Read Kalanga Basumikilisi 20 Bible Online

Basumikilisi 20 - Kalanga bible

Basumikilisi 20

¹Ndizo bathu bose be Iziraela banodwa ku Dani ne Bheerisheba kose ne shango ye Giliyadi bakazha bali tjithu tjing'ompela, gubungano likakubungana mbeli kwa Yahwe mu Mizipha.

²Batungamili be bathu bose be njudzi dze Iziraela bakatola magalo abo mu gubungano le bathu be Ndzimu, kuli babhayani bali zwiwulu zwili mazana manna (400 000) bakabhata mathumo.

³Babhenjamini bakabe bahwa kuti bathu be Iziraela bayenda ku Mizipha. Baiziraela bakati, “Mutibudze kuti tjithu itjetji tjakabipa tjakashingikala tjini kene?”

⁴Ndizo Nlevi, nlume we nkadzi wakabulawa kati, “Imi ne tjamba tjangu takaswika ku Gibiya we Babhenjamini, tikalalako.

⁵Kwakati busiku balume be Gibiya bakandimukila bakakomba ng'umba, beshaka kundibulaya. Bakadzula tjamba tjangu ngono tjikafa.

⁶Ndakatola tjamba tjangu ndikathubukanya zwitho ngono ndikazwitumila mu ntuthu wose we shango ye thaka ye Iziraela, ngoti bathama tjinoshimisa tjinobhatisashoni mu Iziraela.

⁷Bonani, imwi bathu be Iziraela mose, lebelekani mu duse dama.”

⁸Bathu bose bakama bali tjithu tjing'ompela bakati, “Akuna wedu unowoyenda ku nshasha uwe kene kuli mmwe wedu unowoyenda ku ng'umba iye.

⁹Koga tjatinowoshingila Gibiya ndiyetji, towoyinginilila kuyendidzana nge leba kwe hakata,

¹⁰towotola balume bali gumi muna bali zana (100) mu njudzi dzose dze Iziraela ne bali zana (100) muna bali tjiwulu (1 000) ne bali tjiwulu (1 000) muna bali zwiwulu zwili zana (10 000) banozhisila ngwa zojiwa. Ngono banowoti bashanduka, tikathamila Gibiya we Bhenjamini tjakabafanila tjinobhatisa shoni tjabakathama mu Iziraela.”

¹¹Ndizo balume bose be Iziraela bakakubunganila nzi we Gibiya bali tjithu tjing'ompela.

¹²Njudzi dze Iziraela dzikatuma balume ku ludzi gose gwa Bhenjamini dziti, “I mbipo yakatini yakashingikala pakati kwenyu kene?

¹³Ndizo ngwenu dusani zwilalume izwezwi zwimu Gibiya kuti tizwibulaye, tiduse bubi mu Iziraela” Koga Babhenjamini bakasiteedze bakanyi kwabo Baiziraela.

¹⁴Babhenjamini bakakubunganila ku Gibiya bebhuda mu mizi yabo kugwa ne Baiziraela.

¹⁵Kwakati mu zhuba ilelo Babhenjamini bakalulwamisa balume bali zwiwulu zwili makumi mabili ana zwili tathatu (26 000) be thumo kudwa mu mizi yabo, kuzhadzisa bali mazana ali kutendeka (700) bakashalugwa banogala mu Gibiya.

¹⁶Muna bose ibaba, bali mazana ali kutendeka (700) bakabe bashalugwa bakabe beshingisa luboko gwe lumeshwe, beziba posa nge tjivirimabgwe basinga khute.

¹⁷Balume be Iziraela kuzhe kwe Babhenjamini, bakalulwamisa balume bali zwiwulu zwili mazana manna (400 000) be thumo, bose bali balume be ngwa.

¹⁸Bathu be Iziraela bakamilika bakatathila ku Bhetele, bakabhuzwa Ndzimu beti, “Ndiboyani mutili banowotangisa ngwa ne Babhenjamini?” Yahwe bakashandula beti, “Bajuda ngabatangise.”

¹⁹Kwakati tjimuka Baiziraela bakamilika bakanothama bukotokelo hwunde ye Gibiya.

²⁰Balume be Iziraela bakayenda bakanogwa ne Babhenjamini, bakazwimisa nge ndongoloso ye ngwa bakalinga Gibiya.

²¹Babhenjamini bakabhuda mu Gibiya, bakabulaya balume bali zwiwulu zwili makumi mabili ana zwibili (22 000) be Baiziraela mu zhuba ilelo.

²²Koga balume be Iziraela bakasimisa moyo, bakama kakale nge ndongoloso ye ngwa mu magalo iwo zwawo abakama mu zhuba le kutanga.

²³Baiziraela bakatathila pezhugwi bakanolila mbeli kwa Yahwe kuswikila kube madekwana, ndizo bakabhuzwa Yahwe beti, “Apa tiyende tinogwa kakale ne bakanyi kwedu Babhenjamini kene?” Yahwe bakashandula beti, “Yendani munobanginilila.”

²⁴Ndizo Baiziraela bakanonginilila Babhenjamini zhuba le bubili.

²⁵Babhenjamini bakabashanganidza bedwa ku Gibiya zhuba le bubili, ngono bakabulaya balume be Iziraela bali zwiwulu zwili gumi lina zwili zhanakadzi (18 000), bose bakabe bali balume be thumo.

