Read Kalanga Judi 1 Bible Online

Judi 1 - Kalanga bible

Judi 1

¹Ndimi Judi, nlanda wa Jesu Kirisiti, ndili nnung'una wa Jakubo. Ndokwalila ibabo bakadang'wa, banodika mu Ndzimu Tate, koga bakatjengetigwa Jesu Kirisiti:

²Mahwilo ngoni ne mbakiso ne ludo ngazwibe namwi zwimuwandile.

³Badiwa, nenguba ndakabe ndishaka kwazo kumukwalila ngekwe jidzo latinalo tose, ndawana kwakalingisana kumukwalila ndimukulumbidza kugwila kugalamoyo ikoku kwati kukapiwa bayengemali.

⁴Bathu bamwe bakati kulobesiwa kwabo kukakwagwa ntolo bamunginilila nge kwakasumbikika. Bathu banonyanyayidza Ndzimu, banoshandula ngoni dze Ndzimu wedu bedzithama bugovu, bezwilandula Tetshi wedu nng'ompela koga, iye She Jesu Kirisiti.

⁵Kene muziba zwenyu ikoku kose kale, ndoshaka kumukumbuludza kuti iye wakasunungula bathu mu Egipiti, wakati shule kalobesa ibabo bakabe basingagalemoyo.

⁶Ne batumwa be kudzimu basakatjengeta mamo abo koga bakasiya nzi wabo, wakababiga mu zhalima mu busungwa gusingapele kuti basumikilisiwe mu zhuba gulu.

⁷Koga se Sodoma ne Gomora ne mizi mikulu yakaipoteleka yakathama bupombgwe bunjisa ne kuthama zwithu nge zila isi ye tjilenje kube kupa tjilakidzilo tja ibabo banowoamutjila shamu ye moto usingadzimiwe.

⁸Nge zila yakajalobo ibaba bawoloti banothama mibili yabo shambgwa belamba ndaulo ye Ndzimu kakale betuka bakudziwa be kudzimu.

⁹Koga ntumwa we kudzimu nkulu Mikaele, paakabe enyanyayidzana na Satani ngekwe mbili wa Mushe aazotongo nsumikilisa, koga wakati, “She ngabakutjemele.”

¹⁰Koga ibaba bathu banotuka tjimwe ne tjimwe tjabasingazibisise; ngono banolobesiwa nge zwithu izwezo zwabanoziba nge mbumbiko se phuka dzisingakumbule.

¹¹Yee mme wee! Mapalala imwi bakatobela zila ya Kaini! Bakatizhilila mbuzilo nge zila ye kulashika sa Bhalamu, bakalobesiwa mu kupanduka sa Kora.

¹²Aba zwibadzi mu mizano yenyu ye ludo,[1] beja namwi basina lutjo ne lutukununu gose; bakazwilinga ibo koga; makole asina vula, anowulusiwa nge phepo, miti isina mitjelo mu tjibaka tje mitjelo, yakafa, ikadzikunugwa.

¹³Mabundo e vula ye gungwa, anothwa mafulo anoabhatisa shoni. Banonga nyenyedzi dzinoyendayenda dzakabiganyidzigwa zhalima dema nge kusingapele.

¹⁴Enoki, iye we tjizekugwana tje kutendeka kudwa muna Adamu, wakalebela mbeli ngekwa ibaba eti, “Bonani, She unozha ne bali zwiwulu wulu zwe babe bakayengemala

¹⁵kusumikilisa mmwe ne mmwe, ne kubona nlandu bose bakashinga mishingo yabo isina Ndzimu nenge matama wose mabi akalebgwa nge batjinyi ngekwe Ndzimu!”

¹⁶Aba bang'ong'oli ne bakombeledzi banotobela njemulo dzabo dzakabipa banozwikudza banozipisa lulimi betjengela bamwe kuti kubhatshike ibo koga.

¹⁷Koga, badiwa, kumbulani tjakalebegwa mbeli nge batumwa ba She wedu Jesu Kirisiti.

¹⁸Bakati kumuli, “Mu nsi we bupelo kowobe ne badadi banotobela njemulo dzabo dzakabipa dzisina meya ye Ndzimu.”

¹⁹Ibaba ndibo banodana kupalalana, bana meya isi iyo abana Meya yakayengemala.

²⁰Koga imwi, banodika, muzwibumbeni nge buzhalo mu kugalamoyo kwenyu kwakayengemala kwazo, mutembezela mu Meya yakayengemala.

²¹Muzwitjengetele mu ludo gwe Ndzimu, lindilani mahwilo ngoni a She wedu Jesu Kirisiti kumupa butjilo gusingapele.

²²Ibeni nge ngoni kuna banodudumwa.

²³Tjidzani bamwe nge kubabhula mu moto usingadzimike; ku bamwe mulakidze ngoni dzakashangana ngotja, mushima na itjo tjiambalo tja ibaba bakazhodzeka nge shambgwa ye njemulo dzabo dzakabipa.

²⁴Ngwenu kunli iye unotubula kumutjengeta kuti musiwe, kamuyisa mbeli kukwe ali mu gudzo musina nlandu ngono muna kushatha kukulu,

²⁵ku Ndzimu nng'ompela koga Ntjidzi wedu, muna Jesu Kirisiti, She wedu, ngakube gudzo ne bukulu ne masimba ne ndaulo se kwakabe kuli iko kutanga nangwenu nenge kusingapele. Ngakujalo.