Read Kalanga Basumikilisi 3 Bible Online

Basumikilisi 3 - Kalanga bible

Basumikilisi 3

¹Yezwi ndizo zwitjaba zwakasiyiwa ndi Yahwe kulika Baiziraela nazo bose bakabe basingazibe ngekwe ngwa mu Kanana,

²kwakabe kulikuti zwizekugwana zwe Baiziraela zwizibe ngwa, kuti badiye basakatongo ziba ngwa mu kutanga.

³Zwitjaba ndi yezwi, babusi bali bashanu be Bafilisitiya ne Bakanana bose ne Basidoni ne Bahivi bakabe begala mu Dombo le Lebhanoni, kudwa ku Dombo le Bhaalehemoni kunoti tjose ku nkoba we Hamati.

⁴Zwakasiyiwa kuli kulika Baiziraela kubona kuti kene banowotobela milayo ya Yahwe yabakapa bo batategulu babo ndi Mushe.

⁵Bathu be Iziraela bakagala pakati kwe Bakanana ne Bahiti ne Baamoni ne Baperizi ne Bahivi ne Bajebusi,

⁶ngono bakatola bakololokadzi babo kube bakadzi babo, ngono bakapa bakololo babo bakololokadzi babo, bakashingila midzimu yabo.

⁷Bathu be Iziraela bakathama mbipo mu mesho a Yahwe, bekangang'wa Yahwe Ndzimu wabo, beshingila bo Bhaale na bo Ashera.

⁸Ndizo bushongola gwa Yahwe gukathutila Baiziraela, ngono bakabatengesa mu maboko a Khushanirishathaimu mambo we Misopotamiya, ngono bathu be Iziraela bakashingila Khushanirishathaimu kwe makole ali zhanakadzi.

⁹Koga kwakati Baiziraela belilila kuna Yahwe, Yahwe baka bamusila nsununguli kuba sunungula, iye Othiniyeli nkololo wa Kenazi nnung'una wa Khalebu.

¹⁰Meya ya Yahwe ikazha munli ngono kasumikilisa Iziraela, kayenda ku ngwa, ngono Yahwe bakalonga Khushanirishathaimu mambo we Misopotamiya mu luboko gugwe, ngono Othiniyele kankunda.

¹¹Ndizo shango ikabe nge kunyalala kwe makole ali makumi manna (40). Ipapo Othiniyele nkololo wa Kenazi kafa.

¹²Ngono Baiziraela bakathama mbipo mu mesho a Yahwe kakale, Yahwe bakasimisa Egiloni mambo we Moabu kugwa ne Iziraela, ngoti bakathama mbipo mu mesho a Yahwe.

¹³Kazwikubunganyila Baamoni ne Baamaleki kanonginilila Baiziraela bakatapa nzi nkulu we milala.

¹⁴Ngono Baiziraela bakashingila Egiloni mambo we Moabu kwe makole ali gumi lina ali zhanakadzi (18).

¹⁵Koga kwakati Baiziraela belilila kuna Yahwe, Yahwe bakabamusila nsununguli unoyi Ehudi nkololo wa Gera we Mbhenjamini, nlume we tjimeshwe. Baiziraela bakatumila lukhetho kuna Egiloni mambo we Moabu ndiye.

¹⁶Ehudi kazwithamila bukanu guno pitsha midzibo mibili gwe bulefu gwe luboko ngono kagudedela mu tjidzwa tje luji kusi kwe zwiambalo zwizwe.

¹⁷Ngono kayesa lukhetho kuna Egiloni mambo we Moabu, wakabe ali nlume wakakola kwazo.

¹⁸Kwakati Ehudi asina kuyisa lukhetho, kapaladza bathu bakabe bakasenga lukhetho.

¹⁹Shule iye kashanduka pa zwifano zwe midzimu zwipa Giligala kadwa mambo kati, “Ndina dama lenyu le ikohwa imwi mambo,” Mambo bakabe beti, “Zhoba.” Bose bakabe banaye bakabhudila kuzhe.

²⁰Ehudi kazha kubali kwabakabe baligele baliboga ku ng'umbana itjapezhugwi inotothola, ngono Ehudi kabadwa kati, “Ndina ndayidzo yenyu inodwa ku Ndzimu.” Mambo bakamilika mu tjigalo tjabo.

²¹Ehudi kalonga luboko gugwe gwe lumeshwe kashomola bukanu mu tjidzwa tjitje tje luji ngono kagulobelela mu ntumbu wa mambo,

²²bukanu gukangina kose ne mpinyana wago, gukanoputja ku ikamba. Ehudi kasishomole bukanu ngono gukazwimbiwa nge lizwizwi, ngono shambgwa ikabhuda.

²³Ipapo Ehudi kabhudila ku ng'umbana itjambeli, kazhalila mikoba ye ng'umba ipezhugwi shule kukwe ngono kadzikhiya.

²⁴Kwakati atjiyenda, balanda babe bakazha bakawana mikoba ye ng'umba itjapezhugwi yakakhiyiwa ngono bakakumbula beti, “Pamwe batjasununguka mu ng'umbana itjamukati inotothola.”

²⁵Ngono bakalinda kuswikila bepelameya, kwakati mambo basingazhule mikoba ye ng'umba, bakatola khiyi bakakhiyinula mikoba, bakawana tetshi wabo alilele pasi aka fa.

²⁶Bakati batjakalinda, Ehudi katizha kasiya. Wakapinda pa zwifano zwe midzimu, etizhila ku Seira.

²⁷Wakati eswika kalidza lunyanga mu shango ye matuthu ya Ifureimi, bathu be Iziraela bakadelukila naye bedwa ku shango ye matuthu akabatungamila.

²⁸Kabadwa kati, “Mundisale shule, ngoti Yahwe balonga zwita zwenyu Bamoabu mu maboko enyu.” Ndizo bakadelukila bakansalashule, bakatolela Bamoabu maambuko e gwizi gwe Jorodani, kusina wabanodumila ku tjuluka.

²⁹Mu tjibaka itjetjo bakabulaya balume bali zwiwulu zwili gumi be Moabu (10 000), bose bakazwilizanila bakasima, akuna wakatizha.

³⁰Ndizo Moabu yakayisiwa pasi kwe Iziraela zhuba ilelo. Shango ikabe nge kunyalala kwe makole ali makumi ali zhanakadzi (80).

³¹Shule kwa Ehudi kukazha Shamaga nkololo wa Anati iye wakabulaya balume bali mazana ali tathatu (600) be Bafilisitiya nge ikombo tje ng'ombe, naiye waka sunungula Baiziraela.