye mu dombo lakayengemala.

¹⁹Ndizo tina malebeswa akapelela mu matama akalebgwa nge balebesambeli. Mowobe muthama zubuyanana kuhwilila matama iyawa, kowobe kunga ha mubhatidza luvone mu zhalima. Dwililani kuswikila mazhokuyedza na masasi tjipenya mu mimoyo yenyu.

²⁰Kutanga zibani kuti akuna bulebesambeli gwe hwalo dze Ndzimu gunozwitjenesegwa nge nthu,

²¹nge kuti akuna dama le bulebesambeli lakatongo bhuda nge kuda kwe nthu, koga bathu bakabe belebeleka matama anodwa ku Ndzimu, belaugwa nge Meya yakayengemala misi yose.