Read Kalanga Basumikilisi 10 Bible Online

Basumikilisi 10 - Kalanga bible

Basumikilisi 10

¹Kwakati shule kwa Abimeleki kukamuka Tola nkololo wa Puwa, ali nkololo wa Dodo, nlume we Isakari, kusunungula Iziraela. Wakabe egala ku Shamiri mu shango ye matuthu ya Ifureimi.

²Katungamila Iziraela kwe makole ali makumi mabili ana matatu (23). Kadwapo kafa, kabiganyigwa ku Shamiri.

³Shule kukwe kukamuka Jairi we Giliyadi, wakatungamila Iziraela kwe makole ali makumi mabili ana mabili (22).

⁴Wakabe ana bakololo bali makumi matatu (30), bakabe betatha madonki ali makumi matatu (30), bakabe bana mizi ili makumi matatu (30) inodang'wa Havotijairi na nasi, imu shango ye Giliyadi.

⁵Ngono Jairi kafa, kabiganyiwa mu Kamoni.

⁶Ngono bathu be Iziraela bakathama mbipo kakale mu mesho a Yahwe, bakashingila bo Bhaale ne ndzimukadzi Ashera, iyo midzimu ye Siriya ne midzimu ye Sidoni ne midzimu ye Moabu ne midzimu ye Baamoni, ne midzimu ye Bafilisitiya ngono bakasiya Yahwe bakasibashingile.

⁷Bushongola gwa Yahwe gukathutila Baiziraela, ngono bakabatengesa mu maboko e Bafilisitiya ne Baamoni,

⁸ibo bakabadziyidza bakabatshambilidza gole ilelo. Bakatshambilidza bathu bose be Iziraela kwe makole ali gumi lina ali zhanakadzi (18) bakabe bali seli ye Jorodani mu shango ye Baamoni imu Giliyadi.

⁹Baamoni bakatjulukabo Jorodani kunogwa ne Juda ne Bhenjamini ne nsha wa Ifureimi, ngono Iziraela ikabe mu buyendasi bukulu.

¹⁰Bathu be Iziraela bakalilila kuna Yahwe beti, “Takamutjinyila, ngoti takamusiya Ndzimu wedu, ngono tikashingila bo Bhaale.”

¹¹Ngono Yahwe bakadwa bathu be Iziraela bakati, “Apa andizomusunungula mu Baegipiti ne mu Baamori ne mu Baamoni ne mu Bafilisitiya?

¹²Basidoni bo ne Baamaleki ne Baamoni bakamutshambilidza ngono mukalilila kundili ndikamusunungula mu maboko abo.

¹³Koga makandisiya mukashingila midzimu ipoga, ndizo anditjowomutjidza.

¹⁴Yendani munolilila midzimu yamakashalula, ngaimusunungule mu misi ye buyendasi gwenyu.”

¹⁵Ngono bathu be Iziraela bakadwa Yahwe bakati, “Takatjinya, thamani tjamunobona tjakatilulwamila, koga tokumbila muti sunungule ngwenu.”

¹⁶Ndizo bakadusa midzimu ipoga pakati kwabo ngono bakashingila Yahwe, ngono Yahwe bakasitjamililane ne kudziyidziwa kwe Baiziraela.

¹⁷Ipapo Baamoni bakadan'gwa bakakotokela mu Giliyadi, bathu be Iziraela bakakubungana ngono bakakotokela ku Mizipha.

¹⁸Batungamili be bathu be Giliyadi bakabudzana beti, “Iye unowotangisa kunonginilila Baamoni, unowobe iye nsholo we bagali bose be Giliyadi.”