Read Kalanga Zumbunulo 10 Bible Online

Zumbunulo 10 - Kalanga bible

Zumbunulo 10

¹Shule kwaikoku ndakabona mmwe ntumwa we kudzimu una simba edeluka edwa kudzimu, akapombedzwa nge gole, ana nlalabungu pezhugwi kwe nsholo uwe, ngono buso gugwe gwakabe gunga zhuba, makumbo awe enga phanda dze moto.

²Wakabe akabhata lukwalo gutukununu gwakazhuka mu luboko gugwe. Akatshamba nge gumbo lile le luji mu gungwa, nge le lumeshwe akatshamba mu shango,

³ngono kadana nge hwi gulu se shumba inokuma, kati edana, midadamulo ili kutendeka ikadadamula.

⁴Kwakati midadamulo ili kutendeka yadadamula, abe ndili pejo ngokwala, koga ahwa hwi lidwa kudzimu liti, “Zhalila tjalebgwa nge midadamulo ili kutendeka usitongo tjikwala.”

⁵Ngono ntumwa we kudzimu wandakabona ali mile mu gungwa ne mu shango, kamilidza luboko gugwe gwe luji, kagulingisa kudzimu.

⁶Katuna nge zina laiye unotjila nge kusingapele, iye wakabumba kudzimu na zose zwi kudzimu ne shango na zose zwimuili ne gungwa ne tjimwe ne tjimwe tjimulili. Katuna eti, “Kusitjabe ne kunonoka,

⁷kuti mu nsi unolidziwa lunyanga nge ntumwa we kudzimu we butendeka, masazibgwe e Ndzimu sekwa wakabudza balanda bawo, balebesambeli anowoshingikala.”

⁸Ipapo hwi landakabe ndahwa lilebeleka lidwa kudzimu likalebeleka nami kakale likati, “Yenda unotola lukwalo gwakazhuka gumu luboko gwe ntumwa we kudzimu umile mu gungwa ne mu shango.”

⁹Ndakayenda ku ntumwa we kudzimu, ngono ankumbila kuti andipe lukwalo igogo gutukununu, ngono iye kati kundili, “Ugutole uguje, gowobaba mu ntumbu uwo, koga gowozipa se butji gwe nyutji mu nlomo uwo.”

¹⁰Ndakatola lukwalo igogo gutukununu mu luboko gugwe aguja, gukazipa se butji gwe nyutji mu nlomo wangu. Ndakati ndaguja gukababa mu ntumbu wangu.

¹¹Ngono adwiwa kukayi “Wakafanila kulebelambeli kakale ngekwe bathu banjinji ne kwe zwitjaba ne kwe ndimi nenge kwa bomambo.”