Read Kalanga 1 Johani 3 Bible Online

1 Johani 3 - Kalanga bible

1 Johani 3

¹Bonani kuti Tate bakatida nge ludo gungapani, kwatinodang'wa bana be Ndzimu! Koga malebeswa tibana bawo. Shango aitotiziba, ngobe aizotongo ziba Ndzimu.

²Badiwa, tibana be Ndzimu sangwenu. Akuthu kukatjena kuti towobeni, koga toziba kuti nsi waanozha towobe tinga iye, nge kuti towombona ali sekwa agele.

³Mmwe ne mmwe unogalabgwe munli nge zila iyeyi unozwitjenapadza ebe mbuyanana sa iye ali mbuyanana.

⁴Mmwe ne mmwe unotjinya unotjuluka nlayo; ngobe jinyo hwutjuluka nlayo.

⁵Moziba kuti Jesu wakazhila kudusa matjinyo edu, ngono iye nge kukwe aana jinyo.

⁶Akuna unontjilila unodwilila ngotjinya. Iye unodwilila nge kutjinya aazombona kene kuli kunziba.

⁷Bana bangu, kushaye wamutjebela. Iye unothama ndulamo wakalulwama koga sa Kirisiti akalulwama.

⁸Iye unotjinya nge wa Satani, ngobe Satani wakatjinya kudwa mu kutangisa. Nkololo we Ndzimu wakazhila kuwolobesa mishingo ya Satani.

⁹Akuna mwana we Ndzimu unotjinya, ngobe mbumbiko ye Ndzimu igele munli, ngono aangatjinye ngobe mwana we Ndzimu.

¹⁰Woku ndiko sekwa tinoziba bana be Ndzimu ne bana ba Satani; Iye unothama tjisakalulwama ate ali we Ndzimu, naiye usingade ikamu tjitje.

¹¹Ndebeleko yamakahwa mu kutangisa, nge inoti tidane.

¹²Tisitongonga Kaini wakabe ali we mbiimbi ngono kabulaya nnung'una uwe. Wakabe embulayilani? Wakabe embulaya ngobe mishingo iye yakabe ili mibi, ye nnung'una uwe yakalulwama.

¹³Musitongo tjenama zwikamu, ha shango imubenga.

¹⁴Toziba kuti takabhuda mu lufu tikangina mu butjilo, ngobe toda zwikamu zwedu. Iye usina ludo utjimu lufu.

¹⁵Iye unobenga ikamu tjitje mbulayi, ngono moziba kuti akuna mbulayi una butjilo gusingapele.

¹⁶Toziba kuti ludo ini nge zila eyi; Kirisiti wakatifila. Ndizo takafanila, naswibo kufila zwikamu zwedu.

¹⁷Iye unobe ana thundu ye shango, eti ebona ikamu tjitje tjishaka bhatsho, kalamba kutjibhatsha, ludo gwe Ndzimu gungagala munli tjini?

¹⁸Bana bangu, ngatisilebelekeni ngekwe ludo koga, ngatidane nge malebeswa muna tjatinothama.

¹⁹Ha tina ludo gwakajali, ndiko kwatingaziba kuti timu zila ye malebeswa, ngono towosima ha tili mile mbeli kwe Ndzimu.

²⁰Ha kuli kuti mimoyo yedu inotitilika nlandu, Ndzimu nkulu paili, kakale unoziba tjimwe ne tjimwe.

²¹Badiwa, ha mimoyo yedu isingatitilike nlandu, takasima mbeli kwe Ndzimu.

²²Toamutjila ku uli kene ilini tjatinokumbila, ngobe tolondolodza milayo yawo kakale mishingo yedu inoushathisa.

²³Ngono nlayo wawo unoti, tigalemoyo mu zina le Nkololo wawo Jesu Kirisiti kakale tidane koga sekwa wakatidwa.

²⁴Bose banolondolodza milayo yawo bang'ompela nawo, na iwo nng'ompela nabo. Toziba kuti nng'ompela naswi, tizibisiwa nge Meya yawakatipa.