Read Kalanga Zumbunulo 2 Bible Online

Zumbunulo 2 - Kalanga bible

Zumbunulo 2

¹“Kwalila ntumwa we kudzimu we gubungano limu Efeso sahwoku: “Eyi i ndayidzo inodwa kuna iye wakabhata nyenyedzi dzili kutendeka mu luboko gugwe gwe luji, iye unoyenda yenda pakati kwe zwigadziko zwe mavone zwakathamwa nge golide zwili kutendeka.

²Ndoziba mishingo yenyu, kushinga zwakasima kwenyu ne moyonlefu mu kudzikitadza, nenge sekwa musingake mukaletjedzela bathu babi, makalika ibabo banozwidana beti batumwa ba Jesu koga basi ibo, ngoti makawana bali be manyepkhwa.

³Ndoziba kuti modzikitadza nge moyonlefu, makasimisilila zina langu musinganyale.

⁴Koga tjandisingashake mu muli ndi etji, makaletja ludo gwamakabe nago mu kutanga.

⁵Kumbulani pa makawa, mu shandukile matjinyo enyu, ngono mushinge mishingo yamakabe mushinga kutanga. Ha musingashanduke, ndowodusa tjigadziko tjenyu tje luvone mu bugalo gwatjo.

⁶Koga tjamunatjo ndiyetji, moshima mishingo ye bathu banoyi Banikolaita, iyo yandinoshimabo.

⁷“Iye una zebe ngaahwe tjinolebgwa nge Meya ku makubungano. “Kuna ibabo banowokunda, ndowobapa fanilo ye kuti baje ntjelo we nti we butjilo, umu nnda we Ndzimu.

⁸“Kwalila ntumwa we kudzimu we gubungano limu Simirina sahwoku: “Awa matama anodwa kuna iye we kutanga kakale we bupelo, wakafa kabuya katjila.

⁹Ndoziba kudziyidziwa kwenyu ne bushayi gwenyu, koga dumbu makafuma. Ndoziba ndebo mbiimbi dzinolebgwa nge kwenyu ndi ibabo banozwidana beti ndibo Bajuta, koga basi ibo, bali gubungano la Satani.

¹⁰Musitje ikoku kwabe pejo nge kumuwila. Bonani, Satani wabe pejo nge kulonga bamwe benyu mu ng'umba ye busungwa, kuti mulikwe, ngono mowodziyidziwa mazhuba ali gumi. Mugalemoyo kuswikila lufu, ngono ndowomupa tjiala tje butjilo.

¹¹“Iye una zebe ngaahwe tjinolebgwa nge Meya ku makubungano. “Iye unokunda aatowohwisiwa zogwadza nge lufu gwe bubili.

¹²“Kwalila ntumwa we kudzimu we gubungano limu Pegamo sahwoku: “Awa matama anodwa kuna iye una bukanu gunopitsha guna mahali mabili.

¹³Ndoziba kwamunogala, iko kuna tjigalo tja Satani tje bushe. Mukabhatilila mu zina langu ne bugalimoyo gwangu amuzozwigulandula nenge mu misi ya Antipasi, iye ntendeki wangu, n'galimoyo wangu wakabulawa pakati kwenyu, iko kunogala Satani.

¹⁴Koga ndina zwithu zwishomanana zwandisingade mu muli, kuna bamwe pakati kwenyu banotobelela kudiya kwa Bhalamu, wakadiya Bhalaki kudzimidza itjaba tje Iziraela nge kuyita kuti baje zojiwa zwakapiwa midzimu yakabezhiwa nenge kusazwidziba kuwalilana thobo kuzhe kwe ndobolo.

¹⁵Kakale muna bathu pakati kwenyu banotobelela zwidiyo zwe Banikolaita”

¹⁶Ngono ngwenu shandukilani matjinyo enyu, ha musingashaduke, ndowozha kumuli tjinyolotjo, ngono ndowogwa ne bathu ibabo nge bukanu gwe nlomo wangu.

¹⁷“Iye una zebe, ngaahwe tjinolebgwa nge Meya ku makubungano. “Iye unowokunda ndowompa imwe ye mana yakasumbikala. Kakale ndowompa bgwe jena lakakwagwa zina dzwa lisina unoliziba kuzhe kwe unoamutjila.

¹⁸“Kwalila ntumwa we kudzimu we gubungano limu Tiyatira sahwoku: “Awa matama anodwa ku Nkololo we Ndzimu, iye una mesho anonga nthuto we moto, una makumbo anongadzima se phangula yakapholitjiwa.

¹⁹Ndoziba mishingo yenyu, ndoziba ludo gwenyu nenge kugalamoyo kwenyu, kushingila bamwe kwenyu ne moyonlefu wenyu ne kudzikitadza kwenyu. Ndoziba mishingo yenyu ya shule inopinda ye kutanga.

²⁰Koga tjandisingade mu muli, hwuti moamutjila nkadzi iwoyu unoyi Jezebhele, iwoyu unozwidana nlebesambeli etjengela balanda bangu nge zwidiyo zwibiibi zwe kuwalilana thobo kuzhe kwe ndobolo nenge kuja zojiwa zwakapiwa midzimu ye zwifano.

²¹Ndakampa tjibaka tje kuti ashanduke, koga unolamba kushandukila mishingo iye mibi ye kuwalilana kuzhe kwe ndobolo.

²²Ndizo ndowomposela mu thobo dzinopisa, na ibabo banoshinga mishingo ye bupombgwe naye, ndowobalonga mu kudziyila kukulu, ha basingowoshandukila mishingo yabo.

²³Ndowobulaya bana babe. Ndizo makubungano wose anowoziba kuti ndimi ndinoshakisisa njalakang'wa nenge moyo, ngono ndowopa mmwe ne mmwe wenyu kwakalingisana nge mishingo iye.

²⁴“Koga kubamwe benyu bose mu Tiyatira basakatobela zwidiyo zwakajalo, basakatongozwidiya zwithu zwinodang'wa kuyi zwikowa zwakasumbikala zwa Satani, kumuli ndoti, andina mmwe ntolo wanditjawomusengesa.

²⁵Koga bhatililani itjetjo tjamunatjo kudzina ndizha.

²⁶Iye unokunda kakale kashinga mishingo yangu kuswikila nsi we bupelo, ndowompa simba le kulaula zwitjaba,

²⁷ngono unowobalaula nge ludozo gwe tshipi, unowobapkhwanya bakasala benga zwiyenga zwe hali ye ntapkhwi, unowowana simba ileli koga sami ndakaliwana kuna Tate.

²⁸Pezhugwi kwa ikoko ndowompa Masasi.

²⁹“Iye una zebe, ngaahwe tjinolebgwa nge Meya ku makubungano.