Read Kalanga 2 Pita 3 Bible Online

2 Pita 3 - Kalanga bible

2 Pita 3

¹Badiwa, ogu lukwalo gwe bubili gwanda mu kwalila, mu hwalo idzedzi dzandakamukwalila ndakagwisa kumukumbuludza kuti ndimuse njalakang'wa dzenyu mbuyanana.

²Kuti mualakane matama akalebgwa ntolo nge balebesambeli bakayengemala nenge ndayo yakadwa kuna She kakale ali Ntjidzi, yakazha nge batumwa babe kumuli.

³Tje kutanga makafanila hwisisa kuti mu mazhuba e bupelo badadi banowozha bedada kakale bakasala shule njemulo dzabo dzakabipa,

⁴bemudwa beti, “Wakamugadzabgwe kuti unowozha, ngono ungayi? Botate bedu tjinga kwabakafa, tjimwe ne tjimwe tjigele sekwa tjakabe tjili itjo kudwa ku budwilo gwe shango.”

⁵Banokangang'wa mwaza kuti, ntolo kwazo Ndzimu wakadusa dama, ngono kudzimu kukabumbika. Shango yakabumbiwa kudwa mu vula, ibumbiwa nge vula,

⁶ngono ndinge vula ye nkubila yakanyeledza ikalobesa shango ye kutanga.

⁷Nge dama ilelo zwalo, kudzimu kwa ngwenu ne shango ya ngwenu zwakabiganyidzigwa moto. Zwakabiganyidziwa kuswikila zhuba le kusumikilisiwa nenge kulobesiwa kwe basinga tjile nge kunoshakwa nge Ndzimu.

⁸Koga musitongo kangang'wa tjing'ompela etji, badiwa! Kuna She zhuba ling'ompela lofanana ne makole ali tjiwulu (1 000), na iwo makole ali tjiwulu anofanana ne zhuba ling'ompela.

⁹She abatononoka mu kushinga tjabakagadzabgwe se kunokumbula bamwe. Koga bana moyonlefu nge kwenyu, ngoti abatoshaka kuti kube ne mmwe unolobesiwa, koga banoyemula kuti bose bashanduke mu matjinyo abo.

¹⁰Koga zhuba la She lowozha se mbava, ngono zhuzhugwi kowonyelela nge zhoba hwulu ne lubumbo gose gwe zhuzhugwi gowokolomodziwa nge moto, ngono ne shango ne tjimwe ne tjimwe tjimuili tjowopisiwa.

¹¹Ngono se zwithu zose izwezwi zowonyeledziwa nge zila yakajali, imwi makafanila mube bathu bakatini? Makafanila tjila butjilo gwe buyengemali ne bundzimu,

¹²makalindila zhuba le Ndzimu kakale muthama kuti lizhe tjinyolotjo. Zhuba ilelo linowothama kuti zhuzhugwi kupisiwe kakale kunyeledziwe nenge lubumbo gose gwe zhuzhugwi gukolomodziwe nge moto.

¹³Koga ngekwe kugadzabgwe kukwe takamilila kudzimu kutshwa ne shango tshwa, iko kunowobe kuli nzi we ndulamo.

¹⁴Ndizo badiwa, muti se makamilila zhuba ilelo, tukutililani kuti muwang'we muna kunyalala musina tjibadzi tje bubi.

¹⁵Zibani kuti bumoyonlefu gwa She i jidzo koga sekwa makakwaligwa ndi Paulo, ikamu tjedu tjinodika, eshingisa butjenjedu gwaakapiwa,

¹⁶eleba sa ikoku mu hwalo dzose dzaanokwala ngekwako. Kuna zwithu zwakasima kuhwisisika, mu hwalo dzidze zwinoyita kuti bathu basina luzibo ne bana njalakang'wa dzisakagadzikana bakazwitjenesa, nge zila ipoga sekwa banothama nge hwalo dzimwe dze Ndzimu ngono bakaloba.

¹⁷Koga imwi badiwa, moziba kale ikoku. Muzwitjengete kuti ndizo musitongokwebegwa mu zila ye jinyo, ye bathu basina nlayo mudwa muletja kugadzikana kwenyu.

¹⁸Koga kulani mu ngoni ne mu luzibo gwa She wedu Ntjidzi Jesu Kirisiti. Ngaakudziwe ngwenu nenge kusingapele! Ngakujalo.