Read Kalanga Basumikilisi 15 Bible Online

Basumikilisi 15 - Kalanga bible

Basumikilisi 15

¹Kwakati shule mu tjibaka tje kuvun'gwa kwe koroni, Samisoni kanokumba nkadzi uwe ngono kansengela tjibudzana. Ngono kati, “Ndongina mu ng'umbana ye nkadzi wangu.” Koga tate babe bakanlambila ku ngina mukati.

²Tate babe bakati, “Ndakakumbula kuti unonshima dumbu, ndizo ndikampa nzwalani uwo. Nnunguna uwe unompinda nge naka, ndokumbila utole iye mu bumo gugwe.”

³Samisoni kabadwa kati, “Ngwenu ndowobendisi nlandu ngekwe Bafilisitiya apa ndibakubadza.”

⁴Ndizo Samisoni kanobhata bophungubgwe zwili mazana matatu (300) kazwisungilikanya nge mimwise bubili ne bubili, katola zwinovoneka kazwisungila mu bubili gose.

⁵Ngono kati abhatidza moto muna zwinovoneka kaletja bophungubgwe zwiyenda ku minda dze Bafilisitiya zwikapisa mathunde kose ne minda dze mizhambi nedze mitoba.

⁶Kwakati Bafilisitiya bebhuzwa beti, “Ndiyani wathama ikoko?” Bakabudziwa kuyi, “Ndi Samisoni, nkwasha we nlume we Timina, ngoti batola nkadzi uwe bempa nzwalani uwe.” Ngono Bafilisitiya bakazha bepisa nkadzi na tate babe nge moto.

⁷Samisoni kabadwa kati, “Apa kuli itjo tjamunothama, ndotuna kuti andingamuletje kuswikila nda mubgwilizila.”

⁸Kabanginilila kwakabangalala kabulaya banji. Ipapo kayenda kanogala mu guwu mu shongwe ye Etami.

⁹Bafilisitiya bakayenda bakakotokela ku Juda, betalabukila ku Lehi.

¹⁰Ngono balume be Juda bakabhuzwa beti, “Ini wazha kuwotigwisa kene?” Bakashandula beti, “Tazhila kuwosunga Samisoni, kunthama tjaakatithama.”

¹¹Balume bali zwiwulu zwili zwitatu (3 000) bakayenda ku shongwe ye Etami bakadwa Samisoni bakati, “Autoziba kuti Bafilisitiya banotibusa kene? Watithamilani kene?” Kadabila eti, “Ndabathamila tjabakandithama.”

¹²Bakandwa bakati, “Tazha towokusunga kuti tinokulonga mu maboko e Bafilisitiya.” Samisoni kabadwa kati, “Tunani kundili kuti amungandibulaye nebukwenyu.”

¹³Bakan'dabila beti, “Aa, towokusunga koga tikokulonga mu maboko abo, atingakubulaye.” Ndizo bakansunga nge misungo mibili mitshwa bakandusa mu shongwe.

¹⁴Wakati eswika ku Lehi, Bafilisitiya bakanshanganidza be mimila, Meya ya Yahwe ikazha munli nge simba, ngono misungo yakabe ili mu maboko awe ikanga thali dzapisiwa nge moto, misungo ikaletja mu maboko awe.

¹⁵Kawana shaya dze donki dzitjazwihwa, kadzitola kabulaya balume bali tjiwulu (1 000) nadzo.

¹⁶Samisoni kati, “Ne shaya dze donki ndakabathama matuluthulu, Ne shaya dze donki Ndakabulaya balume bali zwiwulu.”

¹⁷Wakati apedza lebeleka, kalasha shaya dze donki, ngono pathu ipapo kuka dang'wa Ramatilehi.

¹⁸Ngobe wakabe ana nyota kwazo, kalilila kuna Yahwe kati, “Mapa nlanda wenyu kukunda kukulu. Ngwenu ndingafa ne nyota kene, ndiwila mu maboko e bathu basakathumbigwa?”

¹⁹Ngono Ndzimu bakapubula gomba lakabe lili ku Lehi kukabhuda vula. Kati e ng'wa kabuyigwa nge simba lile katjila. Ndizo nsenya ukadang'wa kuyi Enehakori, na nasi uyapo ku Lehi.

²⁰Samisoni katungamila Baiziraela kwe makole ali makumi mabili (20) mu mazhuba e Bafilisitiya.