Read Kalanga Basumikilisi 5 Bible Online

Basumikilisi 5 - Kalanga bible

Basumikilisi 5

¹Mu zhuba ilelo Debora na Baraki bakamba lumbo gwe mboko beti,

²“Ngoti batungamili bakatungamila Iziraela, ngoti bakazwipa nge moyontjena, kudzani Yahwe.

³Ihwani imwi bomambo, teedzani imwi babusi. Ndowombila Yahwe, ndowothamila Yahwe Ndzimu we Iziraela njimbo.

⁴“Imwi Yahwe makati mubhuda mu Seyiri, mutshamba mutshambuka mubhuda mu shango ye Edomu, shango yakatengenyeka, zhuzhugwi likadotha, makole akatebula vula.

⁵Matombo akatetema mbeli kwa Yahwe, ilo Dombo le Sinai mbeli kwa Yahwe Ndzimu we Iziraela.

⁶“Mu mazhuba a Shamaga nkololo wa Anati, mu mazhuba a Jayeli zila dzakafupatigwa bapindi bakayendila ntome kwe zila.

⁷Kwakabe kusheteka babusi mu Iziraela bakabebapela kudzina ndimuka imi Debora, ndimuka ndili mme be Iziraela.

⁸Kwakati kushalugwa midzimu mitshwa, kukabe nge ngwa ku mikoba ye nzi nkulu, apa tjivikisi ne thumo zwakatongoboneka pakati kwe zwiwulu zwili makumi manna (40 000) mu Iziraela?

⁹Moyowangu unoyenda ne balauli be Iziraela bakazwipila nge moyontjena mu bathu. Kudzani Yahwe.

¹⁰Lebani nge kwako imwi bakatatha madonki matjena, bagele mu thobo dzakalukwa imwi banoyenda mu zila,

¹¹Teedzani mahwi e bambi baku madziba anodilidzila kwabanokudzila mishingo ya Yahwe yakalulwama mishingo yakalulwama ye babhayani babe mu Iziraela. “Ipapo bathu ba Yahwe bakadelukila ku mikoba ye nzi.

¹²Muka, muka, Debora Muka, muka, dusa lumbo. Milika, Baraki, utape batapiwa babo, iwe nkololo wa Abinoyamu.

¹³Ngono malimbelimbe e banokudziwa akadeluka, ngono bathu ba Yahwe bakazha kundili bana babhayani.

¹⁴Bamwe bakadwa kuna Ifureimi bakabe bakabaka mu Amaleki, Bhenjamini wakabe una bathu bakakutobela. Kudwa ku Makiri, balauli bakadeluka kudwa ku Zebuluni kuli banobhata ludozo gwe ntungamili.

¹⁵Balauli ba Isakari bakabe bana Debora, ngono Isakari wakabe ana Baraki, bakabe bakansalashule ku nkuku. Mu njudzi dza Rubheni kwakabe kuna kushakisisa kukulu kwe moyo.

¹⁶Wakabe uligelileni ku matanga e pkhwizi, wakabe ushaka hwa milidzo ye ngubi? Mu njudzi dza Rubheni kwakabe kuna kushakisisa kukulu kwe moyo.

¹⁷Giliyadi wakagala seli ye Jorodani, ini Dani iye akagala pa migoro ye vula? Asheri kasala pa tjekelo dze gungwa kagala panowunga vula.

¹⁸Bazebuluni bathu bakalonga matjilo abo mu mbatsha ne Banafutali bakajalobo mu shango dzakatathila.

¹⁹“Kwakazha bomambo bakagwa, bomambo be Kanana bakagwa ku Taanaki pa vula dze Megido bakasitape thundu ye siliva.

²⁰Kudwa kudzimu nyenyedzi dzakagwa mu zila dzakagwa na Sisera.

²¹Gwizi gwe Kishoni gukabakubila kutjena, gwizi gwa ntolo, gwizi gwe Kishoni. Meya yangu, tshamba ne simba.

²²Kukabe nsindo we thozo dze mbizi ne matha matha kwe mbizi dzidze.

²³“Longani bhiso mu nzi we Merozi, koleba ntumwa wa Yahwe longani bhiso bagali bawo, ngobe abazozha kubhatsha Yahwe, kubhatsha Yahwe muna banasimba.

²⁴“Ngakukombolegwe Jayeli kwazo muna betjikadzi nkadzi wa Hebha we N'keni, wakakombolegwa mu bakadzi banogala mu mishasha.

²⁵Sisera wakakumbila vula, ngono Jayeli kampa nkaka, kanzhisila mashwe nge ndilo ya botetshi.

²⁶Kayisa luboko ku lubambo gwe nshasha, luboko gwe luji kaguyisa ku hamuli ye bashingi kaloba Sisera, kankwiya nsholo, kambhaya kusi kwe zebe.

²⁷Kawila pasi, katimbama, kakandalala pa makumbo awe. Katimbama kawila pasi pa makumbo awe, paakakandalalila, kafilapo.

²⁸“Mme ba Sisera bakashozhela nge fesitere, bakalila bali shule kwe tjisitilo. ‘Ini koloyi iye ye ngwa inonoka kuzha? Ini misindo ye mbizi isingaswike?’

²⁹Mmwe we bakatjenjela we bakololokadzi babe kandabila, ngono naiye kazwidwa eti,

³⁰‘Apa abazowana thundu ngono batjaikobana? Kuti mmwe ne mmwe nlume atole mwanadi kene babili, thundu ye zwiambalo zwakanakisiwa zwa Sisera, zwiambalo zwakanakisiwa zwakakwagwa, zwakakwagwa zwe ntengo upezhugwi, thundu ye ntshiba wangu kene?’

³¹“Atshene zwita zwenyu zose zwingalobesiwa, imwi Yahwe. Koga atshene banomuda bakanga zhuba libhuda nge simba lalo.” Ngono shango ikabe nge kunyalala kwe makole ali makumi manna (40).