Read Kalanga 1 Johani 4 Bible Online

1 Johani 4 - Kalanga bible

1 Johani 4

¹Badiwa, musitongo galamoyo Meya imwe ne imwe, koga mubone kene meya iyeyo inodwa ku Ndzimu, ngobe balebesambeli banjinji be manyepkhwa bakaandama mu shango.

²Mungabona kuti Meya ndeye Ndzimu sahwoku; Meya imwe ne imwe inotendeka kuti Jesu Kirisiti wakazha ali mu nyama, ndeye Ndzimu.

³Koga meya imwe ne imwe isingatendeke ngekwa Jesu ate ili ye Ndzimu. Eyo ndiyo meya ye tjita tja Kirisiti, iyo yamakahwa kuti yaswika, ngono ngwenu yatjibe mu shango.

⁴Bana bangu, mube Ndzimu, makakunda zwita zwa Kirisiti, ngobe Meya igele mu muli ina masimba kupinda imu shango.

⁵Nge be shango, ndizo tjabanoleba nge tje shango, ngono shango inobahwilila.

⁶Iswi ti be Ndzimu. Iye unoziba Ndzimu unotihwilila, ngono iye usi we Ndzimu aatotihwilila. Ngekwa ikoku toziba kuthubukanya meya ye malebeswa muna meya ye manyepkhwa.

⁷Badiwa, ngatidaneni, nge kuti ludo ngegwe Ndzimu, ngono iye una ludo mwana we Ndzimu kakale unoziba Ndzimu.

⁸Iye usina ludo aatoziba Ndzimu, ngobe Ndzimu ludo.

⁹Ludo gwe Ndzimu takaguzumbunuligwa nge zila eyi, Ndzimu wakatuma Nkololo wawo uyega mu shango, kuti ndizo titjile ndiye.

¹⁰Ludo gwakajali, ate kuli kuti ndiswi takada Ndzimu, koga Ndzimu ndiwo wakatida ukabuya ukatuma Nkololo wawo kuti awobe tjibhayilo tjinodusa matjinyo edu.

¹¹Badiwa, ha Ndzimu wakatida kwakajalo, naswibo takafanila kudana.

¹²Akuna nthu wakatongo bona Ndzimu. Ha tidana, Ndzimu ugele mutili nenge ludo gwawo gwakapelela mutili.

¹³Toziba kuti tigele mu Ndzimu na iwo ugele mutili, ngobe wakatipa Meya yawo.

¹⁴Takabona kakale totendeka kuti Tate bakatuma Nkololo wabo ali Ntjidzi we shango.

¹⁵Iye unoleba kuti Jesu Nkololo we Ndzimu, Ndzimu ugele munli, na iye ugele mu Ndzimu.

¹⁶Ndizo toziba kakale togalamoyo ludo gwe Ndzimu gwaunotida ndigo. Ndzimu ludo, ngono iye ugele mu ludo ugele mu Ndzimu, ne Ndzimu ugele munli.

¹⁷Ludo gwakazhadzisika mutili sahwoku: kuti tisime mu zhuba le kusumikilisiwa, ngobe sekwa agele, naswibo takajalobo mu shango iyeyi.

¹⁸Akuna lutjo mu ludo, koga ludo gwakapelela gotata lutjo gose. Lutjo goyendidzana ne shamu, ngono iye unotja aazopelela mu ludo.

¹⁹Todana ngobe Ndzimu wakatida kutanga.

²⁰Iye unoti “Ndoda Ndzimu” koga ebenga ikamu tjitje, nnyepi. Nge kuti iye usingade ikamu tjitje tjaanobona, aangade Ndzimu waasakatongo bona.

²¹Kakale wakatipa nlayo iwoyu watakawana munli unoti, “Iye unoda Ndzimu wakafanila kuda ikamu tjitjebo.”