Read Kalanga Basumikilisi 19 Bible Online

Basumikilisi 19 - Kalanga bible

Basumikilisi 19

¹Mu misi iyeyo kusina mambo mu Iziraela, kwakabe kuna Nlevi wakabe egala shule tjose ku shango ye matuthu ye Ifureimi, wakazwitolegwa tjamba kudwa ku Bhetelehema mu Juda.

²Ngono tjamba tjitje tjikan'siya, tjikayenda ku ng'umba ya tate batjo ku Bhetelehema mu Juda, tjikagala ikweno kwe mimwedzi minna.

³Ngono nlume uwe kamilika kantobela, kanonkwekweredza kuti abuye ku nzi. Wakabe ana nlanda uwe ne madonki mabili. Nkadzi kantola kanlonga mu ng'umba ya tate babe, ngono tate be nkadzi bakati bembona, bakashatha baka nshanganidza.

⁴Ngono tezwale babe, tate be mwanana, bakalamba e yenda, ngono bakagala naye mazhuba matatu, ndizo bakaja bakang'wa belala ikoko.

⁵Mu zhuba le bunna kabinduka mangwanana kululwamisila yenda, ngono tate be mwanana bakadwa nkwasha wabo bakati, “Uzwisimise ne tjimwe tjinojiwa, mukoyenda zwenyu.”

⁶Ndizo balume bakagala pasi nge bubili gwabo bakaja bakang'wa bose, ngono tate be nkadzi bakadwa nlume bakati, “Ndokumbila ulale kakale moyo uwo ushathe.”

⁷Nlume wakati emilika wotjiyenda, tezwale babe bakankumbila kwazo, ndizo kalala kakale.

⁸Mu zhuba le bushanu kamuka kutji mangwanana kuti atjiyenda, tate be mwanana bakandwa bakati, “Simisa moyo uwo, gala kuswikila kube masikati.” Ndizo bakaja bose bubili gwabo.

⁹Kwakati nlume ne tjamba tjitje ne nlanda uwe bemilika kuti batjiyenda, tezwale babe, tate be mwanana bakandwa bakati, “Bona, kwatjibe madekwana kale. Lala imomu zhuba lamila. Lala ndizo kuti moyo uwo ushathe. Mowobinduka mangwana muwila zila muyenda kanyi.”

¹⁰Koga nlume kalamba lala kakale, kamilika kayenda ngono kaswika kulingisana ne Jebusi iyo Jerusalema. Wakabe ana madonki mabili akabelesiwa ne tjamba tjitje.

¹¹Bakati batjilinga Jebusi, zhuba lakabe lotjimila, nlanda kadwa tetshi uwe kati, “Buyani tingine mu nzi iwoyu we Bajebusi tilale.”

¹²Tetshi uwe kanshandula eti, “Atinga ngine mu nzi we bataya basi bathu be Iziraela, koga towopindila ku Gibiya.”

¹³Kadwa nlanda uwe kati, “Buya tisedzele hwunde ye umwe we magalo iyawa, towolala ku Gibiya kene ku Rama.”

¹⁴Ndizo bakapinda bakayenda, ngono zhuba likabamilila bakalinga Gibiya ya Bhenjamini,

¹⁵ngono bakatendebukila ko bakangina kuti balale mu Gibiya. Bakayenda bakanogala pa tjibata tje nzi, koga akuna nthu wakabatolela ku ng'umba iye kuti banolala.

¹⁶Ngono madekwana iyawo kukazha nthutana wakakula edwa kushinga ku minda, wakabe edwa ku shango ye matuthu ye Ifureimi, wakabe egala mu Gibiya, beni be magalo kwakabe kuli Babhenjamini.

¹⁷Kati e milidza mesho awe, kabona nlume pa tjibata tje nzi, ngono nthutana kabhuzwa eti, “Unoyenda ngayi? Unodwa ngayi?”

¹⁸Kandabila eti, “Timu zila topinda, todwa ku Bhetelehema we Juda toyenda ku shango ye matuthu ye Ifureimi kwatinogala. Ndakabendayenda ku Bhetelehema we Juda ngono ngwenu ndoyenda ku Ng'umba ya Yahwe, akuna iye wandiamutjila mu ng'umba iye.

¹⁹Tina mbuba yedu ne zojiwa zwe madonki ne tjiwunga ne nkumbi we zhambi iswi balanda babo, akuna tjatinosheta.”

²⁰Nthutana kabe eti, “Usidziyidzike, ndowomutjengeta, usilale mu tjibata.”

²¹Ndizo kabalonga mu ng'umba iye, kapa madonki zojiwa zwawo, bakan'gula makumbo bakaja bakang'wa.

²²Bakati batjakashatha, balume bamwe be zwilalume bakapoteleka ng'umba bakaloba libati, bakadwa nthutana bakati, “Dusa nlume iwoyo wa walonga mu ng'umba ndizo tinzibe.”

²³Ngono nthutana iye mweni we ng'umba kabhuda kabadwa kati, “Aa, bakanyi kwedu musithame tjithu tjakabipa tjakajali. Mobona kuti nlume iwoyo wazha mu ng'umba yangu, musithame tjithu tjinobhatisa shoni itjetji.

²⁴Bonani, ndina nkololokadzi wangu we mwanadi ne tjamba tjitje. Ndowomudusila ibo ngwenu. Shingisani ibo, muthame tjamunoshaka mubali. Koga nlume iwoyu musinthame tjithu tjakajali tjinobhatisa shoni.”

²⁵Koga balume bakasinteedze. Nlume katola tjamba tjitje katjidusila pazhe kubali, bakandzula, bakanshingisa kwakabipa busiku gose kuswikila mazhokuyedza.

²⁶Kwakati kwatjibe mangwanana nkadzi kabuya kawila pa nkoba we ng'umba ya tetshi uwe, kalala ipapo kuswikila kuyedza.

²⁷Kwakati tetshi uwe emuka kutji mangwanana, kazhula nkoba we ng'umba eti unobhuda unoyenda, kabona tjamba tjitje tjililele pa nkoba we ng'umba, maboko ali pa itubhu tje ng'umba.

²⁸Kandwa kati, “Mukatiyende.” Koga kukasheteka dabilo. Kambiga pezhugwi kwe donki ngono nlume kamilika kayenda kanyi kwabo.

²⁹Wakati eswika ku ng'umba iye, katola mpanga kathubulila tjamba tjitje nge ndungululo dzatjo, kathama zwitho zwili gumi lina kubili (12), kazwitumila mu mituthu yose ye Iziraela.

³⁰Mmwe ne mmwe wakakubona kati, “Akuthu kukashingikala kene kuka bong'wa tjithu tjakajali kudwa tjose Baiziraela bebhuda mu Egipiti kunoti nasi. Mukubone, mukumbuludze, mulebeleke.”