Read Kalanga Basumikilisi 13 Bible Online

Basumikilisi 13 - Kalanga bible

Basumikilisi 13

¹Ngono bathu be Iziraela bakathama mbipo kakale mu mesho a Yahwe, ngono Yahwe bakabalonga mu maboko e Bafilisitiya kwe makole ali makumi manna (40).

²Kwakabe kuna nlume we Zora edang'wa Manowa, we ludzi gwa Dani, wakabe ana nkadzi usina mbeleko, asina mwana.

³Ntumwa wa Yahwe kazwilakidza kunli ukandwa kati, “Bona, u balumbila auna mwana, koga unowozwisenga uka wana mwana we tjilisana.

⁴Ngono uyele njele kuti autong'wa nkumbi we zhambi kene busukwa kene kuli kuja tjimwe tjisitjibuyanana,

⁵ngoti unowozwisenga uka wana mwana we tjilisana. Kusheteke reza inowoshingisiwa mu nsholo uwe, ngobe mbisana unowobe Nnaziri, unowopiwa Ndzimu mu kuzwagwa kukwe, ngono unowotangisa ku sunungula Baiziraela mu maboko e Bafilisitiya.”

⁶Nkadzi kayenda kanobudza nlume uwe eti, “Nlume we Ndzimu wazha kundili. Wabe elingika se ntumwa we Ndzimu, etjenamisa. Andizombhuzwa kwaanodwa, ngono naiye aazondibudza zina lile.

⁷Koga wandidwa eti, ‘Unowozwisenga ukawana mwana we tjilisana. Ngono ngwenu, using'we nkumbi we zhambi kene busukwa, usije tjimwe tjisitjibuyanana, ngobe mbisana unowopiwa Ndzimu kudwa mukuzwagwa kunoti zhuba le lufu gugwe.’ ”

⁸Ngono Manowa katembezela kuna Yahwe kati, “Imwi Yahwe, ndokumbila kuti ntumwa we Ndzimu wamatumila kutili azhe kakale kutili ngono atidiye kuti tilele tjini mbisana unowozwagwa.”

⁹Ndzimu bakahwa hwi la Manowa, ngono ntumwa we Ndzimu kazha kakale ku nkadzi ali ku minda koga nlume uwe Manowa wakabe asinaye.

¹⁰Nkadzi kalibilidza kanobudza nlume uwe eti, “Bona, nlume wakazha kundili zhuba elilije wazwilakidza kundili.”

¹¹Manowa kamilika kasala nkadzi uwe shule. Wakati eswika pa nlume, kabhuzwa kati, “Apa ndiwe nlume wakalebeleka ne nkadzi wangu kene?” Kadabila eti, “Ndimi.”

¹²Ndizo Manowa kati, “Apa matama awo ashingikadziwa, mbisana wakafanila tjila tjini, ashingeni?”

¹³Ngono ntumwa wa Yahwe akadwa Manowa eti, “Nkadzi ngaabe ne njele muna zose zwandakambudza.

¹⁴Asije tjimwe tjinodwa mu zhambi, kene kuli kung'wa nkumbi we zhambi kene busukwa kene kuja tjimwe tjisitjibuyanana, zose zwandambudza azwithame.”

¹⁵Manowa kadwa ntumwa wa Yahwe kati, “Tokumbila ugale, tikululwamisile tjibudzana.”

¹⁶Ntumwa wa Yahwe kashandula eti, “Kene ukandinonosa, anditowoja zojiwa zwizo, koga apa ululwamisa tjibhayilo, utjithamile Yahwe.” Ngobe Manowa wakabe asinga zibe kuti ntumwa wa Yahwe.

¹⁷Manowa kabhuzwa ntumwa wa Yahwe eti, “Zina lilo ndiyani, kuti ndizo apa matama awo angashingikala tikukudze?”

¹⁸Ntumwa wa Yahwe kashandula eti, “Ini ubhuzwa zina langu kana ndelinotjenamisa.”

¹⁹Ipapo Manowa katola tjibudzana kose ne tjipo tje mathunde, kadusila Yahwe tjibhayilo pezhugwi kwe shongwe. Ngono Yahwe bakathama tjinotjenamisa Manowa ne nkadzi uwe bakalingilila

²⁰sekwa nthuto wakayenda pezhugwi kudzimu udwa mu tjibeso tjinopisigwa zwibhayilo, ntumwa wa Yahwe katathila ali mu nthuto. Manowa ne nkadzi uwe bakati bebona ikoku bakawila pasi nge njiso.

²¹Ntumwa wa Yahwe ukasitjaboneke muna Manowa ne nkadzi uwe. Ndizo Manowa kaziba kuti kwabekuli ntumwa wa Yahwe.

²²Ngono Manowa kadwa nkadzi uwe kati, “Ngemalebeswa towofa, ngoti tabona Ndzimu.”

²³Koga nkadzi uwe kandwa eti, “Apa Yahwe babeshaka kuti bulaya, banobebasa amutjila tjibhayilo tjinopisiwa ne tjipo tje mathunde kudwa mu maboko edu, kene kuli kutilakidza zwithu zose izwezwi kene kutibudza zwakajali.”

²⁴Ngono nkadzi kawana mbisana, kandana Samisoni, mbisana kakula ngono Yahwe bakankombolela.

²⁵Ngono Meya ya Yahwe ikatangisa shinga naye ali mu Mahanehidani pakati kwe Zora ne Eshitaole.