²⁶Ipapo bathu bose be Iziraela, ngwa yose ikayenda ku Bhetele bakalila, baligele mbeli kwa Yahwe, bakazwinyima zojiwa zhuba ilelo kuswikila madekwana, bakadusa zwibhayilo zwinopisiwa ne zwipo zwe mbakiso mbeli kwa Yahwe.

²⁷Baiziraela bakabhuzwa Yahwe, ngoti mu mazhuba iyawo Bhokisi le Tjidumano le Ndzimu lakabe lili yapo,

²⁸ngono Finiyasi nkololo wa Eliyaza ali nkololo wa Aroni ndiye wakabe e yendisa nshingo mu tjibaka itjetjo, bakabhuzwa beti, “Apa tiyende tinogwa kakale ne bakanyi kwedu Babhenjamini kene tiletje?” Yahwe bakashandula beti, “Yendani mangwana ndowobalonga mu maboko enyu.”

²⁹Baiziraela bakalalila Gibiya kuipoteleka.

³⁰Baiziraela bakatathila kunonginilila Babhenjamini kakale mu zhuba le butatu, bakazwilongolosa nge ngwa bakalinga Gibiya se misi yose.

³¹Babhenjamini bakabhuda kubashanganidza kugwa, ngono bakadusiwa mu nzi, koga se misi yose bakatangisa bulaya bamwe bathu kungabe balume bali makumi matatu (30) be Iziraela mu dzizila, imwe kuli inoyenda ku Bhetele imwe ku Gibiya.

³²Babhenjamini bakazwidwa bakati, “Tabakunda se misi yose.” Koga Baiziraela bakati, “Ngatitizheni tibaduse mu nzi, tibakwebele ku zila dzakazhuka.”

³³Balume bose be Iziraela bakabhuda pabakabe balipo, bakanoma nge ndongoloso ku Bhaaletama, ne balume be Iziraela bakabe bakalalila bakaputjumuka pabakabe balipo tjekunomila zhuba kwe Gheba.

³⁴Kukaswika balume bali zwiwulu zwili gumi (10 000) bakashalugwa mu Iziraela yose kunginilila Gibiya, ngwa ikasima, koga Babhenjamini bakasibone kuti mbatsha dzobawila.

³⁵Yahwe bakakunda Babhenjamini mbeli kwe Baiziraela, mu zhuba ilelo Baiziraela bakabulaya Babhenjamini bali zwiwulu zwili makumi mabili ana zwishanu ne bali zana (25 100), bose ibaba kuli be thumo.

³⁶Ndizo Babhenjamini bakabona kuti banokundiwa. Balume be Iziraela bakasedzela Bhenjamini, ngobe bakabe bakabiga muna bakabe bakalalila Gibiya.

³⁷Balume bakabe bakalalila bakati tjinyolotjo bakangina mu Gibiya, bakaandama bakabulaya nzi wose nge thumo.

³⁸Balume be Iziraela bakabe badumana ne bakalalila kuti bathame bhulubusi mu nzi,

³⁹ipapo balume be Iziraela banowoshanduka bakagwa. Babhenjamini bakabe batangisa bulaya balume banga bhata makumi matatu (30) be Baiziraela, ngono bakazwidwa bakati “Tobakunda se mu ngwa ye kutanga.”

⁴⁰Koga tjilakidzo tje bhulubusi tjakati tjimilika mu nzi, Babhenjamini bakashandukila shule bakabona busi gwe nzi wose guyenda pezhugwi.

⁴¹Ipapo balume be Iziraela bakashandukila mu bali, balume be Bhenjamini bakatemeka mafupa, ngobe babona kuti mbatsha dzabawila.

⁴²Ndizo bakatizha Baiziraela betizhila ku tjilambanyika, koga ngwa ikabakulila, ngono ibabo bakabe bebhuda mu mizi mikulu bakababulayila muili.

⁴³Bakakomba Babhenjamini, bakabatatamila bakababulaya kunoti ku Gibiya tjekunobhudazhuba.

⁴⁴Balume bali zwiwulu zwili gumi lina zwili zhanakadzi (18 000) bakabulawa, bose bali babhayani bakasima.

⁴⁵Bakatendebuka bakatizhila ku tjilambanyika tji ku shongwe ya Rimoni, balume bali zwiwulu zwili shanu (5 000) bakabulawa mu dzizila, bakadwilila bakatatamila Babhenjamini kunoti ku Gimoni, kukabulawa balume babo bali zwiwulu zwibili (2 000).

⁴⁶Ndizo Babhenjamini bose bakabulawa zhuba ilelo bakabe bali zwiwulu zwili makumi mabili ana zwili shanu (25 000) be thumo, bose bali babhayani bakasima.

⁴⁷Koga balume bali mazana ali tathatu (600) bakatendebuka bakatizhila ku tjilambanyika tjiku shongwe ya Rimoni, bakagala ko mimwedzi minna.

⁴⁸Balume be Iziraela bakabgwilila ku Babhenjamini, bakababulaya nge thumo, kose ne zwithuwo ne tjimwe ne tjimwe tjabakabe bewana. Bakapisa nge moto mizi yose yabakabe bengina muili.