Read Kalanga Zumbunulo 13 Bible Online

Zumbunulo 13 - Kalanga bible

Zumbunulo 13

¹Ngono abona tjibandana tjibhuda mu gungwa tjina nyanga dzili gumi ne misholo ili kutendeka, pezhugwi kwe lunyanga gumwe ne gumwe kuna tjialana tje bushe, ngono pezhugwi kwe nsholo mmwe ne mmwe kuna zina linotuka Ndzimu.

²Tjibandana itjetjo tjandakabona tjakabe tjinga n'gwe, matshambo atjo enga e bhira, nlomo watjo unga we shumba. Ngono bhophona likatjipa masimba alo ne bushe gwalo ne ndaulo hwulu.

³Mmwe we misholo yatjo wakabe unabanga lingabulaya, koga banga ilelo likapola. Koga shango yose ikasala shule tjibandana itjetjo yakatjenama.

⁴Bathu bakanamata bhophona ngoti lakabe lapa tjibandana bushe gwalo. Bakanamata tjibandana beti, “Ndiani unonga tjibandana itjetji? Ne ungagwa natjo ndiani?”

⁵Tjibandana tjakapiwa nlomo we kuzwikudza ne kutuka Ndzimu, tjiletjedzegwa kube nge ndaulo mimwedzi ili makumi manna ana mimwedzi mibili (42).

⁶Tjikatangisa kutuka Ndzimu ne zina lawo ne magalo awo ne banogala kudzimu.

⁷Tjikapiwa ndetjedzelo kubhayana ne bayengemali ne kubakunda, kakale tjakabe tjapiwa ndaulo pezhugwi kwe ludzi gumwe ne gumwe ne bathu bamwe ne bamwe ne lulimi gumwe ne gumwe ne itjaba tjimwe ne tjimwe.

⁸Ngono bose banogala mu shango banowotjinamata, bose be mazina asakakwagwa kudwa mu kuteyiwa kwe shango, mu lukwalo gwe butjilo gwe Pkhwizana yakabulawa.

⁹Ha mmwe ana zebe, ngaahwe.

¹⁰“Ha ili kuti kuna wakalingisana ngosungwa, unowosungwa, wakalingisana nge kubulawa nge thumo, unowobulawabo nge thumo. Oku koshaka kudzikitadza ne kugalamoyo kwe bayengemali.”

¹¹Ipapo abona tjimwe tjibandana tjibhuda mu shango, tjina nyanga dzili mbili dzifanana ne nyanga dze Pkhwizana, ngono tjikalebeleka se bhophona.

¹²Tjoshinga nge ndaulo yose ye tjibandana tje kutanga se mmilili watjo. Tjokombeledza shango na bose banogala muili kuti banamate tjibandana tje kutanga, tje banga linotjisa lakapola.

¹³Tjibandana itjetji tje bubili tjothama zwilakidzo zwikulu, tjothama moto ukadwa kudzimu ukazha pasi mu shango mu mesho e bathu bose.

¹⁴Ndizo tjotjebela bathu banogala mu shango nge zwilakidzo zwatjinoletjedziwa kuthama mbeli kwe tjibandana tje kutanga tjibadwa tjiti bathame ifano tje tjibandana tjakabe tjakubadziwa nge thumo ngono tjikatjila.

¹⁵Tjakapiwa simba kufemela meya mu ifano tje tjibandana tje kutanga kuti ifano tje tjibandana tjilebeleke ne kuthama kuti ibabo basinganamate ifano tje tjibandana babulawe.

¹⁶Tjokombeledza bathu bose batukununu ne bakulukulu, bafumi ne bashayi, bakasununguka ne balanda kutjwayiwa mu maboko abo e luji kene mu phazha dzabo,

¹⁷kuyita kuti kusibe ne ungatengesa asina lutjwayo igogo. Kodwa kuti zina le tjibandana kene mbalo ye zina latjo.[3]

¹⁸Ikoku koshaka butjenjedu. Iye wakatjenjela ngaazibe tjimiligwe nge mbalo ye tjibandana[4] itjetjo, ngoti palo imilile zina le nthu. Mbalo yatjo mazana matathatu ana makumi matathatu ana tathatu (666).