Read Kalanga Zumbunulo 20 Bible Online

Zumbunulo 20 - Kalanga bible

Zumbunulo 20

¹Kudwa ipapo abona ntumwa we kudzimu edeluka edwa kudzimu akabhata tjizhulo tje gomba lakangina kusina tjilizanyo mu luboko gugwe ne ketani hwulu hwulu.

²Kabe ebhata bhophona, nyoka yakale, inodang'wa Nvanganyi, Satani, kailonga mu busungwa nge kwe makole ali tjiwulu tjing'ompela (1 000).

³Kaiposela mu gomba, ngono kalizhalila kalikhiya, kuti ndizo lisitjatubule kutjebela bathu, kakale kudzina makole ali tjiwulu tjing'ompela apinda. Shule kwa ipapo lakafanila kusunungugwa kwe tjibaka tjifupi.

⁴Ipapo abona zwigalo zwe bushe, ngono zwiligegwe nge bakapiwa masimba e kusumikilisa. Ndakabonabo meya ya ibabo bakabe bathubugwa mitshibha, bebulayigwa butendeki gwa Jesu ne dama le Ndzimu, ibo basakatongonamata tjibandana kene ifano tjatjo, kene iko kuamutjila lutjwayo gwatjo mu phazha dzabo kene mu maboko abo. Bakamuka mu bafi bakabusa na Kirisiti makole ali tjiwulu tjing'ompela (1 000).

⁵Bafi bakasala abazomusiwa kuswikila makole ali tjiwulu tjing'ompela apinda. Ikoku ndiko kumuka kwe bafi kwe kutanga.

⁶Wakakombolegwa kakale wakayengemala iwoyo unowobe mu kumusiwa kwe bafi kwe kutanga. Lufu gwe bubili aguna masimba muna ibabo, banowobe bapirisiti be Ndzimu na Kirisiti, ngono banowobusa naye makole ali tjiwulu tjing'ompela.

⁷Shule kwe makole ali tjiwulu tjing'ompela Satani unowosunungugwa mu ng'umba iye ye busungwa.

⁸Ngono unowoyenda kanotjebela zwitjaba zwimu mbizho nna dze shango, kudwa kuti Gogo na Magogo, ku bakubunganyila ngwa. Bunji gwabo gonga nsetje we gungwa.

⁹Bakathubulanya nge shango yose, ngono bakakomba bugalo gwe bayengemali ne nzi nkulu unodika. Koga moto wakadeluka udwa kudzimu ukabapisa.

¹⁰Ngono Satani iye wakabatjebela kalashigwa mu gakhwa le moto ne salifa, kuna tjibandana ne nlebesambeli we manyepkhwa, banowohwisiwa zogwadza siku ne sikati nge kusingapele.

¹¹Ipapo abona tjigalo tje bushe tjitjena tjikulu, na iye ugele pezhugwi kwatjo. Shango ne zhuzhugwi zwikantizha ngono zwikasitjabong'we kakale.

¹²Ngono abona bafi bakulukulu ne batukununu, bali mile mbeli kwe tjigalo tje bushe, ngono hwalo dzikazhugwa. Lukwalo naigobo gukazhugwabo, guli lukwalo gwe butjilo. Bafi bakasumikilisiwa kuyendidzana nge mishingo yabo sekwa kwakabe kwakakwagwa mu hwalo idzedzo.

¹³Gungwa likadusa bafi bakabe bali mulili, Lufu ne Ikumbu zwikadusa bafi bakabe bali muzwili ngono bose bakasumikilisiwa kuyendidzana ne mishingo yabo.

¹⁴Ipapo Lufu ne Ikumbu zwikaposegwa mu gakhwa le moto, ogu ndigo lufu gwe bubili, gungwa gwe moto.

¹⁵Mmwe ne mmwe usakakwagwa zina mu lukwalo gwe butjilo wakaposegwa mu gungwa gwe moto.