Read Kalanga Basumikilisi 17 Bible Online

Basumikilisi 17 - Kalanga bible

Basumikilisi 17

¹Kwakabe kuna nlume we shango ye matuthu ye Ifureimi zina lile kuyi Mika.

²Kadwa mmeyabe kati, “Shekele dze siliva dzili tjiwulu ne zana (1 100) dzatogwa mumuli, idzo dzandahwa mulonga bhiso, siliva iyeyo ndinayo, ndakaitola.” Ipapo mme yabe bakandwa beti, “Yahwe bakukombolele nkololo wangu.”

³Wakati ebgwiliza siliva ye shekele dzili tjiwulu tjina zana (1 100) kuna mme yabe, bakandwa bakati, “Ndoyengemadzila Yahwe siliva iyeyi ngekwe nkololo wangu, kuthama ifano tje ndzimu wakabezhiwa ne wakabumbiwa, ndizo ngwenu ndowokubgwilizila iyo.”

⁴Ndizo wakati ebgwiliza siliva kuna mme yabe, mme yabe bakatola maloso ali mazana mabili (200) e siliva bakabebepa nthuli we siliva, kathama ndzimwana wakabezhiwa ne wakabumbiwa. Zwika bigiwa mu ng'umba ya Mika.

⁵Nlume iwoyu unoyi Mika wakabe ana dulana le midzimu, kathama khiba ne zwifano ngono kabiga nkololo uwe kube mpirisiti.

⁶Mu mazhuba iyawo kwakabekusina mambo mu Iziraela, mmwe ne mmwe ethama tjaanobona tjakalulwama mu mesho awe.

⁷Kwakabe kuna nzhuzha edwa ku Bhetelehema mu Juda, we ludzi gwa Juda.

⁸Nlume iwoyu kabhuda mu nzi we Bhetelehema mu Juda, kunogala kwaangabona magalo, wakayenda kaswika ku shango ye matuthu ye Ifureimi ku ng'umba ya Mika.

⁹Mika kambhuzwa kati, “Unodwa poni?” Kanshandula eti, “Ndi Nlevi we Bhetelehema mu Juda, ndoshaka magalo pandingagala.”

¹⁰Mika kandwa kati, “Gala nami, ube tate bangu ube mpirisiti wangu, ngono ndowokupa shekele dze siliva dzili gumi (10) ne gole, kose ne zwiambalo ne zojiwa.”

¹¹Ndizo Nlevi kaduma gala naye, ngono nzhuzha kanga bakololo babe kunli.

¹²Ndizo Mika kalonga Nlevi mu nshingo, nzhuzha kabe mpirisiti uwe, kagala mu ng'umba ya Mika.

¹³Mika kabe eti, “Ngwenu ndoziba kuti Yahwe banowondithamila zwakanaka, ngoti ndina mpirisiti we Nlevi.”