Read Kalanga Zumbunulo 14 Bible Online

Zumbunulo 14 - Kalanga bible

Zumbunulo 14

¹Ipapo alinga, ngono abona Pkhwizana ilimile pezhugwi kwe Dombo le Ziyoni, bakabe banayo bakabe bali 144 000, ibabo bakakwagwa zina layo ne zina la tate bayo mu phazha dzabo.

²Ngono ndakahwa hwi lidwa kudzimu lihwika linga nsindo we vula njinji. Kakale linga dadamula kwe vula. Ndakahwa hwi linonga le bathu banolidza zwitinkani zwabo.

³Banomba lumbo butshwa mbeli kwe tjigalo tje bushe na mbeli kwe zwibumbiwa zwinotjila zwinna ne bakulu. Akuna wakabe angazwidiya lumbo igogo kuzhe kwe bali 144 000, ibo bakabe badzutunugwa mu shango.

⁴Ndibo basakazwitemapadza nge bakadzi, ndizo babuyanana; ndibo bakasala shule Pkhwizana pamwe ne pamwe painoyenda. Bakadzutunugwa pakati kwe bathu, bali mitjelo ye kutanga ye Ndzimu ne Pkhwizana.

⁵Akuna manyepkhwa akawang'wa mu milomo yabo ngoti basina nlandu.

⁶Ngono abona mmwe ntumwa we kudzimu ewuluka pezhugwi, akasenga ndebo mbuya isingapele, kuisumikilila bagali be shango mu itjaba tjimwe ne tjimwe ne mu ludzi gumwe ne gumwe ne mu lulimi gumwe ne gumwe ne mu bathu bamwe ne bamwe.

⁷Wakati nge hwi lipezhugwi, “Kulumbidzani Ndzimu, muukudze, ngobe tjibaka tje kuti usumikilise bathu tjatjiswika! Muunamate iwo wakathama kudzimu ne shango ne gungwa ne misenya ye vula!”

⁸Mmwe ntumwa we kudzimu we bubili wakatobela we kutanga eti, “Wawa, wawa Bhabhiloni nkulu, iye wakathama zwitjaba zose kung'wa nkumbi we bupombgwe gugwe.”

⁹Ntumwa we kudzimu we butatu kabasala shule eti nge hwi lipezhugwi, “Iye unonamata tjibandana ne ifano tjatjo, kakale kaamutjila lutjwayo gwatjo mu phazha kene mu tjiazha,

¹⁰kakale unowong'wa nkumbi we bushongola gwe Ndzimu wawapiphila usakadzimugwa mu tjing'wilo tje bushongola gwawo! Banowohwisiwa zogwadza mu moto ne salifa inopisa, mbeli kwe batumwa be kudzimu bakayengemala ne mbeli kwe Pkhwizana.

¹¹Busi gwe moto we kuhwisiwa zogwadza kwabo gomilikila pezhugwi nge kusingapele. Abana kunyaluluka masikati kene busiku ibabo banonamata tjibandana ne ifano tjatjo ne mmwe ne mmwe una lutjwayo gwe zina latjo.”

¹²Ikoku koshaka dzikitadza mu bayengemali, ibabo banolondolodza milayo ye Ndzimu begalamoyo muna Jesu.

¹³Kudwa ipapo ahwa hwi lidwa kudzimu liti, “Kwala ikoku, ‘Kwakakombolegwa bafi banofila muna She kudwila ngwenu kuyenda mbeli.’ ” Meya ikati, “Bakakombolegwa dumbu kuti banyaluluke mu mishingo yabo inolema ngobe mija yabo inobatobela.”

¹⁴Ngono ndakati shule alinga, ndikabona gole jena, ngono pezhugwi kwalo kuli gele mmwe unolingika se Nkololo we Nthu, ana tjiala tje bushe tje golide mu nsholo uwe, akabhata sikili inopitsha mu luboko gugwe.

¹⁵Ngono mmwe ntumwa we kudzimu kabhuda mu Ng'umba ye Ndzimu, kadana iwoyo ugele pezhugwi kwe gole nge hwi lipezhugwi eti, “Tola sikili iyo uvune, ngoti tjibaka tje kuvuna tjaswika; shango yabidwa nge buzhalo kuvung'wa.”

¹⁶Ndizo iwoyo ugele pezhugwi kwe gole, kabe ebuzila sikili iye mu shango, ngono shango ikavungwa.

¹⁷Ngono ndakabona mmwe ntumwa we kudzimu ebhuda mu ng'umba ye Ndzimu kudzimu, ngono na iyebo kabe akabhata sikili inopitsha.

¹⁸Mmwe ntumwa we kudzimu kadwa pa tjibeso tje zwibhayilo, iye wakabe elaula moto, ngono kamilidza hwi kadana ntumwa wakabhata sikili inopitsha kati, “Tola sikili iyo uthubule zhambi mu nnda we mizhambi we shango nge kuti zhambi dzakabidwa.”

¹⁹Ndizo ntumwa we kudzimu kabuzila sikili iye mu shango, kathubula zhambi mu nzhambi kadziposela mu dolo lisishoma le bushongola gwe Ndzimu.

²⁰Zhambi dzakakobogwa mu dolo kuzhe kwe nzi nkulu, kukabhuda malopa mu duni, kukabe gwizi gwe malopa gwe bulefu gwe thambo dzili mazana matatu (300), ngono malopa iyawo akabe angama nthu pa mathudzi.