Read Kalanga Zumbunulo 17 Bible Online

Zumbunulo 17 - Kalanga bible

Zumbunulo 17

¹Ipapo mmwe we batumwa be kudzimu bali kutendeka bakabe bana ndilo dzili kutendeka, kazha kundili kati, “Izha ngeno ndiwokulakidza kusumikilisiwa kwe fukula iyeyi igele mu vula njinji.

²Bomambo bakashinga bupombgwe naye, ngono bagali be shango bakalaladzisiwa ngong'wa nkumbi we bufukula gugwe.”

³Ntumwa we kudzimu kandisengela ku tjilambanyika ndili mu Meya. Ikoko ndakabona nkadzi ali gele pezhugwi kwe tjibandana tjishaba, tjili zhele mazina anotuka Ndzimu; tjibandana itjetjo tjakabe tjina misholo ili kutendeka ne nyanga dzili gumi.

⁴Nkadzi iwoyo wakabe akaambala zwiambalo zwe mbala we bushaba gwakabondelela ne nshaba, zwakanakisiwa nge golide nenge mabgwe akanaka anopenya ne ndalama. Mu luboko gugwe wakabe akabhata tjing'wilo tjakathamiwa nge golide, tjili zhele zwithu zwinoshimisa ne shambgwa ye bufukula gugwe.

⁵Mu phazha iye kwakabe kwakakwagwa zina le masazibgwe, “Bhabhiloni nkulu, mme be fukula dzose ne mishingo yose inoshimisa mu shango.”

⁶Ngono ndakabona kuti nkadzi iwoyo wakabe akalaladza nge malopa e bayengemali nenge malopa e bakafila kutendekela Jesu. Ndakati ndimbona, akaabala kwazo.

⁷Koga ntumwa we Kudzimu kandibhuzwa kati, “Ini wakakaabala? Ndowokutjenesela ngekwe masazibgwe e nkadzi iwoyu ne tjibandana tjaakatatha tjina misholo ili kutendeka ne nyanga dzili gumi.

⁸Tjibandana itjetjije tjawabona tjakatongobe yapo ngono ngwenu atjitjipo, tjowobhuda mu gomba lisina palinoma, ngono tjowoyenda kunoloba. Bagali be shango, bana mazina asakakwagwa mu lukwalo gwe butjilo kudwa mu kuteyiwa kwe shango banowotjenamila kutjibona, ngobe tjakabe tjili yapo, ngono ngwenu tjisitjipo koga ngono tjitjowobe yapo.

⁹“Ikoku koshaka una butjenjedu. Misholo ili kutendeka matombo ali kutendeka agegwe pezhugwi nge nkadzi iwoyo.

¹⁰Kuna bomambo bali kutendeka. Bashanu babo bakawa, ng'ompela uyapo, mmwe aathu kazha; ha ezha unowobepo lubaka gushomanana koga.

¹¹Ngono tjibandana itjetjo tjakatongo bepo, koga ngwenu tjisipo ndi mambo we buzhanakadzi. Mmwe we bali kutendeka, koga unoyenda kunolobesiwa.

¹²“Manyanga ali gumi awabona ndi bomambo bali gumi basathu bakaamutjila bushe, ngono banowoamutjila masimba kubusa awara i nng'ompela ne tjibandana itjetjo.

¹³Ibaba nge bugumi gwabo, bana mazwimisilo mang'ompela, banopa tjibandana simba labo ne bushe gwabo.

¹⁴Banowogwa ne Pkhwizana, koga Pkhwizana inowobakunda, ngobe ndi She wa boshe, ndi Mambo wa bomambo, baanabo nge bakadang'wa bakashalugwa, banogagwabgwe.”

¹⁵Ntumwa we kudzimu kati kundili, “Vula dzawabona dzigegwe ne fukula, zwitjaba ne mibunga ye bathu nenge ndimi.

¹⁶Nyanga dzili gumi dzawabona ne tjibandana dzowobenga fukula iyeyo, dzowotola tjimwe ne tjimwe tjainatjo, ngono dzikaisiya ili mbujo, dzowoja nyama ye mbili wayo, dzikampisa nge moto,

¹⁷Ndzimu wakalonga mu mimoyo yabo kuda kwawo kuti kushingikale mazwimisilo awo ngoshinga bedumana, beyisa mibuso yabo pasi kwe tjibandana kudzina kose kumu dama le Ndzimu kushingikale.

¹⁸“Nkadzi wawabona, nzi iwowuje nkulu unobusa bomambo be shango.”