Read Kalanga Basumikilisi 8 Bible Online

Basumikilisi 8 - Kalanga bible

Basumikilisi 8

¹Ngono balume be Ifureimi bakadwa Gidiyoni beti, “Ini utibhata uyijali? Ini wabe usatidana uyenda kunogwa ne Midiyani?” Ngono bakansapula kunogwadza.

²Ngono kabadwa kati, “Ini tjandathama ha ndifanidzanyiwa namwi? Apa mamburumburu e zhambi dza Ifureimi aatoyita pa zhambi dzakatjegwa dza Abiyeza kene?

³Ndzimu balonga batungamili babili be Bamidiyani mu maboko enyu, Orebu na Zibi, imi ndakathamani tjingafanidziwa namwi?” Bakati behwa ikoku, gwadzamoyo kwabo kukatebama.

⁴Gidiyoni ne balume bali mazana matatu bakaswika ku Jorodani, bakatjuluka nenguba bakabe banyala bakadwilila ne tatamila.

⁵Ndizo kadwa balume be Sukoti kati, “Ipa ngwa yangu tjiwunga ngoti banyala ngono ndakatatana na Zebha na Zalimuna bomambo be Bamidiyani.”

⁶Ngono batungamili ba Sukoti bakandwa bakati, “Apa Zebha na Zalimuna batjibe mu maboko awo kale kwatingapa ngwa iyo tjiwunga kene?”

⁷Ngono Gidiyoni kashandula eti, “Kwakalulwama, hapa Yahwe bangalonga Zebha na Zalimuna mu luboko gwangu, ndowopalulanya nyama dzenyu nge mimiwa ye tjilambanyika ne tjing'ang'a.”

⁸Ngono kudwa ipapo katathila ku Penuweli, ngono naibo kabakumbila. Ngono balume be Penuweli bakadabila koga se be Sukoti.

⁹Ngono kadwa balume be Penuweli kati, “Apa ndishanduka nge mbakiso, ndowoliga thungamakole iyeyi.”

¹⁰Ipapo Zebha na Zalimuna bakabe bali mu Karikori nge ngwa yabo, ana balume bangabhata zwiwulu zwili gumi lina bushanu (15 000) kuli bose bakabe basala bengwa ye bathu be kubhezhuba, ngoti kwakabe kwa wa balume bali zwiwulu zwili zana lina makumi mabili (120 000) banosenga thumo.

¹¹Ngono Gidiyoni kabhuda nge zila ye bagali be mishasha, kunobhuda zhuba kwe Nobha ne Jogibheha ngono kanginilila ngwa ngoti yakabe itjakafala.

¹²Ngono Zebha na Zalimuna bomambo babili be Midiyani bakatizha, kabatatamila kababhata kabatapa, ngono ngwa yose ikashangashangana.

¹³Gidiyoni nkololo wa Joashi kashanduka ku ngwa nge nkoto we Heresi.

¹⁴Ngono kabhata nzhuzha we Sukoti ngono kanbhuzwa, ngono nzhuzha kankwalila mazina e batungamili be Sukoti bali makumi ali kutendeka ana kutendeka (77).

¹⁵Ndizo Gidiyoni kazha kubalume be Sukoti kabadwa kati, “Bonani, Zebha na Zalimuna ibo bamakandi gongobola ngekwabo muti, ‘Apa Zebha na Zalimuna batjibe mu maboko awo kale kwatingapa ngwa iyo yakanyala tjiwunga kene?’ ”

¹⁶Ngono katola bakulu be nzi nkulu ngono katola mimiwa ye tjilambanyika ne tjing'ang'a ngono kabadiya ndizo.

¹⁷Ngono kaliga thungamakole ye Penuweli ngono kabulaya balume be nzi.

¹⁸Ngono kabhuzwa Zebha na Zalimuna eti, “Bangayi balume bamaka bulaya ku Tabori?” Bakashandula beti, “Sekwa uli iko koga, mmwe ne mmwe wakabe elingika se nkololo wa mambo.”

