Read Kalanga Basumikilisi 18 Bible Online

Basumikilisi 18 - Kalanga bible

Basumikilisi 18

¹Mu misi iyeyo Iziraela yakabe isina mambo. Mu misi iyeyo ludzi gwe Badani gwakabe guzwishakila thaka pagungagala, ngobe bakabe basathu bakabe ne thaka ye shango mu njudzi dze Iziraela.

²Ndizo Badani bakatuma balume bakasima bali bashanu kudwa mu ludzi gwabo, kudwa kuna Zora ne kuna Eshitaole kunoshola shango ne kuyishakisisa, bakabadwa bakati, “Yendani munoshakisisa shango.” Balume bakangina mu shango ye matuthu ya Ifureimi, bakayenda ku ng'umba ya Mika, bakalalako.

³Bakati bali pa ng'umba ya Mika, bakaziba hwi le nzhuzha we Nlevi, ngono bakayendako bakandwa bakati, “Ndiyani wakakuzhisa ipapa? Unoshingani muno?”

⁴Kabadabila eti, “Mika wakandihira, ndi mpirisiti uwe.”

⁵Bakandwa bakati, “Tokumbila ubhuzwe ku Ndzimu kuti kene gwendo gwedu gowobhudilila?”

⁶Mpirisiti kabashandula eti, “Yendani nge mbakiso, gwendo gwenyu gwadumigwa na Yahwe.”

⁷Ndizo balume bali bashanu bakayenda bakanoswika ku Laishi, bakabona bathu bamu uli kuti bagele mu mbakililo se Basidoni, bagedzikane abatotja tjimwe, shango yabo aitosheta tjimwe, bakabhudilila. Bakagala kule ne Basidoni, basina shingidzano ne bamwe bathu.

⁸Bakati bebgwilila ku Zora ne Eshitaole, bakanyi kwabo bakababhuzwa beti, “Mawana kulitjani?”

⁹Bakashandula beti, “Milikani tiyende tinobanginilila, ngoti tabona shango yakalulwamila ndimo. Apa amutowothama tjimwe kene? Musitje kuyenda munotola shango.

¹⁰Ha muyenda mowowana bathu bagedzikane. Shango yakazhuka, Ndzimu bailonga mu maboko enyu, shango isingashete tjimwe kene kulini.”

¹¹Ipapo balume bali mazana ali tathatu (600) be ludzi gwa Dani, bakazwilulwamisila ngwa bakamilika mu Zora ne Eshitaole.

¹²Bakayenda bakanokotokela ku Khiriyatijarimu mu Juda. Ndizo wali pathu ipapo pe dang'wa Mahanehadani na nasi, kukunomilazhuba kwe Kiriatijearimu.

¹³Kudwa ipapo bakapindila ku shango ye matuthu ye Ifureimi, bakanoswika ku ng'umba ya Mika.

¹⁴Ngono balume bali bashanu bakabe banoshola shango ye Laishi bakadwa bakanyi kwabo bakati, “Moziba kuti mu ng'umba idzedzi kuna khiba ye mpirisiti ne midzimwana ye ng'umba ne zwifano zwakabezhiwa ne zwifano zwakabumbiwa? Ngwenu moziba tjamakafanila thama.”

¹⁵Bakayenda ko, bakaswika ku ng'umba ye nzhuzha we Nlevi kunogala Mika, bakambhuzwa mamuko.

¹⁶Balume bali mazana ali tathatu (600) be Badani bakasenga zwibhayano zwe ngwa, bakama pa nkoba,

¹⁷ngono balume bali bashanu bakabe bashola shango bakangina bakatola ifano tjakabezhiwa ne khiba ye mpirisiti ne midzimwana ye ng'umba ne ifano tjakabumbiwa, mpirisiti iye atjimile ku nkoba ne balume bali mazana ali tathatu (600) bakabhata zwibhayano zwe ngwa.

¹⁸Ngono kwakati bangina mu ng'umba ya Mika betola ifano tjakabezhiwa ne khiba ye mpirisiti ne midzimwana ye ng'umba ne ifano tjakabumbiwa, mpirisiti kabadwa kati, “Mothamani kene?”

¹⁹Bakan'dabila beti, “Nyalala uti tuu, yenda naswi, ube tate bedu ube mpirisiti wedu. Akutoyita kuti ushingile ludzi ne nsha mu Iziraela pana kuti ushingile nsha we nthu ung'ompela kene?”

²⁰Moyo we mpirisiti ukashatha, katola khiba ye mpirisiti ne midzimwana ye ng'umba ne ifano tjakabezhiwa ne ifano tjakabumbiwa kangina pakati kwe bathu.

²¹Bakafupatila bakayenda, betungamidza bana ne zwithuwo ne thundu mbeli.

²²Kwakati batjibe kule ne ng'umba ya Mika, balume bakabe begala kupoteleka Mika bakadang'wa, ngono bakatobela Badani.

²³Bakati be kambidza Badani, bakatjebuka bakadwa Mika bakati, “Kwatini, kwaungazha ne gupo lakajali?”

²⁴Kashandula eti, “Matola midzimu yandakathama ne mpirisiti mukayenda. Ndasaligwa ngeni imi? Ini mungadibhuzwa muti, ‘Kwatini?’ ”

²⁵Badani bakandwa beti, “Usimilidze hwi lilo pakati kwedu, kungadwa balume bana moyana bekunginilila, udwa ulashikigwa nge butjilo gugo ne be nsha uwo.”

²⁶Ipapo Badani bakadwilidzisa gwendo gwabo, Mika wakati ebona kuti banonkulila, kashandukila kanyi kukwe.

²⁷Kwakati batjitolela Mika tjaakathama ne mpirisiti uwe, Badani bakanoswika ku Laishi ku bathu bakanyalala bagedzikane ngono bakababulaya nge thumo bakapisa nzi nge moto.

²⁸Kwakabe kusina ungabatjidza ngoti bakabe begala kulekule ne Basidoni, basinga shingidzane ne bathu. Nzi wakabe uli mu nkuku hwunde ne Bhetirihobi. Badani bakamusa nzi iwoyu bakagala muuli.

²⁹Bakautumila beti Dani, nge zina la batategulu babo Dani bakazwaligwa Iziraela, koga zina le nzi lakabe lili Laishi mu kutanga.

³⁰Ndizo Badani bakazwibigila midzimwana ye zwifano, Jonatani nkololo wa Gerishomu ali nkololo wa Mushe ne bakololo babe, bakabe bali bapirisiti be ludzi gwa Dani kuswikila pa kutapiwa kwe shango.

³¹Bakadwilila bakashingisa midzimwana ye zwifano yakathamiwa na Mika, mu mazhuba wose Ng'umba ye Ndzimu ili ku Shilo.