Read Kalanga Zumbunulo 18 Bible Online

Zumbunulo 18 - Kalanga bible

Zumbunulo 18

¹Shule kwa ikoku ndakabona mmwe ntumwa we kudzimu edeluka edwa kudzimu ana masimba makulu, ngono tjedza tjitje tjakapenyesa shango yose.

²Kalebeleka nge hwi lina masimba eti, “Wawa, wawa nzi nkulu Bhabhiloni! Wabe bugalo gwe meya mibi, yabe makotokelo e meya mmwe ne mmwe wakabipa. Nyuni dzose mbiimbi dzinoshimika dzokotokela muuli.

³Ngoti zwitjaba zose zwakang'wa nkumbi we shambgwa ye bufukula gugwe. Bomambo be shango bakathama bupombgwe naye, balume banoshaba be shango bakafumiswa nge nyota iye ye kube ne tjimwe ne tjimwe isingalaugwe.”

⁴Ipapo ahwa limwe hwi lidwa kudzimu liti, “Bhudani munli bathu bangu, musitongo dwa mushanganyila zwibi naye, mungadwa mushanganyila shamu naye.

⁵Ngoti zwibi zwizwe zwakabutitikwa kunoswika kudzimu, ndizo Ndzimu auzokangang'wa matjinyo awe.

⁶Munthamile koga sekwa akamuthamila. Munlipe kabili muna kose kwaakathama. Muzhadze tjing'wilo tjitje nge tjing'o tjakabila kabili kupinda tjing'o tjaakamuthamila.

⁷Munhwise zogwadza ne buyendasi gunolizana kuzwikudza kukwe nenge kuja eng'wa fumwa yaakazwipa. Se ezwidwa mu moyo uwe eti, ‘Ndigele ipapa ndili mambokadzi! Ate ndili tjilikadzi, tjililo andingatjibone.’

⁸Ndizo shamu dzidze dzowozha mu zhuba ling'ompela, bugwele ne tjililo ne bhamba. Ngono unowopisiwa nge moto, ngoti She Ndzimu una masimba unowonsumikilisa.”

⁹Bomambo be shango bakashinga bupombgwe naye beshanganyila kuja ne kung'wa, banowolila bakakuwa nge kukwe ha bebona busi gwe kutshwa kukwe.

¹⁰Banowomila kule kule, betjisiwa nge kuhwisiwa zogwadza kukwe, ngono banowoti, “Yee mme wee! Yee mme wee! Wapalala iwe nzi nkulu, usinshoma Bhabhiloni! Wasumikilisiwa mu awara i nng'ompela.”

¹¹Batengesi be thundu be shango banowonlilila ngobe akutjina unowotenga thundu dzabo kakale.

¹²Thundu ye golide ne siliva ne maseka akanaka ne mabgwe ne ndalama ne matyila akanaka ne jila le mbala we bushaba gwakabondelela ne jila linotedzemuka ne jila shaba le themba ipezhugwi ne zwizholo ne zwinonuhwisa zwinozipa milenje lenje ye hwuni dze themba ipezhugwi ne nyanga dze zhowu ne phangula ne butale ne mabgwe matjena anopenya;

¹³ne sinamoni ne motsha ne mafuta anonuhwa zwinozipa ne nkumbi ne mafuta e ntjelo we ntoba, bgwisa gwe tjiwunga, mbewu, ng'ombe, pkhwizi, mbizi, koloyi, balanda kunoti ku bathu.

¹⁴Zwithu zose zwakalulwama zwawakabe uyemula kube nazo zwakulashikila, ngono nenge fumwa iyo yose ne bubuya gugo kwayenda, ngono autowofa wazwibona kakale.

¹⁵Batengesi bakawana fumwa ngotengesa mu nli banowomila kule kule, ngoti banotja kuhwisiwa zogwadza kukwe. Banowolila bekuwila pezhugwi.

¹⁶Ngono banoti “Yee mme wee! Yee mme wee! Wapalala nzi iwoyu nkulu wakabe wakaambala ntjeka wakanaka ne jila le mbala we bushaba gwakabondelela ne jila shaba le themba ipezhugwi, ngono ezwinakisa nge golide ne mabgwe anopenya ne ndalama!

¹⁷Ngono walashikigwa nge fumwa iye yose mu awara i nng'ompela koga.” Bayendisi bose be zwikepe ne balauli babo ne batengesi banoyenda nge zwikepe, na ibabo banoseyenya nge zwikepe mu gungwa bakamila kule kule,

¹⁸ngono bakalila ha bebona busi gwe kutshwa kukwe beti, “Ndiupi nzi nkulu wakatongonga iwoyu nzi nkulu kene?”

¹⁹Bakadila hwuluba mu misholo yabo, bakalila, bakangina mu buyendasi beti, “Yee mme wee! Yee mme wee! Wapalala nzi nkulu! Iwo wakati bose bana zwikepe zwinotendeleka mu gungwa bakazwifumisa nge fumwa yawo. Mu awara i nng'ompela walashikigwa nge tjimwe ne tjimwe.”

²⁰Shathani nge kwawo ba kudzimu. Shathani bayengemali ne batumwa* ba Jesu ne balebesambeli, ngoti Ndzimu wamusumikilisila iye.

²¹Ngono shule ntumwa we kudzimu, una masimba kanunga bgwe linonga gwiyo gulu, ngono kaliposela mu gungwa eti, “Eyi ndiyo zila inowoti nzi nkulu una masimba Bhabhiloni, ukaposegwa pasi nge masimba, ngono autowofa wabong'wa kakale.

²²Zwitinkani ne kumba kwe bathu ne balidzi be nyele ne lunyanga, akutjowobuya kukahwika mukuli kakale, akuna nshingi upi kene upi utjowofa abong'wa mukuli kakale, ngono ne zhoba ye gwiyo aitjowopapha ikahwika kakale.

²³Akutjowobuya kukaboneka kakale tjedza tje luvone mukati kuko. Akutjowobuya kukahwika kakale mahwi e balongo ne e baloboli mukuli. Batengesi babo be thundu bakabe bali ibo bakulu mu shango yose, ngono nge butjenjedu gwenyu gwe malipa, makatjebela zwitjaba zose zwe shango.”

²⁴Mu Bhabhiloni kwakawanika malopa e balebesambeli ne e bayengemali ne e bathu bose bakabulawa mu shango.