Read Kalanga Zumbunulo 21 Bible Online

Zumbunulo 21 - Kalanga bible

Zumbunulo 21

¹Kudwa ipapo abona kudzimu kutshwa ne shango tshwa, ngobe kudzimu kwe kutanga ne shango ye kutanga zwakabe zwapinda, ne gungwa lisitjipo.

²Ngono ndakabona nzi nkulu wakayengemala, Jerusalema tshwa, ideluka idwa kudzimu ku Ndzimu yakalulwamisiwa se nlongo wakanakisigwa nlume uwe.

³Ndakahwa hwi lilebelekela pezhugwi libhuda mu tjigalo tje bushe liti, “Bona, bugalo gwe Ndzimu gwabe mu bathu. Unowogala nabo, ngono banowobe bathu bawo. Ndzimu nge kwawo unowobe nabo, ukabe Ndzimu wabo.

⁴Unowobukusha mishodzi yose mu mesho abo, akutjawobe ne lufu kakale, akutjawobe ne buyendasi kene tjililo kene tjibhayo, ngoti zwe kutanga azwitjipo.”

⁵Ngono iwoyo ugele mu tjigalo tje bushe kalebeleka eti, “Bona, ndothama zwithu zose butshwa.” Kandidwa kakale kati, “Kwala ikoku, ngoti matama iyawa anogalikabgwe, malebeswa.”

⁶Ngono kati “Kwashingwa kwawila. Ndimi we kutanga newe bupelo, budwilo ne bhelelo. Mmwe ne mmwe una nyota ndowompa ndetjedzelo ye kung'wa mu nsenya we vula ye butjilo kuzhe kwe thengo.

⁷Iye unokunda, unowoamutjila ikoku, ndowobe Ndzimu uwe, ngono iye unowobe mwanangu.

⁸Koga magwala ne basingagalemoyo ne bana shambgwa ne babulayi be bathu ne phombgwe ne banothama malipa ne banonamata midzimu ne banyepi, mbhayilo wabo unowobe mu gakhwa lina moto ne salifa, ogu ndigo lufu gwe bubili.”

⁹Ndizo kukazha mmwe we batumwa be kudzimu bali kutendeka bakabe bana ndilo dzizhele shamu dze bupelo dzili kutendeka, kalebeleka nami eti, “Izha, ndowokulakidza nlongo, nkadzi we Pkhwizana.”

¹⁰Kandisenga ndili mu Meya kandiyisa pezhugwi kwe dombo lefu lefu kandilakidza nzi nkulu wakayengemala, Jerusalema udeluka udwa kudzimu ku Ndzimu,

¹¹una gudzo le Ndzimu. Tjedza tjawo tjipenya se bgwe le themba ipezhugwi, se jasipa, tjibonengela se deemani.

¹²Wakabe una guma gulu gulu lefu lefu lina mikoba ili gumi lina mibili, kuna batumwa be kudzimu bali gumi lina babili pa mikoba iyeyi. Mu zwizhalilo kwakakwagwa mazina e njudzi gumi lina mbili dze bana be Iziraela.

¹³Kwakabe kuna mikoba ili mitatu ku Bhezhuba; mikoba ili mitatu ku Bunandzwa; mikoba ili mitatu ku Burwa; mikoba ili mitatu ku Golombedzo.

¹⁴Guma le nzi nkulu iwoyo lakabe lakabakigwa pezhugwi kwe thiwa dzili gumi lina mbili, pezhugwi kwadzo kwakakwagwa mazina e batumwa be Pkhwizana bali gumi lina babili, ibo batumwa ba Jesu.

¹⁵Ntumwa we kudzimu wakalebeleka nami wakabe ana lukombo gwakathamiwa nge golide kulizanya nzi nkulu ne mikoba yayo ne guma layo.

¹⁶Nzi nkulu unolizana bupabi ne bulefu, ngono kalizanya nzi nkulu nge lukombo gugwe, thambo dzili zwiwulu zwibili ne mazana manna (2 400) bulefu. Bulefu ne bupabi ne bulefu kuyenda pezhugwi kolizana.

¹⁷Guma nailo kalilizanya, ngono lakabe lili maboko ali makumi ali kutathatu kuyenda pezhugwi, kudumilana ne tjilizanyo tje ntumwa we kudzimu.

¹⁸Guma lakabe lakathamwa nge jasipa, koga nzi nkulu ngekwawo wakabe wakabumbiwa nge golide mbuyanana, inobonengela se halasi.

¹⁹Thiwa dze guma le nzi nkulu dzakabe dzakanakisiwa nge milenje yose ye mabgwe e themba ipezhugwi akanaka. Thiwa ye kutanga lakabe lili bgwe le jasipa, le bubili lili safaya,[5] le butatu lili agate[6] le bunna lili emeralidi,

²⁰le bushanu lili onikisi, le butathatu lili kaneliyeni, le kutendeka lili kirisoliti, le zhanakadzi lili bherili, le zhanalume lili topazi, le bugumi lili kalisedoni,[7] le bugumi lina kung'ompela lili tukoisi,[8] le bugumi lina kubili lili ametisiti.[9]

²¹Mikoba ili gumi lina mibili mabgwe mabuya anothama ndalama ali gumi lina mabili; nkoba ng'ompela wakathamiwa nge bgwe buya ling'ompela. Zila i mu nzi nkulu nge ye golide mbuyanana inobonengela se halasi.

²²Andizobona ng'umba ye Ndzimu mu nzi nkulu, ngoti ng'umba yawo ye Ndzimu ndi She Ndzimu Masimbawose ne Pkhwizana.

²³Nzi nkulu autosheta kube ne zhuba muuli kene mwedzi kupenya muuli, ngobe gudzo le Ndzimu lopenya muuli, Pkhwizana iyo luvone gwayo.

²⁴Zwitjaba zwe shango zowoyenda nge tjedza tjawo ngono bomambo be shango banowozhisa fumwa dzabo muuli.

²⁵Mikoba ye nzi nkulu aitowozhaligwa masikati, kakale akutowobe ne busiku ikweno.

²⁶Gudzo ne dendo gudzo le zwitjaba zwe shango yose zowozhisiwa mu nzi nkulu.

²⁷Koga akuna tjakatemapala tjinowongina mu nzi nkulu, kene ali ani unoshinga zwithu zwinobhatisa shoni kene unoleba manyepkhwa, koga kowongina be mazina akakwagwa mu lukwalo gwe Pkhwizana gwe butjilo.