Read Kalanga Basumikilisi 16 Bible Online

Basumikilisi 16 - Kalanga bible

Basumikilisi 16

¹Kwakati limwe zhuba Samisoni kayenda ku Gaza, akaswika e wana fukula, kangina ku ili.

²Bagaza bakabe badwiwa kuyi, “Samisoni umuno,” ndizo bakakomba bugalo ngono bakanlalila busiku gose ku nkoba we nzi. Bakalala bakanyalala busiku gose beti, “Kowoti mangwanana kuyedza, tikambulaya.”

³Koga Samisoni kalala kuswikila pakati kwe busiku, ngono kamuka, kabhata mikoba ye nzi ne phanda mbili ne dze butale na zose kazwisenga nge mathudze awe kazwiyesa pezhugwi kwe dombo li mbeli kwe Heburoni.

⁴Shule kwe tjibaka, kadana ne nkadzi mu Nkuku we Soreki, zina lile kuyi Delila.

⁵Makombgwa e Bafilisitiya akazha kunli akandwa akati, “Bona kuti aungantjengele kakulakidza simba lile kwaligele ne kuti tingankulila tjini tikansunga, tikankuda. Mmwe ne mmwe wedu unowokupa shekele dze siliva dzili tjiwulu tjina zana (1 100).”

⁶Ndizo Delila kadwa Samisoni kati, “Undibudze kuti simba lilo ligele poni, ne kuti ungasungwa tjini ukakundiwa?”

⁷Samisoni kandabila eti, “Apa ndingasungwa ne mitjili ili tendeka mitshwa isathu yawoma, ndowobe nlelu se nlume mmwe ne mmwe.”

⁸Ipapo makombgwa e Bafilisitiya kazhisa mitjili mitshwa ili kutendeka isakawoma, ngono nkadzi kansunga nayo.

⁹Wakabe ana balume baakasumbika mu ng'umba ngono kadana Samisoni eti, “Bafilisitiya bakuwila,” ngono kathubula mitjili bulelulelu se ingati thali dza pisiwa nge moto. Ndizo ikohwa tje simba lile tjikasizibgwe.

¹⁰Ndizo Delila kadwa Samisoni eti, “Wandithama tjilengwe, undibudza manyepkhwa, ndibudze kuti ungasungwa tjini.”

¹¹Ngono kandwa kati, “Apa bendisunga ne misungo mitshwa isathu ikashinga, ipapo ndowobe nlelu se nlume mmwe ne mmwe.”

¹²Ndizo Delila katola misungo mitshwa kansunga ngono kandwa kati, “Bafilisitiya bakuwila, Samisoni,” kwakabe kuna balume bakabgwata mu ng'umba. Ngono kathubula misungo se ingati thali.

¹³Delila kadwa Samisoni eti, “Nangwenu utjandithama tjilengwe, undinyepela, undibudze kuti ungasungwa tjini.” Kashandula eti, “Apa ungaluka maphondo ali tendeka mu nsholo wangu ne wulu inoluka, ukoabhatidza nge lubambo, ipapo ndowobe nlelu se balume bose.”

¹⁴Wakati akaizela, Delila kaluka maphondo ali tendeka ne wulu inoluka mu nsholo uwe ngono kabhatidza nge lubambo, kandwa kati, “Bafilisitiya bakuwila Samisoni.” Koga kapapadzuka mu hwope, kashomola lubambo ne wulu yakaluka.

¹⁵Delila kandwa kati, “Nodwatjini uti unondida, koga moyo uwo usinami? Wakandithama tjilengwe katatu kose, auzondibudza kuti simba lilo ligele poni.”

¹⁶Nkadzi wakati wotjindziyidza nge matama mazhuba wose, kwakannyadza meya se ingati unga fa.

¹⁷Ndizo kambudza tjimwe ne tjimwe eti, “Reza aithu ikatongo shingisiwa mu nsholo wangu, ngoti ndi Nnaziri we Ndzimu kudwa mu kuzwagwa kwangu. Apa ndinga tesegwa, simba langu loyenda, ndosala ndifanana ne bathu bose.”

¹⁸Delila wakati ebona kuti wambudza tjimwe ne tjimwe katuma kuti kudang'we makombgwa e Bafilisitiya eti, “Tjibuyani ngwenu, ngoti wandibudza tjimwe ne tjimwe.” Makombgwa e Bafilisitiya kazha kunli, bakabhata mari.

¹⁹Kan'yezedza mu makumbo awe, kadana nlume mmwe kakera mavudzi ali tendeka mu nsholo uwe. Bakatangisa kundziyidza ngono simba lile likabhuda munli.

²⁰Ipapo kadana eti, “Samisoni, Bafilisitiya bakuwila,” kapapadzuka mu hwope kazwidwa kati, “Ndowobhuda se mazhuba wose ndikazwisunungula.” Wakabe asingazibe kuti Yahwe ban'siya.

²¹Ngono Bafilisitiya bakambhata bakankopola mesho bakan'yisa ku Gaza. Bakansunga nge ketani dze phangula, nshingo uwe kulikugaya mu ng'umba ye busungwa.

²²Koga mavudzi e nsholo uwe akakula kakale shule kwe kutesegwa kukwe.

²³Ngwenu batungamili be Bafilisitiya bakabe bakakubungana kudusa tjibhayilo tjikulu ku ndzimu wabo Dagoni ne kupembela, ngoti bakabe beti, “Ndzimu wedu walonga Samisoni tjita tjedu mu maboko edu.”

²⁴Kwakati bathu bembona, bakakudza ndzimu wabo beti, “Tjita tjedu Samisoni, itjo tjakathukudza shango yedu, tjikabulaya bunji gwedu, ndzimu wedu watjilonga mu maboko edu.”

²⁵Bakati batjishatha, bakamimila beti, “Danani Samisoni atizanile.” Bakadana Samisoni kabhuda mu ng'umba ye busungwa, kabazanila, bakambiga pakati kwe phanda,

²⁶Samisoni kadwa nlanda wakabe akambhata luboko eti, “Undibige pa phanda dzakabhata ng'umba kuti ndinayile mudzili.”

²⁷Ipapo ng'umba yakabe ilizhele balume ne bakadzi, batungamili bose be Filisitiya bakabe baliyapo, pezhugwi kwe denga kwakabe kuna balume ne bakadzi bangabhata zwiwulu zwitatu (3 000) bakalingilila Samisoni ezana.

²⁸Samisoni katembezela Yahwe eti, “Imwi She Yahwe, mundikumbule, ndokumbila mundisimise mu tjibaka tja ngwenu koga imwi Ndzimu, kuti ndibgwilizile Bafilisitiya ngekwe mesho angu mabili.”

²⁹Ipapo Samisoni kabhata phanda dzakabhata ng'umba, kadzisunda, imwe nge gwe luji imwe nge gwe lumeshwe.

³⁰Ngono Samisoni kati, “Imani ndife ne Bafilisitiya.” Kasunda nge simba lile lose, ng'umba ikawila batungamili ne bathu bose bakabe balimukati. Ndizo bathu baakabulaya pa lufu gugwe bakabe bali banji pana baakabulaya atjatjila.

³¹Ndizo bana batate babe ne be nsha wa tate babe bakayenda benontola. Bakanshandusa bakambiganyila pakati kwe Zora ne Eshitaole mu ikumbu tja Manowa tate babe. Wakatungamila Iziraela kwe makole ali makumi mabili (20).