Read Kalanga Zumbunulo 16 Bible Online

Zumbunulo 16 - Kalanga bible

Zumbunulo 16

¹Ndizo ndakahwa hwi lilebelekela pezhugwi lidwa mu ng'umba ye Ndzimu lidwa batumwa be kudzimu bali kutendeka liti, “Yendani munotebulila bushongola gwe Ndzimu gumu ndilo dzili kutendeka mu shango.”

²Ndizo ntumwa we kudzimu we kutanga kayenda, kaswika katebulila kumu ndilo iye mu shango. Malonda anotjisa, anogwadza kabhuda muna ibabo bakabe bana lutjwayo gwe tjibandana kakale benamata ifano tjatjo.

³Ntumwa we kudzimu we bubili katebulila kumu ndilo iye mu gungwa, vula ikashanduka ikanga malopa e nthu wakafa, itjili tjimwe ne tjimwe mu gungwa tjikafa.

⁴Ntumwa we kudzimu we butatu katebulila kumu ndilo iye mu njizi ne mu misenya ye vula, dzikashanduka dzikabe malopa.

⁵Ndakahwa ntumwa we kudzimu we vula eti, “Makalulwama ngoshingisa shamu dzenyu idzedzi. Muyapo, imwi magala muli yapo, Makayengemala.

⁶Bathu bakatebula malopa e bayengemali ne e balebesambeli, ndizo mabapa malopa kuti baang'we. Ikoku kwakabafanila.”

⁷Ndakahwa tjibeso tjiti, “Ee, She Ndzimu Masimbawose, kusumikilisa kwenyu ku malebeswa kakale kwakalulwama.”

⁸Ntumwa we kudzimu we bunna katebulila ndilo iye mu zhuba, ngono likaletjiwa kuti lipise bathu nge moto.

⁹Bathu bakapisiwa ngopisa kukulu, ngono bakatuka zina le Ndzimu, iwo una masimba mu shamu idzedzi, koga abazoshanduka bakaukudza.

¹⁰Ntumwa we bushanu katebulila kumu ndilo iye mu tjigalo tje bushe tje tjibandana, bushe gwatjo gukabe mu zhalima. Bathu bakazwiluma ndimi ngekuhwa zogwadza,

¹¹ngono bakatuka Ndzimu we kudzimu beutukila zogwadza ne malonda amubali, koga abazoshandukila mishingo yabo.

¹²Ntumwa we kudzimu we butathatu katebulila zwi mu ndilo iye mu gwizi gwe Yufuratesi, vula yago yakapkhwa kuzhulila zila bomambo banozha bedwa ku Bhezhuba.

¹³Ngono shule abona meya mitatu mibi inolingika se mazhula, ibhuda mu nlomo we bhophona ne mu nlomo we tjibandana ne mu nlomo we nlebesambeli we manyepkhwa.

¹⁴Meya iyeyo mibi inoshinga zwilakidzo, inoyenda kuna bomambo be shango yose kunobakubunganyila ngwa mu zhuba gulu le Ndzimu Masimbawose.

¹⁵“Bonani ndozha se mbava! Kwakakombolegwa iye unogala akalinga, akalulwamisa zwiambalo zwizwe kuti asiyende ali mbujo kubonegwa nge bathu.”

¹⁶Ndizo meya yakakubunganya bomambo pathu panodang'wa nge lulimi gwe Tjihebheru kuyi Amagedoni.

¹⁷Ntumwa we kudzimu we butendeka katebulila zwi mu ndilo iye mu phepo, hwi lipezhugwi likadwa mu tjigalo tje bushe mu ng'umba ye Ndzimu liti, “Kwapela.”

¹⁸Kukabe ne kudadamula ne mahwi ne matutu ne midumo ye makole ne kutengenyeka kwe shango kukulu kusakatongobe yapo mu shango, tjinga bathu kwabakabumbiwa.

¹⁹Nzi nkulu ukapaluka mbabi thatu, ngono mizi mikulu ye njudzi ikawa. Ndzimu ukaalakana nzi nkulu we Bhabhiloni, ngono ukawukombeledza kung'wa mu tjing'wilo tjawo tje bushongola gwawo.

²⁰Zwigwizi zose zwikalobesiwa ne matombo kasiwanike.

²¹Mabgwe makulu kulu e tjivulamabgwe, limwe ne limwe lina ikale tje seme dzili makumi mashanu, akawa edwa pezhugwi, ewila pezhugwi kwe bathu. Bakatuka Ndzimu, ngobe wakazhisa shamu inotjisa.