Read Kalanga 2 Johani 1 Bible Online

2 Johani 1 - Kalanga bible

2 Johani 1

¹Ndimi nkulu we gubungano. Ku nfumakadzi[1] wakashalugwa kose ne bana babe, bandinoda mu malebeswa, kusi imi koga na bose banoziba malebeswa,

²nge zila ye malebeswa agele mutili kakale anowobe naswi nge kusingapele kose.

³Ngoni ne mahwilozogwadza ne mbakiso zowobe naswi kudwa ku Ndzimu Tate nenge kuna Jesu Kirisiti Nkololo wa Tate, mu malebeswa ne ludo.

⁴Ndakashatha kwazo kuwana bamwe be bana babo belondolodza malebeswa koga sekwa takadwiwa ndi Tate.

⁵Ngono ngwenu ndokukumbila, iwe nfumakadzi, ndisingange ndinokukwalila nlayo ntshwa. Ndokukwalila ngekwe nlayo watakahwa mu kutangisa, unoti tidane.

⁶Ludo ndi wogu, kuti titobele milayo yabo; nlayo ndiwoyu, sekwa makahwa mu kutangisa, makafanila tjilila mu ludo.

⁷Batjebeli batjibe banjinji mu shango, ibabo basingadume kuti Jesu Kirisiti wakazha ali nthu. Nthu mmwe ne mmwe wakajalo ntjebeli kakale tjita tja Kirisiti.

⁸Muzwitjengete kuti musilashikigwe nge tjamakashingila, koga muzwiwanile mbhayilo.

⁹Iye unodwilila asingatobele zwidiyo zwa Kirisiti aana Ndzimu. Iye unodwilila nge kutobela zwidiyo una Tate ne Nkololo.

¹⁰Ha kuli kuti kuna ungazha kumuli asingazhise zwidiyo izwezwi, musitongo n'amutjila mu ng'umba dzenyu nenguba kuli kun'dumilisa;

¹¹ngobe kudumilisa nthu wakajalo kobe kuli kushanganyila naye bubi gwe mishingo iye.

¹²Nenguba ndina zwithu zwinjinji zwandakafanila kumukwalila nge kwazo, anditowoshingisa pampiri ne inki, koga ndogalabgwe kuti ndowozha kuwomubona kuti ndilebeleke namwi takalingisana, kuti ndizo kushatha kwedu kupelele.

¹³Bana be hazwadzi iyo yakashalugwa banomudumilisa.