Read Kalanga Zumbunulo 11 Bible Online

Zumbunulo 11 - Kalanga bible

Zumbunulo 11

¹Ndakati shule apiwa lukombo gwakabe gulingika se lukuni gunolizanya, ngono adwiwa kukayi, “Yenda unolizanya Ng'umba ye Ndzimu ne tjibeso, ubale bathu banonamata Ndzimu mukati.

²Koga usitongo lizanya tjibata tjikuzhe tjakabakiligwa nge bhakasa, ngoti tjakapiwa bathu basibagalimoyo, banowokanyanga nzi nkulu wakayengemala mimwedzi ili makumi manna ana mimwedzi mibili (42).

³Ndowotumila batendeki bangu babili bakaambala zwiambalo zwe tjililo, ngono banowolebela mbeli mazhuba ali tjiwulu tjina mazana mabili ana makumi matathatu (1 260).”

⁴Batendeki ibabo babili miti ye mitoba mibili ne mavone mabili amile mbeli kwa She we shango.

⁵Ha mmwe angagwisa kubakubadza, moto unowobhuda mu milomo yabo, ngono unowobulaya zwita zwabo, ha mmwe angagwisa kubakubadza, unowobulawa nge zila yakajalo.

⁶Bana masimba ekuzhalila zhuzhugwi kuti kusitongobe ne vula inona mu tjibaka tjabanowobe belebelambeli. Bana masimba e kushandula vula ikabe malopa kakale bana masimba e kuloba shango kanjinji sekwa bada nge shamu imwe ne imwe yabada.

⁷Ha bepedza kulebelambeli, tjibandana tjinodwa mu gomba lakangina kusina tjilizanyo tjowogwa nabo, tjikabakunda tjikababulaya.

⁸Ngono zwitumbu zwabo zowowila mu zila ye nzi nkulu unodang'wa ngopesa kuyi Sodoma ne Egipiti kwakabambuligwa She wabo.

⁹Bathu banowodwa mu njudzi dzose ne mu ndimi dzose ne mu zwitjaba zose banowolinga zwitumbu zwabo mazhuba ali matatu ana gaswa, ngono banowolamba kuti zwibiganyiwe.

¹⁰Bagele mu shango banoshathila lufu gwe batendeki ibabo. Banowothama mizano, ngono banowopana zwipo, ngobe balebesambeli ibabo babili bakabe bedziyidza bagali be shango.

¹¹Koga shule kwe mazhuba ali matatu ana gaswa, meya ye butjilo yakadwa ku Ndzimu, ngono ikangina mu zwitumbu. Zwikamilika zwikama nge makumbo, bose bakazwibona bakapalukamoyo kwazo

¹²Ndizo balebesambeli ibabo babili bakahwa hwi gulu linodwa kudzimu liti ku bali, “Tathilani ngeno!” Bakayenda kudzimu bali mu gole, zwita zwabo zwakabalinga.

¹³Ngono nge tjibaka itjetjo kukabe nge kutengenyeka kwe shango kukulu, lubabi gwe bugumi gwe nzi nkulu gukawa, ngono bathu bali zwiwulu zwili kutendeka (7 000) bakabulawa nge kutengenyeka kwe shango, bakasala bakapalukamoyo, ndizo bakakudza Ndzimu we kudzimu.

¹⁴Zogwadza zwe bubili zwapinda, bonani, zogwadza zwe butatu zozha tjinyolotjo.

¹⁵Ipapo ntumwa we kudzimu we butendeka kalidza lunyanga gugwe, ngono kukabe ne mahwi anolebelekela pezhugwi, kudzimu eti, “Bushe gwe shango gwatjibe bushe gwa She wedu na Kirisiti uwe, ngono unowobusa nge kusingapele kose.”

¹⁶Ngono bakulu bali makumi mabili ana bathu banna banogala mu zwigalo zwabo zwe bushe mbeli kwe Ndzimu, bakawila pasi nge njiso dzabo ngono bakanamata Ndzimu

¹⁷beti, “Tomuboka She Ndzimu we Masimbawose, muyapo kakale makabe yapo ntolo. Tomuboka kuti matola masimba enyu makulu, ngono matangisa kubusa.

¹⁸Njudzi dzakagwadzamoyo, koga bushongola gwenyu gukazha, ne tjibaka tje kuti bafi basumilikisiwe. Tjibaka tjazha tje kuti mupe balanda balebesambeli mbhayilo, ne bayengemali, na ibabo banolumbidza zina lenyu, bose batukunu ne bakulu. Tjibaka tjatjiswika tje kulobesa ibabo banolobesa shango.”

¹⁹Ipapo Ng'umba ye Ndzimu kudzimu ikazhugwa, ngono bhokisi le Tjidumano likabong'wa mu ng'umba yawo. Shule kukabe ne kupenya kwe vula ne mahwi ne kudadamula ne kutengenyeka kwe shango ne tjivulamabgwe tjikulu.