Read Kalanga Basumikilisi 2 Bible Online

Basumikilisi 2 - Kalanga bible

Basumikilisi 2

¹Ntumwa wa Yahwe kamilika edwa ku Giligala eyenda ku Bhokhimu kati, “Ndakamudusa mu Egipiti ndimuzhisa mu shango yandakabe ndatuna kuyipa botate benyu. Ndakati, ‘Anditowokolomodza tjidumano tjangu namwi,

²musithame tjidumano ne bagali be shango iyeyi, mu kolomodze zwibeso zwabo zwe zwibhayilo.’ Koga amuzobhata nlayo wangu, ini ikoko kwamakathama kene?

³Ndizo ngwenu ndikati, anditowobatata mbeli kwenyu, banowobe zwita zwenyu ngono midzimu yabo inowobe bhuzhu ku muli.”

⁴Kwakati ntumwa wa Yahwe a leba matama iyawa ku Baiziraela bose, bathu bakamilidza mahwi bakalila.

⁵Bakatumila bugalo igogo zina beti Bhokimu, bakadusila Yahwe zwibhayilo ikoko.

⁶Kwakati Joshuwa asina kupaladza bathu, mmwe ne mmwe akayenda kunotola thaka iye, kuthuwa shango.

⁷Bathu bakashingila Yahwe mazhuba wose a Joshuwa, ne mazhuba wose e bakulu bakatjila tjibaka tjilefu pana Joshuwa, bakabona mishingo mikulu yakathamigwa Baiziraela ndi Yahwe.

⁸Joshuwa nkololo wa Nuni, nlanda wa Yahwe wakafa ana makole ali zana lina ali gumi (110).

⁹Bakambiganyila mu shango ye thaka iye ku Timinatiheresi mu shango ye matuthu ya Ifureimi, ku bunandzwa gwe Dombo le Gaashi.

¹⁰Kwakati tjizekugwana tjose tjatjilala nabo batategulu batjo, ngono kukamuka tjizekugwana tjitshwa tjisingazibe Yahwe kene mishingo yabakathamila Baiziraela.

¹¹Ngono bathu be Iziraela bakathama mbipo mu mesho a Yahwe, bakashingila bo Bhaale.

¹²Bakasiya Yahwe Ndzimu wa botate babo wakabadusa mu Egipiti. Bakatobela midzimu yakasiyanasiyana ye bathu bakabapoteleka, ngono bakayithigamila, bakalonga Yahwe bushongola.

¹³Bakasiya Yahwe bakashingila Bhaale na Ashitoreti.

¹⁴Ndizo bushongola gwa Yahwe gukathutila Baiziraela ngono bakabalonga mu maboko e batapi bakabatapila thundu. Bakabatengesela zwita zwabo kubapoteleka, kwabakabe basingatjatubule kugwa nazo.

¹⁵Kwakabe kuti apa Baiziraela bebhuda beyenda ku ngwa, luboko gwa Yahwe gwakabe gu gwa nabo kubathamila bubi, Yahwe sekwa bakabebaleba na Yahwe sekwa bakabebabatunila. Bakabe mu buyendasi bukulu.

¹⁶Ngono Yahwe bakabamusila basumikilisi bakabatjidza mu simba le batapi babo.

¹⁷Koga bakasiteedze basumikilisi babo ngoti bakathama bupombgwe ne midzimu ipoga ngono bakayithigamila, bakatjimbidza bapambuka mu zila yakayendiwa na botate babo bakatobela milayo ya Yahwe, ngono bakasithame bejalo.

¹⁸Kwakabe kuti apa Yahwe bebamusila basumikilisi, Yahwe bakabe bana nsumikilisi ngono katjidza bathu mu luboko gwe zwita zwabo mu mazhuba wose e nsumikilisi, ngoti Yahwe bakabe nge ngoni mubali pabakabe bedziyidziwa be tshambilidziwa.

¹⁹Koga kwakabe kuti apa nsumikilisi afa, bathu bakabe beshandukila kuzila dzabo dzakabipa kupinda dza botate babo, betobela midzimu ipoga beyishingila beinamata. Bakabe belamba kuletja mishingo yabo ne zila dzabo dze moyonkukutu.

²⁰Ndizo bushongola gwa Yahwe gukathutila Baiziraela, ngono bakati, “Ngoti bathu ibaba batjuluka tjidumano tjangu tjandaka laya botate babo, bakasinditeedze,

²¹anditjowotata zwitjaba mbeli kwabo zwakasiyiwa ndi Joshuwa afa.

²²Ndowozwishingisa kulika Baiziraela, ndibone kuti banowobhata zila dza Yahwe bakadzitobela sekwakathama bobatategulu babo kene aa.”

²³Ndizo Yahwe bakaletja zwitjaba izwezo basingazwitate ngokuzwilonga mu maboko a Joshuwa.