Read Kalanga 1 Johani 1 Bible Online

1 Johani 1 - Kalanga bible

1 Johani 1

¹Tomuzibisa ngekwe dama le butjilo, ilo lakabe lilipo mu kutangisa, ilo latakahwa, latakabona nge mesho edu, latakalinga tikalibhata nge maboko edu, ilo Dama le butjilo.

²Butjilo igogu gwakazumbunugwa, ngono tikagubona, totendeka nge kwago, timusumikilila ngekwe butjilo gusingapele gwakabe guna Tate ngono tikaguzumbunuligwa.

³Tjatakabona kakale tikatjihwa nditjo tjatinomusumikilila, kuti ndizo mube bang'ompela naswi mu hwanano yatinayo na Tate ne Nkololo wabo Jesu Kirisiti.

⁴Tokwala sa ikoku kuti ndizo tishathe nge buzhalo.

⁵Eyi ndiyo ndailo yatakahwa kuna Jesu, ngono tomubudza titi Ndzimu tjedza, muuli akuna zhalima ndodwa.

⁶Ha titi tina hwanano nawo koga tidwilila nge kutjilila mu zhalima, tobe tinyepa tisingatjilile mu malebeswa.

⁷Koga ha titjilila mu tjedza, sa iwo uli mu tjedza, tobe tina hwanano pakati kwedu, ngono malopa e Nkololo wawo Jesu anotisuka jinyo lose.

⁸Ha titi atina jinyo, tozwitjengedza, ngono akuna malebeswa mutili.

⁹Ha tileba matjinyo edu, Ndzimu unogalikamoyo kakale wakalulwama ngono unowotizwiibhatigwa matjinyo edu ukatisuka kusalulwama kose.

¹⁰Ha titi atizotjinya tobe tiuthama nnyepi, ngono dama lawo lobe lisi mutili.