Read Kalanga Basumikilisi 6 Bible Online

Basumikilisi 6 - Kalanga bible

Basumikilisi 6

¹Ngono bathu be Iziraela bakathama mbipo kakale mu mesho a Yahwe, ngono Yahwe bakabalonga mu maboko e Bamidiyani kwe makole ali kutendeka.

²Ngoti simba le Bamidiyani lakatshambilidza Baiziraela, Baiziraela bakazwibakila mishasha mu matombo nemu makuwu ne matizhilo.

³Kwakabe kuti apa Baiziraela badzwala, Bamidiyani ne Baamaleki ne bathu be kubhezhuba bakabezha bebanginilila,

⁴bakakomba shango bekolomodza zwidzwalo kunoti tjose ku Gaza ngono kusina zojiwa zwabanosiyila Baiziraela, kene iyo pkhwizi kene ng'ombe kene donki.

⁵Bakabe bebuya ne ng'ombe dzabo ne mishasha yabo bali nlunda se phashu nge bunji, ibo kose ne kamela dzabo bakabe basingabalike. Bakanginilila shango bakaithukudza.

⁶Bamidiyani bakapedza Baiziraela simba kwabakadzina bakalilila bhatsho kuna Yahwe.

⁷Kwakati Baiziraela balilila kuna Yahwe ngekwe Bamidiyani,

⁸Yahwe bakatumila nlebesambeli ku bathu be Iziraela, ngono kabadwa kati, “Tjinoleba Yahwe Ndzimu we Iziraela ndiyetji, ndakamudusa mu Egipiti, ndimudusa mu busungwa,

⁹ndakamusunungula mu luboko gwe Baegipiti ne mu luboko gwa bose bakamutshambilidza, ngono ndikabatata mbeli kwenyu ndikamupa shango yabo,

¹⁰ngono ndakamudwa nditi, ‘Ndimi Yahwe Ndzimu wenyu, musitongo thigamila midzimu ye Baamoni, ibo be shango yamunogala.’ Koga amuzonditeedza.”

¹¹Ntumwa wa Yahwe kazha kagala kusi kwe nti we N'oko ku Ofira nzi wa Joashi we Abiyezeri, pakabe Gidiyoni e pulila mathunde kunuswinigwa nkumbi we zhambi, ku asumbikila Bamidiyani.

¹²Ngono Ntumwa wa Yahwe kazwilakidza kuna Gidiyoni ngono ukandwa uti, “Yahwe banawe, iwe mbhayani wakasima.”

¹³Gidiyoni kashandula eti, “Au, Apa Yahwe banaswi, nekutini ngono tashingikaligwa nge tjakajali kene? Matjenamiso abo wose angayi atakabudziwa ndi bobatategulu bedu beti, ‘Apa Yahwe abazotidusa ku Egipiti kene?’ Koga ngwenu Yahwe batilasha, ngono batilonga mu maboko e Bamidiyani.”

¹⁴Ngono Yahwe bakatendebukila kunli bakati, “Yenda mu simba launalo ngono usunungule Baiziraela mu luboko gwe Bamidiyani, Apa anditokutuma kene?”

¹⁵Ngono Gidiyoni kati, “Apa ndowosunungula Baiziraela tjini kene? Bonani, Ludzi gwangu gutukununu pana gwa Manase, kakale ndimi ntjetjana mu bana batate.”

¹⁶Yahwe bakandwa beti, “Koga ndowobenawe, unowokunda Bamidiyani kukanga ungati nthu ung'ompela.”

¹⁷Gidiyoni kashandula eti, “Ha ndawana mahwilongoni mu mesho enyu, mundipe tjilakidzo tjekuti ndimwi munolebeleka nami.

¹⁸Ndokumbila musiyende kuswikila ndibuya ndizhisa tjibhayilo nditjibiga mbeli kwenyu.” Yahwe bakashandula beti, “Ndowolinda kuswikila ushanduka.”

¹⁹Ndizo Gidiyoni kangina mu ng'umba kalulwamisa tjibudzana ne tjiwunga tjisina mbidzo tje bgwisa gwe efa. Kalonga nyama mu itundu, kadila sopo mu hali, kazwiyisa ku nli kusi kwe N'oko, kazwibiga panli.

²⁰Ngono ntumwa we Ndzimu kandwa kati, “Tola nyama ne tjiwunga tjisina mbidzo uzwibige mu shongwe iyeyi, ngono utebulile sopo muzwili.” Ngono kathama eyijalo.

²¹Ipapo ntumwa wa Yahwe katola ludozo gwaakabe akabhata, kashwaya nyama ne tjiwunga tjisina mbidzo nge theswi yago, ngono kukathuta moto mu shongwe ukaja nyama ne tjiwunga tjisina mbidzo, ngono ntumwa wa Yahwe kanyelela mu mesho awe.

