Read Kalanga Basumikilisi 1 Bible Online

Basumikilisi 1 - Kalanga bible

Basumikilisi 1

¹Kwakati shule kwe lufu gwa Joshuwa, bathu be Iziraela bakabhuzwa Yahwe beti, “Ndiyani unowomilika kutanga pakati kwedu kanogwa ne Bakanana kene?”

²Yahwe bakashandula beti, “Ngakumilike Juda, bonani, ndalonga shango mu maboko awe.”

³Juda kadwa Simiyoni nkulu uwe kati, “Ngatiyende tose ku shango yandakakobegwa kuti tinogwa ne Bakanana, namibo ndowoyenda nawe ku shango yawakakobegwa.” Ndizo Simiyoni kayenda naye.

⁴Kwakati Juda emilika, Yahwe bakalonga Bakanana ne Baperizi mu maboko abo, ngono bakabulaya balume bali zwiwulu zwili gumi (10 000) ku Bhezeki.

⁵Bakawana Adonibhezeki ku Bhezeki ngono bakagwisana naye, bakakunda Bakanana ne Baperizi.

⁶Adonibhezeki katizha ngono bakantatamila bakambhata, bakathubula zwinyala zwizwe zwikulu zwe maboko ne zwe makumbo.

⁷Adonibhezeki kabe eti, “Bomambo bali makumi ali kutendeka (70) bakathubugwa zwinyala zwikulu zwe maboko ne zwe makumbo bakabe benunga mamburumburu kusi kwe tafuli yangu. Ngwenu Ndzimu bandibgwilizila nge zwandakathama kubali.” Bakan'yisa ku Jerusalema kafila ko.

⁸Balume be Juda bakagwisana ne Jerusalema ngono bakayitapa, bakabulaya bathu nge thumo, bakapisa nzi nkulu nge moto.

⁹Shule kwa ipapo balume be Juda bakanogwisana ne Bakanana bakabe begala mu shango ye matuthu, ku Negebu ne mu shango itjapasi.

¹⁰Bajuta bakanonginilila Bakanana bakabe begala mu Heburoni yakabe idang'wa Kiriyatiaribha, bakakunda Sheshayi na Ahimani na Talemayi.

¹¹Kudwa ipapo bakanonginilila bagali be Debiri yakabe idang'wa Kiriatiseferi.

¹²Ngono Khalebu kati, “Ndowolobodza nkololokadzi wangu Akasa ku nlume unowogwisana ne Kiriatiseferi kayitapa.”

¹³Ngono Othiniyeli nkololo wa Kenazi, nnung'una wa Khalebu kayitapa, ndizo Khalebu kanlobodza nkololokadzi uwe Akasa.

¹⁴Kwakati Akasa azha kunli, Othiniyeli kankumbila kuti akumbile nnda kuna tate babe, wakati edeluka mu donki tjitje, Khalebu kambhuzwa kati, “Kwatini?”

¹⁵Akasa kashandula eti, “Mundipe tjipo, ngoti makandipa shango ye ku burwa, mundipe matshime e vula.”

¹⁶Ngono zwizekugwana zwe N'keni tezwale ba Mushe, zwakayenda ne bathu be Juda kudwa ku nzi nkulu we milala kunoti ku tjilambanyika tje Juda tjimu burwa hwunde ne Aradi, ngono bakanogala ne bathu.

¹⁷Juda kayenda na Simiyoni nkulu uwe, bakakunda Bakanana bakabe begala ku Zefati ngono bakayilobesa. Ndizo zina le nzi nkulu likadang'wa Horima.

¹⁸Juda katapa kose ne Gaza ne mituthu yayo, ne Ashikeloni ne mituthu yayo ne Ekironi ne mituthu yayo.

¹⁹Yahwe bakabebana Juda, katola shango ye matuthu koga kasitate bagali be shango yakawala ngobe bakabebana koloyi dze ngwa dze butale.

²⁰Heburoni ikapiwa Khalebu sekwakaleba Mushe, ngono katata bakololo batatu ba Anaki.

²¹Babhenjamini bakakong'wa tata Bajebusi bakabe begala mu Jerusalema, ndizo Bajebusi bakagala ne bathu be Bhenjamini mu Jerusalema kuswikila nasi.

²²Ludzi gwa Josefa gukanonginilila Bhetele, ngono Yahwe bakabe banabo.

²³Bakati betuma shodzi kunoshola Bhetele yakabe idang'wa Luzi,

²⁴shodzi dzikabona nlume ebhuda mu nzi nkulu ngono dzikandwa dzikati, “Utilakidze panonging'wa mu nzi nkulu ndizo towokubhata zwakanaka.”

²⁵Ngono kabalakidza panonging'wa, ngono bakanginilila nzi nge thumo, koga bakaletja nlume ne bensha uwe bose kuti bayende.

²⁶Ngono nlume kayenda ku shango ye Bahiti ngono kabaka nzi nkulu kautumila zina eti Luzi, ndilo zina lawo na nasi.

²⁷Koga Manase kasitate bagali be Bhetisheani ne mizana yayo kene Taanaki ne mizana yayo, kene bagali be Dori ne mizana yayo kene be Ibeliyamu ne mizana yayo, kene bagali be Megido ne mizana yayo, koga Bakanana bakadwilila bakagala mu shango iyeyo.

²⁸Kwakati Baiziraela batjisima, bakathama Bakanana kuti babashingile koga bakasibatate.

²⁹Baifureimi bakasitate Bakanana bakabe begala mu Gezeri, koga Bakanana bakagala nabo mu Gezeri.

³⁰Na Zebuluni kasitate bagali be Kitironi kene be Nahaloli, koga Bakanana bakagala mu bali, bakabe bashingili.

³¹Asheri kasitate bagali be Akho kene be Sidoni kene be Alabu kene be Akizibi kene be Helibha kene be Afiki kene be Rihobi,

³²koga Baasheri bakagala pakati kwe Bakanana ibo bagali be shango, ngoti abazobatata.

³³Nafutali kasitate bagali be Bhetishemeshi kene be Bhetianati, koga bakagala pakati kwe Bakanana ibo bagali be shango. Ngono bagali be Bhetishemeshi ne be Bhetianati bakabe bashingili babo.

³⁴Baamoni bakasundila Badani shule ku shango ye matuthu, bakasibadumile kuzha ku shango yakawala.

³⁵Baamoni bakadwilila begala mu Hariheresi ne mu Aijaloni ne mu Shaalibimi koga simba la Josefa likabakulila ngono bakabe bashingili babo.

³⁶Ngathu we Baamori wakabe udwa ku Akirabhimi kunoti ku Sela, upindila mbeli.