Read Kalanga Basumikilisi 12 Bible Online

Basumikilisi 12 - Kalanga bible

Basumikilisi 12

¹Bathu be Ifureimi bakadana balume babo be ngwa ngono bakatjulukila ku Zafoni ngono bakadwa Jefutha bakati, “Ini wayenda kunogwa ne Baamoni usatidana tikayenda nawe? Towokupisila mu ng'umba nge moto.”

²Ngono Jefutha kabadwa kati, “Imi ne bathu bangu takabe mu ngwa hwulu kwazo ne Baamoni, ndakati ndimudana amuzondisunungula mu maboko abo.

³Ndakati ndibona musingadibhatshe, ndikalonga butjilo gwangu mu mbatsha, ndikatjuluka kunogwa ne Baamoni, ngono Yahwe bakabalonga mu maboko angu. Ngono nasi ini mabuya kugwa nami?”

⁴Ipapo Jefutha kakubunganya balume bose be Giliyadi kagwa ne Baifureimi. Bagiliyadi bakababulaya ngobe Baifureimi bakabe bati, “Imwi Bagiliyadi mu batizhi be Ifureimi ne Manase.”

⁵Bagiliyadi bakatolela Baifureimi maambuko wose e Jorodani, ngono kwakabe kuti mmwe we batizhi be Ifureimi ezha eti, “Imani nditjuluke,” balume be Giliyadi banowobe bembhuzwa beti, “Apa u N'ifureimi kene?” Ha eti, “Aa,”

⁶banowobe bendwa beti, uti, “Shibholeti.” Ngono apa eti, “Sibholeti,” ngoti e konegwa ngo dana zubanana, banombhata be mbulayila pa maambuko e Jorodani. Ngono kukabulawa Baifureimi bali zwiwulu zwili makumi manna ana zwibili (42 000) mu tjibaka itjetjo.

⁷Jefutha wakabe ntungamili we Iziraela kwe makole ali tathatu. Jefutha we Giliyadi kafa, ngono kabiganyigwa mu nzi uwe mu Giliyadi.

⁸Shule kukwe, Ibizani we Bhetelehema katungamila Iziraela.

⁹Wakabe ana bakololo bali makumi matatu (30) ne bakololokadzi bali makumi matatu (30). Kalobodza bakololokadzi babe kuzhe kwe ludzi gugwe, ngono bakololo babe bakalobola Baanadi bali makumi matatu (30) kube bakadzi kudwa ku ludzi gu kuzhe. Izibani wakatungamila Iziraela kwe makole ali tendeka.

¹⁰Kudwapo Izibani kafa ngono kabiganyiwa mu Bhetelehema.

¹¹Shule kukwe, Eloni we N'zibuloni katungamila Iziraela kwe makole ali gumi (10).

¹²Kudwapo Eloni kafa, ngono kabiganyiwa mu Aijaloni mu shango ye Zibuluni.

¹³Shule kukwe, Abhidoni nkololo wa Hileli kudwa ku Piratoni katungamila Iziraela.

¹⁴Wakabe ana bakololo bali makumi manna (40) ne zwizekugwana zwili makumi matatu (30), bakabe tatha madonki ali makumi ali tendeka (70). Wakatungamila Iziraela kwe makole ali zhanakadzi.

¹⁵Kudwapo Abhidoni nkololo wa Hileli kafa, ngono kabiganyigwa ku Piratoni mu Ifureimi, mu shango ye matuthu ye Baamaleki.