Read Kalanga Basumikilisi 14 Bible Online

Basumikilisi 14 - Kalanga bible

Basumikilisi 14

¹Kwakati limwe zhuba Samisoni kayenda ku Timina ngono kabona mwanadi we N'filisitiya.

²Wakati eshanduka kabudza tate babe na mme babe kati, “Ndabona mmwe nkololokadzi we Bafilisitiya mu Timina, ngono ngwenu mundishakile iye kube nkadzi wangu.”

³Koga tate babe na mme babe bakanshandula beti, “Apa akuna mwanadi mu bathu bakanyi kwenyu kene pakati kwe bathu bedu bose, kwaungadza ukanotola nkadzi ku Bafilisitiya basakathumbigwa kene?” Koga Samisoni kadwa tate babe kati, “Mundishakile iye, ndiye unondishathisa.”

⁴Tate babe na mmebabe bakabe basinga zibe kuti kwakabe kudwa kuna Yahwe, ngobe bakabeshaka zila yekugwa ne Bafilisitiya. Mu tjibaka itjetjo Bafilisitiya bakabe bebusa Baiziraela.

⁵Samisoni kadelukila ku Timina ana tate babe na mme babe, bakati batjilinga minda dze mizhambi dze Timina, tjinyolotjo kukabhuda shumbana i bomba izha kunli.

⁶Meya ya Yahwe ikazha munli nge masimba kwaakapalulanya shumba koga se unopalulanya tjibudzana, ngono asakabhata tjimwe mu maboko. Koga kasibudze tate babe kene mmebabe tjaathama.

⁷Ngono kayenda kanolebeleka ne nkadzi, ngono nkadzi kashathisa Samisoni kwazo.

⁸Kwakati shule kwe mazhuba ebgwilila enotola nkadzi, wakatendebuka kanolinga itumbu tje shumba, ngono bona, kukabe kuna nlunda we nyutji mu itumbu ne butji.

⁹Kamola nge maboko awe, kayenda eja mu zila, kanoswika kuna tate babe na mme babe ngono kabapabo dzimwe bakaja. Koga kasibabudze kuti watola butji mu itumbu tje shumba.

¹⁰Kwakati tate babe beswika ku nkadzi iwoyo, Samisoni kathama nzano ikweno ngoti kwakabekuli nja we bazhuzha.

¹¹Kwakati bathu bembona bakanzhisila thaka dzidze dzili makumi matatu (30) kubenaye.

¹²Ngono Samisoni kabadwa kati, “Imani ndimu lipe, apa mungadibudza dabilo mu mazhuba ali tendeka e nzano, ndowomupa zwihempe zwili makumi matatu (30) ne zwiambalo zwakanaka zwili makumi matatu (30).

¹³Koga apa mungakong'wa ne kundidabila, mowondipa zwihempe zwili makumi matatu (30) ne zwiambalo zwakanaka zwili makumi matatu (30).” Ngono bakandwa bakati, “Leba libha lilo tilihwe.”

¹⁴Kababudza ilo kati, “Mu nji kwakabuda zojiwa. Muna wakasima, kukabuda butji.”

¹⁵Kwakati mu zhuba le bunna bakadwa nkadzi wa Samisoni beti, “Tjengela nlume uwo ati tjenesele libha kuti lodwani, kusakajalo tomupisa iwe ne be nsha wa tate babo. Apa matikokela kuwotilonga bushayi kene?”

¹⁶Ngono nkadzi wa Samisoni kalila mbeli kukwe eti, “Unondishima, autondida. Walibha bathu bakanyi kwedu ngono auzondibudza dabilo.” Ngono kandabila eti, “Bona, andizobudza tate kene mme, apa ndibudze iwe kene?”

¹⁷Kalila mazhuba wose ali kutendeka e nzano, kwakati mu zhuba le butendeka kambudza, ngobe wakabe atjinlonga hapa na hapa. Ngono nkadzi kanotjenesela balume bakanyikukwe.

¹⁸Zhuba lakati lisathu lamila mu zhuba le butendeka, balume be nzi bakandwa bakati, “Ini tjinozipa kupinda butji gwe nyutji kene? Ini tjakasima kupinda shumba kene?” Ngono kabashandula eti, “Ha mungabe musalima ne gondolo langu, mungabe musatjenesa libha langu.”

¹⁹Ngono Meya ya Yahwe ikazha munli nge simba, kayenda ku Ashikiloni, kabulaya balume bali makumi matatu (30) mu nzi, katola thundu dzabo, kapa balume batjenesa libha zwiambalo zwakanaka. Kabgwilila ku ng'umba ya tate babe nge bushongola gunothuta.

²⁰Nkadzi wa Samisoni kapiwa nzwalani uwe, iye wakabe ali ntjengeti uwe pa ndobolo iye.