²²Kwakati Gidiyoni atjibona kuti kwabe kuli ntumwa wa Yahwe kati, “Yee mme wee! She Yahwe bangu! Ndabona ntumwa wa Yahwe takalingisanya njiso.”

²³Koga Yahwe bakandwa beti, “Kunyalala kube nawe, usitje autowofa.”

²⁴Ndizo Gidiyoni kabakila Yahwe tjibeso tjinopisigwa zwibhayilo ikoko ngono katjidana eti Yahwe ndibo kunyalala. Nanasi tjitji ku Ofira ye Baabiyezeri.

²⁵Busiku igogo Yahwe bakandwa beti, “Tola nkono wa tate babo we bubili una makole ali kutendeka, ngono ulige tjibeso tjinopisigwa zwibhayilo tja Bhaale itjo tate babo tjabanatjo, utemele pasi ndzimukadzi Ashera u hwunde natjo,

²⁶ngono ubakile Yahwe Ndzimu uwo tjibeso tjinopisigwa zwibhayilo pakatuthumala, u walile nge mabgwe, kudwapo utole nkono we bubili kube tjibhayilo tjinopisiwa nge hwuni dze ndzimukadzi Ashera dzaunowotemela pasi.”

²⁷Ndizo Gidiyoni katola balume bali gumi be balanda babe ngono kathama sekwa abudziwa ndi Yahwe, ngoti wakabe etja be nsha uwe kwazo ne balume be nzi nkulu kuthama masikati, wakathama busiku.

²⁸Kwakati balume be nzi nkulu bemuka kuli mangwanana, bonani, tjibeso tjinopisigwa zwibhayilo tja Bhaale tjikabe tjakaligwa, ngono ne ndzimukadzi Ashera hwunde yatjo akaligiwa, ndizo nkono we bubili ukadusiwa se tjibhayilo pezhugwi kwe tjibeso tjinopisigwa zwibhayilo tjakabakiwa.

²⁹Ngono bakabhuzwana beti, “Ndiyani wathama ikoko?” Ngono kwakati bashakisisa nge kwako, bakati, “Gidiyoni nkololo wa Joashi wathama ikoko.”

³⁰Ngono balume be nzi nkulu bakadwa Joashi bakati, “Zhisa nkololo uwo, timbulaye, ngoti wakaliga tjibeso tjinopisigwa zwibhayilo tja Bhaale katema ndzimukadzi Ashera hwunde natjo.”

³¹Koga Joashi kadwa bose bakabebakampoteleka kati, “Apa molebelekela Bhaale kene? Apa mombakilila kene? Iye unonlebelekela unowobulawa kuli mangwanana. Apa ali ndzimwana, ngaazwilebelekele ngoti tjibeso tjitje tje zwibhayilo tjaligiwa.”

³²Ndizo zhuba ilelo Gidiyoni wakadang'wa Jerubhaale, ndiko kuyi, “Bhaale ngaagwe naye,” ngoti wakaliga tjibeso tjitje tje zwibhayilo.

³³Ipapo bathu bose be Midiyani ne Amaleki ne bathu be kubhezhuba bakashangana, ngono bakatjuluka gwizi gwe Jorodani bakakotokela pa nkuku wa Jezirele.

³⁴Ngono Meya ya Yahwe ikazha muna Gidiyoni, kalidza lunyanga, ngono kadana Baabiyezeri kunsala shule.

³⁵Ngono katuma batumwa mu Manase yose, ngono naibobo bakadang'wa kunsala shule. Katuma batumwa ku ludzi gwa Ashera ne gwa Zebuluni ne gwa Nafutali, ngono bakatathila kubashanganidza.

³⁶Gidiyoni kadwa Ndzimu kati, “Apa munga sunungula Iziraela nge luboko gwangu sekwa makagadzabgwe,

³⁷Bonani, ndobiga debgwe mu lubuwa. Ha kungabe ne khawa koga mu debgwe ngono pasi kwakawoma, ipapo ndowoziba kuti mowosunungula Iziraela nge luboko gwangu, sekwa makaleba.”

³⁸Ngono kukashingikala kuyijalo. Kwakati emuka tjimuka mangwanana kaswina debgwe, kukabhuda vula inozhala ndilo.

³⁹Ipapo Gidiyoni kadwa Ndzimu kati, “Musindigwadzilemoyo. Ndina kumbilo yandinoshaka thama, mundidumile ndilike kakale nge debgwe, ndokumbila muthame kuti debgwe liwome, ngono pasi kube ne khawa.”

⁴⁰Ngono Ndzimu bakathama beyijalo busiku igogo, debgwe lakabe lakawoma, ngono pasi kuna khawa.