Read Kalanga Basumikilisi 7 Bible Online

Basumikilisi 7 - Kalanga bible

Basumikilisi 7

¹Kukati kutji mangwanana, Jerubhaale, iye Gidiyoni kose ne bathu bose bakanokotokela ku tshime le Harodi. Ngono bukotokelo gwe Bamidiyani gwakabe guli ku bunandzwa gwabo pa duthu le More mu nkuku.

²Yahwe bakadwa Gidiyoni bakati, “Bathu baunabo banjisa kundili kuti ndilonge Bamidiyani mu maboko abo, kusiti pamwe Baiziraela bedwa bezwikudza beti, ‘Tazwitjidza ngekwedu.’

³Ndizo ngweno zibisa bathu uti, ‘Iye unotja ngotetema ungashanduka kabhuda mu Dombo le Giliyadi.’ ” Ndizo kukashanduka bathu bali zwiwulu zwili makumi mabili ana zwibili (22 000), kukasala bali zwiwulu zwili gumi (10 000).

⁴Koga Yahwe bakadwa Gidiyoni bakati, “Bathu batji banji kwazo, ubayise ku vula ndowobatapudza ikoko. Ha nditi, ‘Iwoyu wakafanila yenda nawe, ngaayende,’ koga ha nditi, ‘Iwoyu aazofanila yenda nawe,’ ngaasiyende.”

⁵Ndizo Gidiyoni kadelusila bathu ku vula, ngono Yahwe bakadwa Gidiyoni bakati, “Uthubukanye banokaswa vula nge lilimi se mbgwa ne banothigama pasi be ng'wa vula.”

⁶Balume bali mazana matatu (300) bakang'wa vula nge maboko bekaswa se mbgwa, ngono bose koga bakang'wa vula bakathigama.

⁷Ngono Yahwe bakadwa Gidiyoni bakati, “Nge balume bali mazana matatu (300) bakaswa ndowokusunungula ndikalonga Bamidiyani mu maboko awo. Letja bamwe bose babgwilile, mmwe ne mmwe kanyi kukwe.”

⁸Ndizo Gidiyoni katola zwija zwe bathu mu bali ne manyanga abo ngono kashandusila bose ku mishasha yabo. Kasala nge bali mazana matatu. Bukotokelo gwe Bamidiyani gwakabe guli kusi kukwe mu nkuku.

⁹Mu busiku igogo Yahwe bakandwa bakati, “Milika, delukila pasi unonginilila bukotokelo, ngoti ndagulonga mu maboko awo.

¹⁰Koga ha utja kudelukila, delukila pasi ku bukotokelo na Pura nlanda uwo,

¹¹ngono muteedze tjabanoleba. Shule kwa ipapo mowobe makasima kudelukila pasi munonginilila bukotokelo.” Ipapo kadelukila pasi na Pura nlanda uwe ku bukotokelo gwe balume bakadedela zwibhayano.

¹²Bamidiyani ne Baamaleki ne bathu bose bekubhezhuba, bakabe baligele mu nkuku, balibanji se phashu, ne kamela dzabo dzisingabalike se nsetje we tjekelo dze gungwa.

¹³Kwakati Gidiyoni ezha, kawana nlume atjaleba woloto lile ku nzwalani uwe eti, “Bona, ndakawolota tjiwunga tje bhali tjikungulukila mu bukotokelo gwe Bamidiyani. Tjakaloba nshasha nge simba gulu ngono nshasha ukawa ukakolomoka.”

¹⁴Ngono nzwalani uwe kanshandula eti, “Ikoku akungabetjimwe kuzhe kwe thumo la Gidiyoni nkololo wa Joashi we N'iziraela. Ndzimu balonga Bamidiyani ne mbunga wose mu maboko awe.”

¹⁵Kwakati Gidiyoni ehwa woloto kose ne tjeneso yalo, kanamata Ndzimu. Kabgwilila ku bukotokelo gwe Iziraela ngono kadana eti, “Milikani, ngoti Yahwe balonga mbunga we Bamidiyani mu maboko enyu.”

¹⁶Ngono kathubukanya balume bali mazana matatu nge makupo matatu, kabiga manyanga ne majegwa asina tjimwe mu maboko abo bose, kuna mavone mu majegwa.

¹⁷Ngono kabadwa kati, “Mundilinge, muthame tjandinothama. Ha ndiswika pa ndzibo we bukotokelo, muthame sekwa ndinothama.

¹⁸Ha ndilidza lunyanga kose naibabo bandinabo, namwibo mulidzebo ku midzibo yose ye bukotokelo, ngono mumimile muti, ‘Ngwa ya Yahwe ne ngwa ya Gidiyoni.’ ”

¹⁹Ndizo Gidiyoni ne balume bali zana (100) bakabe banaye bakaswika ku ndzibo we bukotokelo kutja bigiwa balindi be busiku, bakati batjibiga balindi, bakalidza nyanga dzabo bakapkhwanya majegwa akabe ali mu maboko abo.

²⁰Ngono makupo matatu akalidza nyanga dzawo bakapkhwanya majegwa, bakabhata mavone nge maboko abo e lumeshwe, nyanga bakadzibhata nge maboko abo e luji kudzilidza, ngono bakamimila beti, “Thumo la Yahwe ne la Gidiyoni.”

²¹Bakama, nlume mmwe ne mmwe pa magalo awe bakakomba bukotokelo, ngono ngwa yose ikalabuka, bakalila bakatizha.

²²Kwakati belidza nyanga dzili mazana matatu, Yahwe bakathama kuti balume bamubukotokelo bamukilane batemane nge mathumo abo. Ngwa ikatizhila ku Bhetishita kulingisana ne Zerera kunoti ku ngathu we Abelimehola hwunde ye Tabhati.

²³Ngono balume be Iziraela bakadang'wa kudwa ku Nafutali ne Asheri ne Manase yose ngono bakatatamila Bamidiyani.

²⁴Ngono Gidiyoni katumila batumwa mu shango ye matuthu yose ye Ifureimi eti, “Delukilani pasi ngeno mudzibilidze Bamidiyani mubakilile vula kunoti tjose ku Bhetibhara ne Jorodani.” Ndizo balume bose be Ifureimi bakadang'wa ngono bakabakilila vula kunoti tjose ku Bhetibhara ne ku Jorodani.

²⁵Bakatapa batungamili babili be Bamidiyani, kuli Orebu na Zibi. Bakabulayila Orebu ku shongwe ya Orebu, ngono Zibi bakambulayila ku tjiswinilo tje nkumbi tja Zibi. Bakatatamila Bamidiyani ngono bakabuya ne nsholo wa Orebu ne wa Zibi kuna Gidiyoni seli ye Jorodani.