Read Kalanga 1 Johani 2 Bible Online

1 Johani 2 - Kalanga bible

1 Johani 2

¹Bana bangu, ndomukwalila lukwalo igogu kuti ndizo musitjinye. Koga ha mmwe wenyu etjinya, tina nlebelekeli wedu kuna Tate, iye Jesu Kirisiti we nlulwami,

²ndiye tjibhayilo tjinodusa matjinyo edu. Asi edu koga, ne matjinyo e shango yose.

³Ha tilondolodza milayo iye, ndiko sekwa tingabe ne luzibo guzhele kuti tonziba.

⁴Iye unoti “Ndonziba,” koga asingalondolodze milayo iye, nnyepi, ngono malebeswa ate ali munli.

⁵Koga iye unolondolodza dama lile, munli ludo gwe Ndzimu guyapo ne buzhalo. Tingaduma kuti timunli, ha titjila sa woku:

⁶Iye unozwidwa eti unotjilila munli wakafanila tjila nge zila yaakatjilabo ndiyo.

⁷Badiwa, anditomukwalila mmwe nlayo ntshwa, koga ndomukwalila ngekwe nlayo nkulukugwi wamakabe munawo kudwa mu kutangisa. Nlayo iwoyu nkulukugwi ndilo dama lamakahwa.

⁸Nenguba ndimukwalila nlayo ntshwa, malebeswa awo anobong'wa munli ne mu muli, ngobe zhalima lopinda, ngono tjedza tje malebeswa tjotjipenya kale.

⁹Iye unoti umu tjedza koga ebenga ikamu tjitje, unobe atjimu zhalima zwe.

¹⁰Iye unoda ikamu tjitje ugele mu tjedza, ngono mu tjedza akuna tjingathama kuti utjinye.

¹¹Koga iye unobenga ikamu tjitje umu zhalima kakale unoyenda mu zhalima, ngono aatoziba kwaanoyenda, ngobe zhalima lakampofupadza.

¹²Bana bangu, ndomukwalila ngobe matjinyo enyu makaazwiibhatigwa ngekwe zina lile.

¹³Botate, ndamukwalila ngobe monziba iye unodwa mu kutangisa. Imwi bazhuzha, ndamukwalila ngobe makakunda mbiimbi.

¹⁴Botate, ndamukwalila ngobe monziba iye wakabe alipo kudwa mu kutangisa. Bazhuzha, ndamukwalila ngobe makasima nenge dama le Ndzimu logala mu muli, kakale makakunda mbiimbi.

¹⁵Muside shango kene tjimwe tje shango. Ha mmwe eda shango, aatoda Tate.

¹⁶Ngoti tjimwe ne tjimwe tjimu shango; njemulo dze mbili ne njemulo dze mesho ne kuzwida mubutjilo, akutodwa kuna Tate, koga ngekwe shango.

¹⁷Shango inopela ne njemulo dzayo, koga iye unothama kuda kwe Ndzimu unotjilila tjose.

¹⁸Bana bangu, kwabe tjibaka tje bupelo! Makahwa kuti tjita tja Kirisiti tjaswika; ngono ngwenu zwita zwa Kirisiti zwinji zwabe yapo kale, ndizo ngekwa ikoku toziba kuti kwabe nsi we bupelo.

¹⁹Ibaba bathu tjoselele ate bali bamwe bedu, ndizo wali bakatisiya; ha bakabe bali bamwe bedu, banobe bakagala naswi. Koga bakayenda kuti kube patjena kuti akuna wabo tjose wakabe ali wedu.

²⁰Koga imwi makazhodziwa nge Wakayengemala, ngono mose muna luzibo.

²¹Ndomukwalila, kusi kuti ngobe musingazibe malebeswa; koga ngobe muaziba, nge kuti mozibabo kuti akuna manyepkhwa anodwa mu malebeswa.

²²Nnyepi ndiani ngono, aaisi mmwe ne mmwe unolandula kuti Jesu ndi Kirisiti. Nthu wakajalo tjita tja Kirisiti, unolandula bose Tate ne Nkololo.

²³Ngobe iye unolandula Nkololo, na Tate unobalandulabo; iye unoleba kuti unoduma mu Nkololo, na Tate unabo.

²⁴Thamani kuti tjamakahwa kudwa mu kutangisa tjigale mu muli. Ha tjamakahwa tjigala mu muli namwibo mowogala mu Nkololo ne muna Tate.

²⁵Ngono ikoku ndiko kwatakagadziwabgwe ndiye, butjilo gusingapele.

²⁶Ndamukwalila ikoku ngekwa ibabo banogwisa kumudzimidza.

²⁷Koga kuzhodziwa kwamakazhodziwa ndiye kumumuli, ndizo amutosheta mmwe kumudiya. Se kuzhodza kukwe kumudiya ngekwe tjimwe ne tjimwe, kakale ili lebeswa lisina manyepkhwa, koga sekwa kwakamudiya galani munli.

²⁸Ee, bana bangu, ibeni bang'ompela naye, kuti ndizo ati ezha tisime, ngono tisibhakhwe nge shoni ha ezha.

²⁹Ha muziba kuti wakalulwama, mungazibabo kuti mmwe ne mmwe unothama tjakalulwama mwana uwe.