¹⁹Gidiyoni kashandula eti, “Kwakabe kuli bakulu bangu, bana ba mme. Ndotuna na Yahwe banotjila nditi, alobe makabemabatjidza ndabendisowomubulaya.”

²⁰Ngono kadwa Jetha mbano iye kati, “Milika ubabulaye.” Koga Jetha kasishomole thumo lile ngoti wakabe etja ngobe atji ntjetjana.

²¹Ipapo Zebha na Zalimuna bakandwa bakati, “Milika utibulaye ngekuko, ngoti simba le nlume lolizana nge mbubiko iye.” Ngono Gidiyoni kamilika kabulaya Zebha na Zalimuna, katola ndalama dzakabe dzili mu mitshiba ye kamela dzabo.

²²Ngono Baiziraela bakadwa Gidiyoni bakati, “Uti buse, iwe ne nkololo uwo ne mwana we mwana uwo, ngoti watitjidza mu luboko gwe Bamidiyani.”

²³Gidiyoni kabadwa kati, “Anditowomubusa, ne nkololo wangu aatowomubusa. Yahwe banowomubusa.”

²⁴Gidiyoni kabadwa kati, “Ndoshaka kumukumbila tjimwe, mmwe ne mmwe wenyu andipe ng'ina mu thundu iye yatapiwa.” Ngobe kwakabe kuna mang'ina e golide ngoti bakabebali Baishimaeli.

²⁵Ngono bakashandula beti, “Towokupa ngekushatha.” Ndizo bakawala jila ngono mmwe ne mmwe kalashila ng'ina kudwa mu thundu ya atapa.

²⁶Ngono bulemo gwe mang'ina aakakumbila gukabe shekele dzili tjiwulu tjina mazana ali kutendeka (1 700), kuzhe kwe ndalama ne zwinonakisa zebe ne zwiambalo zwe bushaba gwakabondelela zwinombagwa na mambo we Bamidiyani, na kuzhe kwe ketani dzakabe dzili mu mitshiba ye kamela dzabo.

²⁷Ngono Gidiyoni kathama Efodi ye golide kaibiga mu nzi uwe mu Ofira. Ngono Baiziraela bakathama bupombgwe ngokuithigamila se ndzimwana, ngono kukabe bhuzhu kuna Gidiyoni ne bensha uwe.

²⁸Ndizo Bamidiyani bakayisiwa pasi mbeli kwe Baiziraela ngono bakasitjaduse nsholo kakale. Shango ikabe nge kunyalala kwe makole ali makumi manna mu mazhuba a Gidiyoni.

²⁹Shule kwe ngwa, Jerubhaale iye Gidiyoni nkololo wa Joashi kayenda kanogala mu ng'umba iye.

³⁰Gidiyoni wakabe ana bakololo bali makumi ali kutendeka (70) kuli bana babe, ngoti wakabe ana bakadzi banjinji.

³¹Tjamba tjitje tjakabe tjigala mu Shekemu tjakanzwalilabo nkololo ngono kandana eti Abimeleki.

³²Gidiyoni nkololo wa Joashi kafa atjikwegula ngono kabiganyiwa mu ikumbu tja tate babe Joashi ku Ofira we Baabiyezeri.

³³Kwakati koga Gidiyoni atjambofa, bathu be Iziraela bakashanduka kakale bakathama bupombgwe na bo Bhaale. Bakabiga Bhaaleberiti kube ndzimu wabo.

³⁴Ngono bathu be Iziraela bakasitjakumbule Yahwe Ndzimu wabo iye wakabasunungula mu maboko e zwita zwabo kudwa mu midzibo yose.

³⁵Bakakong'wa lakidza lubu kuna bensha wa Jerubhaale iye Gidiyoni mu zwithu zwakanaka zwaakathamila Iziraela.