Read Kalanga Zumbunulo 19 Bible Online

Zumbunulo 19 - Kalanga bible

Zumbunulo 19

¹Shule kwa ikoku ndakahwa kunonga mahwi apezhugwi e bathu banjinji kudzimu epululudza eti, “Haleluya! Jidzo ne gudzo ne masimba nge zwe Ndzimu wedu.

²Kusumikilisa kwawo kuna lebeswa ne ndulamo. Wakasumikilisa fukula yakabe itjinya shango nge bufukula gwayo, Ndzimu wakambgwilizila ngekwe malopa e balanda bawo.”

³Bakapululudza kakale beti “Haleluya! Busi gunodwa munli goyenda pezhugwi nge kusingapele.”

⁴Bakulu bali makumi mabili ana bathu banna ne zwibumbiwa zwinna bakawila pasi bakanamata Ndzimu, ugele mu tjigalo tje bushe, bakati, “Ngakujalo. Haleluya!”

⁵Kukadwa hwi mu tjigalo tje bushe lipululudza liti, “Kudzani Ndzimu wedu imwi balanda bawo bose ne bathu bose banoulumbidza, bose batukununu ne bakulukulu.”

⁶Ipapo ahwa kwakabe kunga mahwi e bathu banjinji, ehwika enga kuwona kwe vula njinji kakale enga vula inodadamula kwazo, epululudza eti “Haleluya! Ngoti She Ndzimu wedu Masimbawose unobusa.

⁷Ngatishatheni tipululudze tiukudzeni, ngobe tjabe tjibaka tje ndobolo ye Pkhwizana, ndizo nlongo uwe wazwilulwamisila iyo.

⁸Wapiwa zwiambalo zwibuyanana zwe jila lakanaka linopenya.” Jila ileli mishingo mibuyanana ye bayengemali.

⁹Ntumwa we kudzimu kandidwa kati, “Ukwale tjandinokubudza, ‘Bakakombolegwa ibabo bakakokiwa ku zojiwa zwe madekwana zwe nzano we ndobolo ye Pkhwizana.’ ” Kati kakale kundili, “Awa matama e malebeswa e Ndzimu.”

¹⁰Ndakawila pasi mbeli kwe makumbo awe kuti ndinnamate, ngono kati kundili, “Usitongo thama ikoku! Imi ndi nlanda sawe ne zwikamu zwizo zwina butendeki gwa Jesu. Namata Ndzimu.” Ngobe butendeki gwa Jesu meya ye bulebesambeli.

¹¹Abe ndibona kudzimu kuzhuka, ngono kukaboneka mbizi tjena ntathi wayo unodang'wa N'galikabgwe, kakale eyi Malebeswa. Unosumikilisa nge ndulamo kakale ebe egwa.

¹²Mesho awe anonga nthuto we moto, ngono wakabe akaambala zwialana zwe bushe zwinjinji mu nsholo uwe, una zina lakakwagwa munli lisina unoliziba ha isi iye koga.

¹³Wakaambala hazu yakadubikiwa mu malopa, ngono zina laanodang'wa ndilo koyi “Dama le Ndzimu.”

¹⁴Babhayani be kudzimu bakaambala zwiambalo zwitjena zwibuyanana, bakantobela bakatatha mbizi tjena.

¹⁵Mu nlomo uwe kobhuda bukanu gunopitsha gwaanotema zwitjaba ndigo, ngono unowobabusa nge ikombo tje tshipi, unowokobola zhambi mu dolo le bushongola gunotjisa gwe Ndzimu Masimbawose.

¹⁶Mu hazu iye, pezhugwi kwe tjidzwa, kwakakwagwa zina linobalika sahwoku, “Mambo wa bomambo kakale She wa boshe.”

¹⁷Ipapo abona ntumwa we kudzimu ali mile mu zhuba. Ngono kamilidza hwi kadana nyuni dzose dzinowuluka pezhugwi eti, “Izhani mukubunganile zojiwa zwe madekwana zwe Ndzimu.

¹⁸Muje zwitumbu zwa bomambo ne bakulu be dzingwa ne zwe balume bakasima. Zwitumbu zwe mbizi ne zwe batathi badzo ne zwe bathu bose, balanda ne basununguki, bakulu ne batukununu.”

¹⁹Abona tjibandana na bomambo be shango ne babhayani babo, bakubungana kugwa na iwoyo wakatatha mbizi ne babhayani babe.

²⁰Ngono tjibandana tjakabhakhwa kang'ompela ne nlebesambeli we manyepkhwa, iwoyo wakabe ethama zwilakidzo mu mesho atjo akatjebela ibabo bakaamutjila lutjwayo gwe tjibandana, na ibabo bakabe benamata ifano tjatjo. Nlebesambeli iwoyo ne tjibandana itjetjo bakaposegwa betjila mu gakhwa le moto unothutidziwa nge mabgwe anodang'wa salifa.

²¹Bamwe bose basala bakabulawa nge bukanu gwa iye wakatatha mbizi, bukanu gunobhuda mu nlomo uwe. Nyuni dzakaja zwitumbu zwabo dzikaguta kwadzakazwimbigwa.