Read Kalanga 1 Johani 5 Bible Online

1 Johani 5 - Kalanga bible

1 Johani 5

¹Mmwe ne mmwe unogalamoyo kuti Jesu ndi Kirisiti, mwana we Ndzimu, ngono iye unoda nzwadzi unoda ne mwana uwe.

²Tingaziba kuti toda bana be Ndzimu ha tida Ndzimu, kakale tilondolodza milayo yawo.

³Ludo gwe Ndzimu ndi wogu, kuti tilondolodze milayo yawo. Ngono milayo ye Ndzimu aitolema.

⁴Mmwe ne mmwe unozwagwa nge Ndzimu unokunda shango. Kukunda shango ndi woku, bugalimoyo gwedu.

⁵Unokunda shango ndiupi? Ndiye unogalamoyo kuti Jesu Nkololo we Ndzimu kene?

⁶Jesu Kirisiti iye wakazha nge vula ne malopa, aazozha nge vula koga, wakazha nge vula ne malopa. Meya yakayengemala ndiyo inotendeka nge kwako, ngobe Meya i lebeswa.

⁷Kuna batendeki batatu,

⁸Meya yakayengemala ne vula ne malopa, butatu igogu godumana.

⁹Ha tiamutjila butendeki gwe bathu, butendeki gwe Ndzimu igo gopinda, ngobe ogu ndigo butendeki gwe Ndzimu. Iwo nge kwawo unotendekela Nkololo wawo.

¹⁰Iye unogalamoyo mu Nkololo we Ndzimu, una butendeki mukati kukwe. Iye usingagalemoyo mu Ndzimu, unobe eunyepesa, ngobe aazogalamoyo mu butendeki gwe Ndzimu, ngekwe Nkololo wawo.

¹¹Butendeki igogu ndi ogu, Ndzimu wakatipa butjilo gusingapele, ngono butjilo igogu gumu Nkololo wawo.

¹²Iye una Nkololo, una butjilo igogu. Iye usina Nkololo we Ndzimu aanago.

¹³Ndokwalila imwi munogalamoyo mu zina le Nkololo we Ndzimu, kuti ndizo muzibe kuti muna butjilo gusingapele.

¹⁴Oku ndiko kusima kwedu mu Ndzimu, kuti tjimwe ne tjimwe tjatinokumbila nge kuda kwawo, unotihwa.

¹⁵Ngono ha tiziba kuti unotihwa mutjimwe ne tjimwe tjatinokumbila, tobe nge luzibo gwe kuti taamutjila zwatakumbila.

¹⁶Iye unobona ikamu tjitje tjishinga jinyo lisingabulaye, unowotjikumbilila ngoni mu Ndzimu, ngono Ndzimu unowopa ikamu itjetji butjilo, ndodwa ibabo banothama jinyo lisinga bulaye. Kuna jinyo linobulaya. Anditodwa kuti kube ne unolitembezelela.

¹⁷Tjimwe ne tjimwe tjisakalulwama i jinyo, koga kuna jinyo lisingabulaye.

¹⁸Toziba kuti mwana mmwe ne mmwe we Ndzimu aatodwilila nge kutjinya, koga Nkololo we Ndzimu unontjengeta, ngono mbiimbi aatonkuma.

¹⁹Toziba kuti tibe Ndzimu koga shango yose imu simba le mbiimbi.

²⁰Toziba kuti Nkololo we Ndzimu wakazha, ngono wakathama kuti tihwisise, kuti tizibe Ndzimu we malebeswa. Timuuli iwo we malebeswa, mu Nkololo wawo Jesu Kirisiti. Oyu ndiwo Ndzimu we malebeswa nenge butjilo gusingapele.

²¹Bana bangu, bonani kuti mube kutjena nge kunamata midzimu.